تورک دبێژن: داپیرا مە دێهلەگورگە، شانازیێ پێ دبن و هەتا نوکە ل هەر خوەپیشاندان و کوۆمبوونەکێ ب تبلێن خوە وێنێ سەرێ دێهلەگورگێ چێدکەن و دەستێ خوە بلند دکەن …
چ ل بەژنا وان دهێت، لێ دبێژنە مە: هوین ئەو تێشکێن دێهلەگورگێنە یێن پاشڤەماین و د شکەفت و بەر رزدێن چیان ڤە خوە ڤەشارتین.
ئەڤ تێزا تورکا بۆ نەژادێ خوە و مە ژی ب زۆرێ دکێشنە بن کەفشێ خوەڤە، لێ ل جیهانێ بوویە جهێ تڕانەپێکرنێ و شەهمەزاریێ. هەر چەندە کەسەکی باوەر ب ڤێ تێزا وان نەئینایە لێ د سەر هندێ ڕا ژی نەژادپەرەستێن تورک سەرێ دێهلەگورگێ کرییە سمبۆلا خوە یا نەتەوی.
جارا سەیدایێ جگەرخوینی گۆتی: بابۆ ب خودێ نەژادێ مە و هەوە (تورک و عەرەبان) نە ئێکە لێ تورک دبێژنە مە: هوین تورکێن چیایینە و خوە دویری شاراستانیێ د شکەفت و رزدێن چیان دا ڤەشارتیە.
عەرەب ژی دبێژن: هوین بیژی و نەڤیچرکێن ئەهریمەنینە!!
لێ زانست درەوا نزانیت و باوەریێ ب چیڤانۆک و ئەفسانان نائینیت، ژ مێژەیە نەژادێ مە دیار کری و نەتورکێن مەغولینە و نە ژی بیژی و نەڤیچرکێن ئەهریمەنینە بەلکو مللەتەکێ زاگرۆسینە و ئاریاییینە و بەرمایێن بابکالێن مە ئەڤێ پشت ڕاست دکەن، ئەوێن ژ هەوێن داگیرکەرێن عەرەب و تورکان هاتینە پاراستن و د زکێ ڤێ ئاخا پیرۆز دا وەک رهێن دار بەروویان چووینە خار، ئەڤرۆ ب سایا زانستی درەوێن ئێک ب ئێک یێن عەرەب و تورکان دهێنە ئاشکەرا کرن.
چەوان زانستی دیارکریە کو کوردستان دەرگۆشا یەکەمین شارستانیا مرۆڤایەتیێ یە و مرۆڤاتی فێری چاندن و بخودانکرنا هەسپ و کەدیکرنا تەرش و کەوالان و ئاڤاکرنا خانی و نڤیسینێ کرییە، ئەڤرۆ ژی تیمەکا زانیارێن بریتانی ل شکەفتا شانەدەرێ هەمان تێزا دبێژیت کوردستان دەرگۆشا یەکەمین شارستانێی یە، دووپات کرەڤە و روخسارێ داپیرا کوردان کو بەری ٧٥ هزار سالان ژیایە، دێمێ وێ یێ گرنژی نیشا هەمی مرۆڤاتیێ دا، ب ڤێ ڤەدیتنێ تێزا هەتکبەری و دویری زانستیا تورک و عەرەبان هاڤێتە ناڤ چاڤێن وان. ئەڤە وێنێ داپێرا مە کوردان هاتە دیتن، پا کا وێنێ داپیرێن هەوە؟!
*** فەرە هەر کوردەک و ب تایبەت حوکمەت و سازیێن زانستی ڤێ ڤەدیتنێ ب گرنگی بوەرگرن و بەلاڤە بکەن و ب دەستگرتن بهنێرنە موزیۆمێن(موزەخانێن) ب ناڤ و دەنگێن جیهانێ.
