ئەگەر ئەز باکوری بامە دا دەنگێ خوە دم هاک-پارێ
ئەگەر ئەز باکوری بامە و من مافێ دەنگدانێ هەبایە دا دەنگێ خوە دم هاک-پارێ، چما؟
“ممکنه ل گۆرا من کێماسیێن هاک-پارێ هه‌بن، ئه‌م گه‌له‌ک جاران هاک-پارێ ره‌خنه دکن و دخوازن ئه‌و پتر ل سه‌ر خه‌ته‌ک نه‌ته‌وی سیاسه‌تێ بکە. ره‌خنه‌یێن مه نه ژ بۆ ئێشاندنا هاک-پارێ یه، ژ بۆ پێشکه‌تنا وێ یە. راستی ده‌ما ل دیاربه‌کرێ ئه‌ز ئۆتوبووسا هاک-پارێ دبینم و سترانێن نشتمانی ب ده‌نگێ بلند سه‌ح دکم ئه‌ڤ یه‌ک د ئالیێ حسی دا باندۆرێ ل من دکه. ژ بۆ وێ ژی ڤه‌کری ئه‌زێ ده‌نگێ خوه بدم ئالا کوردستانێ و ڤان سترانێن نشتمانی کو دهێله هێستر ژ چاڤێن من ببارن.” ئەڤ گۆتن یێن هەڤوەلاتیەکێ کورد ژ باکورێ کوردستانێ یە.
هاک-پار وه‌کی پارتییه‌کا کوردی به‌شداری هلبژارتنێ دبه. یەکەمین پارتییا کوردی یە کو د پرۆپاگەندەیا هلبژارتنان دا ب ڤەکری و زەلالی بەحسا مافێن گەلی کورد دکە. مافێن نه‌ته‌وه‌یی یێن گه‌لێ کورد ل باکورێ کوردستانێ دپارێزه. هاک-پار د پرۆپاگەندەیا هلبژارتنان دا ژ بۆ باکورێ کوردستانێ داخوزا قەوارەیەک سیاسی فەدەرالیێ دکە، داخواز دکە کو ترکیێ ببە کۆمارەک فەدەرالی. هاک-پار دخوازه کو زمانێ کوردی ببه زمانێ په‌روه‌رده‌یێ و زمانێ فه‌رمی ل باکورێ کوردستانێ. ئانکو ب کورتی مرۆڤ دکارە بێژە کو پرۆژەیێ ڤێ پارتییێ ژ بۆ چارەسەرکرنا پرسا کورد ل ترکیێ هەیە، مافێن گەلی کورد ل باکورێ کوردستانێ ژ بۆ ڤێ قۆناغێ د پرۆژەیێ خوە یێ هلبژارتنان دا بجهکرنە.
لێ مخابن گەلەک کێم بەحسێ ڤێ پارتییا کوردی و بەرنامە و پرۆژەیێ وێ یێ نەتەوەیی تێ کرن. چما؟ دبە کو ئەگەرێ سەرەکی ئەو بە کو پەکەکێ/هەدەپێ د ناڤا ڤان چەند سالان دا کورد ئەسیمیلە کرنە و هەستا نەتەوەیی و کوردستانی، نە ب تەنێ لاواز کریە لێ بەلێ ب ئاوایەکی گشتی هەستا نەتەوەیی ل باکورێ کوردستانێ مراندیە، پەکەکێ/هەدەپێ د سیاسەتا خوە یا ڤان جەند سالان دا ئەڤ پەیڤ ل باکورێ کوردستانێ قەدەغەکرنە وەکی: کورسستان، باکورێ کوردستانێ، مافێن گەلێ کورد و ئالایا کوردستانێ ل بەر دلی باکورریان رەشکریە و بەرێ وان دا یە سیاسەتا براتیا گەلان و میساقێ ملی و جمهۆریا دەمۆکراتیک کو ئەڤ ژی درووشم و داخوازێن چەپێن کەمالیستن.
ل ترکیێ دۆزا نەتەوەیەک بن دەست هەیە ب ناڤێ نەتەوەیێ کورد، ل ترکیێ پارچەیەکا کوردستانێ هەیە. ل ترکیێ پرسا گەلەکی هەیە ب ناڤێ گەلێ کورد و گەلێ کورد ژ هەموو مافێن خوە یێن بنگەهین بێ بەهرە. هەرکەسەکێ/ا هەس ب ڤێ یەکێ بکە و خوە خوەدیێ دۆزا کوردستانێ بحەسبینە دڤێ دەنگ ب هاک-پارێ بدە. دڤێ کوردپه‌روه‌ر، پارتیێن کورد و کوردستانێ و هه‌موو کوردستانی ده‌نگێن خوه بدن هاک-پارێ. ب ڤی ئاوایی بەلکی هەستا نەتەوەیی ل باکورێ کوردستانی بلڤە و تەڤگەرا نەتەوەیی پێشکەڤە، ئەڤ ژی ژ بۆ پاشەرۆژا پرسا کورد ل ترکیێ گەلەک و گەلەک گرنگە.
Nasrat Hacî
