چونکی گەنەڕال مەزلووم عەبدی، گۆتە سەرۆک بارزانی “سەرۆک” و سوپاسییا سەرۆک نێچیرڤان بارزانی کر و ژ ئالییێ رێزدار مەسروور بارزانی ڤە ب گەرمی هاتە پێشوازیکرن، خەیالێن گەلەک ژ پشتەڤانێن وی ل باشوور، هەڕفین! ئاخر وان هەمی هیڤییا خوە بۆ دوژمناتییا پارتی ل سەر ڤی گەنەڕالی ئاڤاکربوو. د رەوشا نەبوونا کاریزما و سیمبۆلەکا نەتەوەیی یا دژی پارتی دا، وان هیڤیییێن خوە سپاردبوونە مەزلوومی کو بۆ وان پارتی بهەڕفینیت یان رکەربەرییا پارتی بکەت. لێ ژبیرکر کو مەزلووم نە مولکێ وانە و نە ئەو کەسە یێ کو خزمەتا عوقد و کینا وان بکەت. مەزلووم کوردە و یێ کورد بیت پارتی دێ پێشوازییێ لێ کەت.
ئەو شاش مان. دوهی مەزلووم ل گەل ئەحمەد شەرعی کۆمبوو، پێر بایدەمیر ل گەل ئەردۆگانی کۆم دبوو، ئەڤە ل دەف وان نۆرمالە، لێ نها؟ ئەو مەزلوومێ ل دەف وان یێ پیرۆز، ئەو بایدەمیرێ د دلێ وان دا جهێ خوە گرتی، دناڤبەرا چاڤ و برییان دا بوونە ئەهریمەن. ئەڤە گەلەک یا چاڤەرێکری بوو. ژبەرکو د بنیات دا پشتەڤانییا وان بۆ مەزلووم و بایدەمیری نە ل سەر بنیاتێ کورداتییێ بوو، کا چەوا پشتەڤانییا وان ل ئۆجالانی نە ل سەر وی بنیاتی یە، پشتەڤانییا ئاپۆییەکی ژی ل ئیخوانان، هەر بۆ دژاتییا پارتی یە.
دەما وان چەپلە بۆ مەزلوومی دقوتان، نە یێن سەرکەفتنا وی بوون، لێ هزردکر کو ئەڤ کەسە نوینەرێ وانە ل دژی پارتی و بارزانی. دێ بۆ وان هەولێر و دهۆکێ کەتە ئاخ! کو هەلویستێ وی ل گەل پارتی دیتی، ل گەل وێ کو مەزلووم هەر ئەو مەزلوومە یێ سەرکێشییا کچ و کورێن کورد یێن رۆژئاڤا کری و بوویە ئەفسانە، و بایدەمیر هەر ئەو بایدەمیرە یێ ل پەرلەمانێ تورکیا دەستێ خوە ل دلێ خوە دایی و گۆتێ “کوردستان د ڤێرە دا یە” تویشێ سەدمەیێ بوون و هەڤکێشە هەمی بەروڤاژی بوو! “ئەڤە چ خەون بوو ئەم تێدا؟” “مە مار د پاخلا خوە دا ب خودان دکرن؟” پێکڤە هەمییان هێرشکرێ و روتبەیێن گەنەڕالییا مەزلوومی ل ئاخێ دان و سنگێ بایدەمیری کەلێشا و قەت رەحم ب وان و خەباتا وان نەبر.
د رەهەندەکێ دی دا، ئەڤەیە هێزا پارتی، ب سالان دوژمنێن وێ خەیالان ل سەر تشتەکی ئاڤا دکەن و د رۆژەکێ دا پارتی ب ئارام و تەنا هەمییێ دهەڕفینیت، بۆ چەند سالێن دی، خودێ کەریمە. کا دێ دوژمنێ. وێ هیڤییێن خوە ل سەر کی ئاڤا بکەن دا کو نوینەراتییا کەرب و کینا وان یا ل دژی پارتی بکەت و بۆ وان پارتی بکەتە ئاخ!
محەمەدێ نەجمەدینی
٢٠٢٥\١١\٢٠
