چه‌کدارێن پەکەکێ ل باشوورێ کوردستانێ ئێریشێ بنگه‌هه‌کا ئارتێشا ترکیێ کر و د ئه‌نجام دا د ناڤبه‌را هێزێن ترکیێ و پەکەکێ دا شه‌ر ده‌رکه‌ت. ترکیێ ب حێجه‌تا ڤێ ئێریشێ، ده‌ست ب ئۆپه‌راسیۆنەکێ ل باشوورێ و رۆژاڤایێ کوردستانێ کر. ل گۆرا داخوویانیان د ئه‌نجاما ڤی شه‌ری دا هه‌تا نها، ۱۲ له‌شکه‌رێن ترک و ۱۹ چه‌کدارێن پەکەکێ ژیانا خوه ژ ده‌ست دایە.
د ڤی شه‌ری دا کێ چه‌ند ژ کیژان ئالی کوشتنه نه گه‌له‌کی گرنگه و نه ده‌لیله‌کێ سه‌رکه‌فتنه‌کێ یە. به‌ری هه‌ر تشته‌کی دڤێ مرۆڤ بپرسه: گه‌لۆ ئه‌ڤ شه‌رێ چیه؟ گه‌لۆ ئه‌ڤ شه‌رێ کێیه؟ ئه‌گه‌ر مرۆڤ به‌رسڤا ڤان هه‌ر دو پرسان ب به‌رفره‌هی بده، دێ راستی و ئارمانجا ڤی شه‌رێ بێ واته ده‌رکه‌ڤه هۆلێ.
ل ترکیێ، ده‌ما جه‌نازه‌یێ له‌شکه‌ره‌کێ ترک دبن، ئالیێن سیاسی دکن مەلزه‌مه‌یه‌کا پرۆپاگانده‌یا سیاسی. ب رۆژان مه‌دیایا ترکی ل سه‌ر بوویه‌رێ دسه‌کنه، به‌رنامه‌یێن تایبه‌ت چێدکن و هه‌ستێن نژادپه‌ره‌ستی به‌لاڤ دکن و هه‌ولددن دژمناتیا کوردا بێخن مه‌ژیێ هه‌ر هه‌موه‌لاتیه‌ک ترک دا. یانی د راستیا خوه دا ئه‌گه‌ر فایده‌یه‌کا ڤی شه‌ری هه‌به ترک فایدەیێ ژێ دبینن و کورد خوساره‌تەک مه‌زن دبینن.
پرسه‌ک دن هه‌یه: گه‌لۆ پەکەک شه‌رێ دژی ده‌وله‌تا(!) ترک ژ بۆ چ ل باشوورێ کوردستانێ دکه و نه ل باکورێ کوردستانێ ڤی شه‌ری دکه؟ ئه‌ڤ یه‌ک به‌لکی سرا هه‌ری مه‌زن د تێگەهاندنا واته‌یا ڤی شه‌ری دا ڤه‌شارتی یه.
پەکەکە شه‌ر گور دکه، ل پارتییا (ده‌م) ل ترکیێ دۆزا ئاشتیێ دکه. ئه‌ڤ یه‌ک نه ناکۆکیه‌ک هه‌ری مه‌زنه؟ بلا که‌س هه‌ول نه‌ده سیاسه‌تا ئیرۆ یا پارتییا (ده‌م) و پەکەکێ ژ هه‌ڤ جودا بکه. ئه‌گه‌ر هنده‌ک جارا (ده‌م) هندەک گاڤان باڤێژه کو، مرۆڤ ب ئه‌رێنی بنرخینه ژی، نه جهێ باوه‌ریێ یه ته‌کتیکه‌کە سیاسه‌تا پەکەکێ یه.
ل ترکیێ و باکورێ کوردستانێ، پەکەکە و هه‌موو رێخستن و پارتیێن گرێدایێ پەکەکێ، د مژ و مۆرانێ دا، د ئاڤێن شێلۆ دا سیاسه‌تێ دکن. ئه‌گه‌ر ئارامییه‌ک هه‌به، خه‌لک ده‌نگێ شه‌ر و چالاکیێن چه‌کداری نه‌که و د ناڤا ئارامیه‌کێ دا جڤاک ل سه‌ر پرسگرێکێن جڤاکی و سیاسی گۆتوبێژان بکه، ره‌وشا پەکەکێ و ده‌ردۆرا وێ تێک دچه. ئه‌و ناخوازن ئینسان ب ئاوایه‌ک رێکووپێک بفکرن. ژیانا وان یا سیاسی ل سه‌ر پرۆپاگانده‌یێن ده‌ره‌و و نووچە یێن شاش هاتیه ئاڤاکرن.
ئه‌ڤ شه‌رێ کو د ڤێ دەما پێڤاژۆیا هلبژارتنێن هه‌رێمی دا تێ کرن، ژ مه‌ترسیا ونداکرانا ده‌نگێن پەکەکێ ل باکورێ کوردستانێ یه. پەکەکە ته‌نێ ب شه‌ر و چالاکیێن چه‌کداری هه‌ول دده ترسه‌کێ بێخه ناڤا جڤاکێ دا.
ل ڤێ ده‌رێ پرسا بنگه‌هین ده‌ردکه‌ڤه هۆلێ: گه‌لۆ پەکەکە خزمه‌تا کێ دکە و ژ بۆ چ دکه؟
ئیرۆ ته‌نێ ل باشوورێ کوردستانێ ده‌ستکه‌فتیێن هه‌یی هێڤیه‌که کو، به‌ر ب ده‌وله‌تبوونێ ڤه هه‌رە. سه‌ده‌ما کو ئه‌ڤ شه‌ر ل باشوورێ کوردستانێ روو دده ب ته‌نێ هه‌ولا ئاسته‌نگکرنا ده‌وله‌تبوونا کوردا یه.
٢٠٢٣/١٢/٢٤
نێرین/شرۆڤه
