ئەو وێنەیێ بیرەوەریەکا تەحل ئینایە بیرا من
ئەڤ وێنەیێ ل ژۆر بیرەوەریەکا تەحل ئینا بیرا من
تراژیدیا نەتەوەیا کورد زنجیرەکا نە ڤەقەتیایە، مینا تزبیێن سۆفیێن کوردستانێ بەردوام ل دور خوە دزڤرت. هەر ل سەردەمێ تەلەرووتێن عەرەبێن دەشتەکی یێن شینکاتی نەدیتی و تێر ب زکێ خوە نەخواری هێرشی کوردستانێ کری، هەتا ئەڤرۆ ل بن ناڤێن جودا جودا هێرشی کوردستانێ دکن. د هەر هەوەکا ڤان هۆڤێن دژی ژین و سروشتی بۆ سەر کوردستانێ ب هەژمارا ئێکێ ژن، زارۆک، پەککەفتی و ناڤساڵڤەچوویی دبنە نێچیرێن ڤان هۆڤان. ئەڤ رەنگێ هۆڤەتی و دلرەقیا داگیرکەر و هێرشکەرێن سەر کوردستانێ د هشێ تاکێ کوردا بوونە سترانێن ب خەم ژ گەوریا ژن و دەنگبێژێن کوردان نفش بۆ نفشی ڤەگوهازتنە. هاوار و بەنگینێن وان پەریشانێن کورد ب پەیڤێن دل و کەزەب شەوات وێ دیرۆکا پری تراژیدی بۆ مە ڤەدگوهێزن و د گوهێن مە دا زومێنە: “هاوار هاوار … هێدی پاژوو … ل مە فەرمانە، فەرمانا مە کوردانە … هێدی پاژوو شەر گرانە …. ” چ ئاگری بەردەتە هەستێن مرۆڤێ کورد. ب سایا دەنگبێژێن کورد تراژیدیێن مە هەموو هاتنە تومارکرن، ئەگەر نە، دا ئەم وێ دیرۆکێ خوینین یا داگیرکەرێن کوردستانێ نڤێسی و پێ باوەرکەین، کو هەتا نوکە هندەک بێ هشێن کورد باوەر ژ وان چیرۆکێن داگیرکەران دکەن و باب کالێن مە ب گاوور و ژرێدەرکەفتی دهەژمێرن و وان سەربرێن کورد ب پەهلەوان و خودانێن پەیاما پیرۆز ناڤدکەن و دپارێزن! وەی چ سوسرەتە تو سەربر و داگیرکەرێ خوە پیرۆز بکەی و پەیاما وی بپەژرینی، هەرچەندە ئەو پەیام یا تژی کەرب و کین و دژی خوەزا و سروشتیا رەوشتێ مرۆڤانە.
ب هەمان عەقلیەتا دەشتەکیێن بەرێ دوهی (28-09-2022) رژێما خوین و سێدارا ئیرانێ هێرشی سەر بارەگا و کەمپێن ئاوارێن کوردێن رۆژهەلاتا کوردستانێ کو ژ دۆزەخا رژێما ئاخوندا کۆچبەری باشوورێ کوردستانێ بوونە،کرن. وەک هەر جار ژن و زارۆک بوونە قوربانی کینا رەشا مەلایێن ئیرانێ و هەڤئاوازێن وان ل هەرێمێ. دیمەنێن پری ب ژان و دل ئێشن.
