ھیام حاجی ئەحمد– ڤەکۆلەرا سیاسی د کاروبارێن عیراق و کوردستانێ دا
سالێن زێڕین یێن ژیێ گەنجینیێ، ل دەمێ ئەز قوتابی ل ئامادەیا بازرگانی، دناڤا ترس و تۆقاندنا ڕژێما بەعسا ژناڤچووی دا، ھەستێن کوردینییێ و وەڵاتپارێزییێ، وەک ئاگرەکێ ڤەشارتی د ناڤ دلێ مە دا دگەش بوون. ب تایبەت ل ھەیڤا ئادارێ، ئەو ھەیڤا ھشیارکرنا ھەست و نەستێن نەتەوەیی، مە یادا کۆچکرنا بابێ ڕۆحی یێ نەتەوا خوە، بارزانی یێ نەمر، ب ھندەک ھێمایێن سادە لێ پر ب ڕامان، ساخ دکر. ھندەک ژ مە قەردێلەکا ڕەش ب کەزیا خوەڤە دکر و ھندەکان کراسەکێ ڕەش خوە دکر داکو د بێدەنگیێ دا ھەستا خوە یا وەفاداریێ دیار بکەن. ل سەر دیوارێن قوتابخانێ، کو ھەر ئێک ژ وان چاڤدێرەکێ بێزمان یێ ڕژێمێ بوو، مە ب نھێنی و ب لەز پەیڤێن ئاگرین دنڤیسین، پەیڤێن کو ترس و ھیڤی د ناڤا خوەدا ھەلدگرتن: “بڕوخێت سەدام حوسێن” و “بژیت مەلا مستەفا بارزانی” و ” یان كوردستان یان نەمان”.
ئەڤ نڤیسینە بتنێ چەند پەیڤ نەبوون، بەلکو ئەو سرودا نیشتیمانپەروەریێ بوو، کو مە د ناڤ دلێن خوە دا ڤەدشارت. ل وی سەردەمی تاری، ب تنێ نڤیسینا ناڤێ “کوردستان” یان “بارزانی” ل سەر پارچەیەکا کاغەزێ، دشیا حوکمێ سێدارێ دگەل خوە بینیت. ڕێڤەبەرێ قوتابخانێ ل وی دەمی، حەسەن قوزی، ڕەفیقەکێ حزبی یێ چالاک بوو، لێ د ناخێ خوە دا مرۆڤەکێ باش بوو.
ل ڕۆژا سێشەمبییەکا ھەیڤا ئادارێ، ھەیڤا شوڕەش و بیرئینانا بارزانی یێ نەمر، من بڕیارەکا بێ دودلی دا. من ئەو پەیڤێن پیرۆز ل سەر کاغەزەکێ نڤیسین و ب دزیڤە ھاڤێتنە د ژوورا “ئیتحادا” بەعسیان دا. ڕۆژا پاشتر، چارشەمبی، کو ڕۆژا کۆمبوونێن حزبی بوو، قییامەت ل قوتابخانێ ڕابوو. ھێزێن ئەمن و ڕەفیقێن حزبی ھاتنە د قوتابخانێ ڤە و گەلەک قوتابیێن بێگونەهـ ھاتنە گرتن، و ترسەکا مەزن کەفتە د دلێ ھەموویان دا.
بێگومان، ئەز ژی گەلەک ترسیام، و ئەڤ ترسە هێشتا گرانتر لێهات، چونکی دەمەکێ کێم بوو،خویشکا من (رێزان) ژی ل قوتابخانا (ئەڤین) کو نوکە (لەیلان)ە، “تف” کربوو ل وێنەیێ سەدام حسێنی. بابێ من یێ چارەسز مای، پەنا بۆ ئاغایەکێ بر داکو واستەیەکێ بۆ بکەت، لێ وی ب کورتی بەرسڤ دابوو و گوتبوو: “ئەوا تف دكەتە وینەیێ بابێ عودەی، بلا ئەنجامێ کارێ خۆ ببینیت”، نوكە ژی ئەو ئاغا خودان پوستە. تنێ پشتی دانووستاندن و گەلەک بەرتیلا، مە شیا ب چەند واستەیان خویشکا من ژ مرنێ قورتال بکەین. ئەڤ ھەردو ڕوودانان نیشا ددان، کو چاوا ترسێ وەک سێبەرەکێ ل سەر ھەر تاکەکێ کورد ھەبوو
بۆ ماوەیەکێ درێژ، کەس نەدوێریا پرسیارا چارەنڤیسێ وان قوتابیێن گرتی بکەت و ئەڤ چیرۆکە وەک نهێنیەکا مەزن د دلێ من دا ڤەشارتى ما، ئەڤ سالە، پشتی دەمەکێ درێژ، دەمێ ئەم ھەڤالێن وێ ئامادەییێ کۆم بووین و مە بیرھاتنێن خوە بۆ ھەڤدو ڤەدگێران، من ژی چیرۆکا خوە ڤەگێرا. ل وی دەمی من زانی، کو دو ژ وان گرتییان، ھەڤژینێن ھەڤالێن من بوون و وان ژی تازە زانی . ئێک ژ وان عەلی سعيد مزوری بوو و دلشاد حسن باجلوری، ديسان ئەو قوتابیێن دی ئەویێن دگەل دا ھاتینە گرتن سعد جلال دهۆکی، ئازاد عەبدوللا وئەیاد تاھر علی سعید و شڤان مزوری و محمد عەبدولکەریم فصیل عەبدوللا.
نوکە، پشتی ڤی دەمێ درێژ، ئەم ھەموو باشتر تێدگەھین، کو ئەو کوردینییا وی سەردەمی، کو ب ترس و خوینێ ھاتیە ئاڤدان، چەند ب زەحمەت بوو، لێ د ھەمان دەم دا چەند ب ڕوومەت و خوەش بوو. ئەڤرۆ، دەمێ ئەم ل ئاسمانێ ئازادیێ کوردستانێ دنێڕین، دڤێت ئەم بزانین، کو ھەر پیتەک ژ ناڤێ كوردستانێ، ب خوینا شەھیدان و ئازارێن زیندانیان ھاتیە نڤیسین. خەباتا نوکە، درێژەپێدەرا ھەمان ئەو خەباتا پیرۆزا بەرێ یە، و ئەرکێ ل سەر ملێن مەیە، کو ئەم وێ داستانا قارەمانیێ و خۆڕاگریێ ژبیر نەکەین و بۆ نفشێ بھێت ڤەگێڕین.