وێنەیێن ڤان زارۆکان کو خوەدانە بەر سیڤاندا وێ رزدێ ( شکەفتۆک ژی نینە) بیرەوەریەکا تەحل ئینا بیرا من. ئەز ژی ل تەمەنێ ڤان زارۆکان بووم هەکو رژێما داگیرکەرا عێراقێ ل بهارا ١٩٧٤ێ هێرشی کوردستانێ کری. ژ بەر کینا رەشا فرۆکێن داگیرکەرێ هۆڤ مامۆستایێن مە ئەم ژ خاندنگەهێ دەرخستین و برینە جهەکی دبێژنێ گەرمکێ (گەرمکێ ئەو جهە یێ بارەگایێ لقێ ئێک ل سەردەمێ شۆرەشا ئیلۆلێ (١٩٦١-١٩٧٥) لێبوو، نێزیکی گوندێ کێستەیە). رۆژەکێ ئەم د وانەیێ دا بووین، خاندنگەها مە ل بن دارا بوو، هەکو جوتەکێ بالەفرێن شەرکەر هاتنە هنداڤی مە، گەلەک دنزم بوون، مامۆستای بانگرە مە و گۆت: نەترسن و ژ جهێن خوە نەلڤن. هەتا بالەفر ژ هنداڤی مە چوون، مامۆستای ئەم هەموو د نابەینا چاڤزولقوتانەکێ دا ئەم برینە بن بەرا، شکەفت یا ژ پوولا مە دویر بوو لەوان ئەم برینە بن رزدێن وان کەڤران، مینا زارۆکێن د ڤی وێنەیی دا. هەلبەت ئەم گەلەک ترسیاین و رەنگێ مە پێتوی ببوو و دیمەنێن هێرشا سەر زانکۆیا سلێمانیێ (رانییە) ئینانە بیرا مامۆستایێن مە، لەوان ئەو ژی پر ترسیان چونکو جهێ ئەم لێ بەری هینگێ بارەگایێ لقێ ئێک لێبوو، لێ ئەم زارۆک بووین و مە نەدزانی لێ ترسێ رەنگ ل مە نەهێلا بوو. بالەفر دوو سێ جارا ل دوور مە زڤری و هەر جار گەلەک خوە نزم دکر. مامۆستایێن مە هەر دکرە هاوار و دگۆتن:” چ نینە خوە نەترسینن و ل جهێ خوە نەلڤن!”، وەکو نوکە بیرا من دهێت رەنگێ مامۆستایێن مە بەهتی و ب دەنگەک پری دلۆڤانی لێ یێ تژی ترس دلە دلی مە ددا. دەما دەنگێ بالەفرا نەمای شونیکا مامۆستایێن مە رێ دا مە خوە بگەهینینە شکەفتێ. ئەم گەلەک قووتابی بووین یێن هەر سێ گۆندێن چەلکێ، چەلکا سوریانیان و کێستە ژ بلی هندەک قووتابیێن گوندێ نەرمکێ و بێگۆڤا. هێشتا ئەم د شکەفتێڤە بووین هەکو هاوارا گوندیێن مە و دەوروبەرا گەهەشتە مە و هەر ئێک ل تانا زارۆکێ خوە هاتبوون. ترس و دیمەنێن مامۆستایێن مە هەتا ئەڤرۆ ژبیرا من نەچووینە و لێ هینگێ تێنەگەهشتم کانێ بۆچی مامۆستایێن مە، گۆندیێن مە وەسا ب پەرۆشی ل پارستنا مە دموکۆر بوون و هەر زوو ل هاوارا مە هاتن، دلە دلی مە ددان و بەردەوام دگۆتن: خوە نەترسینن، چ نینە. مامۆستایێن مە وەک زێرەڤانا ل هنداڤی مە دچکلی بوون و خوە نەدڤەشارتن. نوکە تێدگەهم کو ئەگەر وان ژی خوە ڤەشارتبایە دا ترسا مە زێدەتر لێهێت، لێ دەما مە دەیبابێن خوە دیتین، بێهنا مە هات و هەر کەسەکی ژ مە قەستا دەیبابێن خوە کرن. رۆژەکا پری ترس مە دەربازکر. ژ وێ رۆژێ و هەتا نوکە رێزا مامۆستا یا چوویە دلێ من و مینا بابێ خوە رێزێ لێدگرم.
هەتا نەبین خوەدی دەولەت، دێ زنجیرا تراژیدیا مە بەردەوام بت، زارۆکێن مە دێ لبن عەورێ ترسا هێرشێن داگیرکەرا مەزن بن. نەفرەت ل تەڤ داگیرکەر و هەڤالبەند و هەڤ ئاوازێن وان بن
