د. عادل باخه‌وان دیار کر کو سه‌رۆکێ هه‌رێما کوردستانێ نێچیرڤان بارزانی ژ بۆ کێمبوونا ئالۆزیان ل هه‌رێمێ ب ترکیێ و ڕۆژاڤایێ کوردستانێ را د ناڤا دیالۆگێ دا یه.
سه‌رۆکێ ناڤه‌ندا فرانسی یا لێکۆلینێن ل سه‌ر ئیراقێ عادل باخه‌وان ڕاگەهاند، نێچیرڤان بارزانی هه‌ول دده ئالۆزیێن هه‌رێمێ ب تایبه‌تی یێن د ناڤبه‌را ترکیێ و هێزێن سوورییا ده‌مۆکراتیک (هسد) دا کێم بکه.
عادل باخه‌وان به‌حسا دیپلۆماسیا نێچیرڤان بارزانی کر و گۆت: “سه‌رۆک نێچیرڤان بارزانی د هه‌مان ده‌مێ دا ب ترکیێ و ڕۆژاڤایێ کوردستانێ را دئاخڤه و دخوازه چه‌ک بێ ده‌نگ ببن.”
سه‌رۆکێ فرانسایێ ئه‌ممانوئێل ماکرۆن د گۆتاره‌کا خوه دا ژ بۆ دیپلۆماتکار و بالیۆزێن وه‌لاتێ خوه ڕاگەهاند، “ئه‌م دێ پشتا شه‌رڤانێن کورد به‌رنه‌دن و ل هه‌مبه‌ری وان ب وه‌فا بن.”
د. عادل باخه‌وان ڕاگەهاند، ئه‌و گۆتنێن کو سه‌رۆکێ فرانسایێ ژ بۆ بالیۆزێن وه‌لاتێ خوه کرنه، نه ته‌نێ تایبه‌تن ژ بۆ ڕۆژاڤایێ کوردستانێ هه‌ر وها ژ بۆ هه‌رێما کوردستانێ و پرسگرێکا کوردان یا ل ڕۆژهلاتا ناڤین ژی تایبه‌تن.
سه‌رۆکێ ناڤه‌ندا فرانسی یا لێکۆلینێن ل سه‌ر ئیراقێ ب بیر ئانی ده‌ما کو ئامه‌ریکا ژ ئه‌فخانستانێ ڤه‌کشیا، ماجرۆن هات هه‌ولێرێ و گۆت، “ئه‌گه‌ر ئامه‌ریکا هه‌ڤپه‌یمانان بته‌رکینه، ئه‌و وان ناته‌رکینن.”
عادل باخه‌وان دیار کر، “ئه‌ڤ یه‌ک ژ داخویانیێن هه‌ری گرینگه د دیرۆکا دیپلۆماسیا کوردان دا.
ئه‌گه‌ر ماکرۆن ئه‌و گۆتن ل هه‌مبه‌ری هه‌ر کۆم و پێکهاته‌یه‌کا دن یا ڕۆژهلاتا ناڤین بگۆتانە، ته‌ڤاهیا لاشێ دیپلۆماسیا وێ کۆمێ وه‌کی شانا هنگڤ دلڤیا دا کو کار لێ بکه.”
سه‌رۆکێ ناڤه‌ندا فرانسی یا لێکۆلینێن ل سه‌ر ئیراقێ، به‌حسا باندۆرا ماکرۆن یا ل سه‌ر سه‌رۆکێن جیهانێ ژی کر و به‌حسا هه‌ڤدیتنا د ناڤبه‌را نێچیرڤان بارزانی و دۆنالد ترومپ کر.
باخه‌وان به‌حسا دیالۆگا ترومپ و نێچیرڤان بارزانی کر و وها گۆت: “سه‌رۆک ماکرۆن د ده‌ما ڤه‌کرنا کاته‌درالا نۆتره دامه‌یێ دا ل پاریسێ مه‌رجێن دیالۆگێ د ناڤبه‌را کاک نێچیرڤان و سه‌رۆک ترومپ دا دافرینه. ئه‌ڤ نیشانه‌یا وێ یه‌کێ یه کو ماکرۆن دخوازه ڕاسته‌راست باندۆرێ ل سه‌ر بریارێن ترومپ یێن ده‌ربارێ ڕۆژاڤا و باشوورێ کوردستانێ ده‌ینه.”
عادل باخه‌وان د به‌رده‌وامیا ئاخافتنا خوه دا به‌حسا ڕۆلا نێچیرڤان بارزانی یا د کێمکرنا ئالۆزیێن هه‌رێمێ دا ب تایبه‌تی د ناڤبه‌را ترکیێ و هێزێن هەسەدە یێ دا کر و گۆت:
“ل گۆری کو ئه‌ز ئاگاهدارم سه‌رۆک نێچیرڤان بارزانی د هه‌مان ده‌مێ دا ب ترکیێ و ڕۆژاڤایێ کوردستانێ را دئاخڤه. ل گۆری کو ئه‌ز ئاگاهدارم د پشت په‌رده‌یێ دا و ب ئارامی سه‌رۆکاتیا هه‌رێما کوردستانێ و سه‌رۆکێ هه‌رێما کوردستانێ دیالۆگا ڕاسته‌راست ب ترکیێ و هەسەدە یێ را داتینه ژ بۆ کو چه‌کێن وان بێ ده‌نگ ببن. ئه‌ڤە ڕاست ئه‌و داخوازه یا کو وه‌زیرێ ده‌رڤه یێ فرانسایێ ژی بەحس ژێ کر بوو.”
“فرانسا دخوازه کورد ل سووریه‌یێ ببن دینامیکه‌که ستراته‌ژیک”
ل گۆری د. عادل باخه‌وان، فرانسا ل سه‌ر سێ ئاستان ل ڕۆژاڤایێ کوردستانێ کار دکه، ئاستا یه‌که‌م یه‌کیتیا مالا کوردا نه، ئاستا دویه‌م خورتکرنا تێکلیێن وێ ب ده‌ستهلاتدارێن نوو یێن سووریه‌یێ را یه.
باخه‌وان ته‌که‌ز کر کو فرانسایێ پشتی هلوه‌شینا ده‌ستهلاتا به‌شار ئه‌سه‌د پێشی شانده‌یه‌ک شاند شامێ و ئوو پاشێ وه‌زیرێ کارێن ده‌رڤه شاند و ب ئه‌حمه‌د شه‌ر ڕه جڤیا.
باخه‌وان دا زانین کو فرانسا دخوازه ب ده‌ستهلاتدارێن نوو یێن سوورییێ را پرسگرێکا کوردان بینه ڕۆژه‌ڤێ و کوردێن سوورییێ د حکومه‌تا پاشه‌رۆژێ دا ببن دینامیکه‌که ستراته‌ژیک و گۆت: “فرانسا ب واشینگتۆنێ را ژی کار دکه دا کو دۆنالد ترومپ بده باوه‌رکرن کو هێزێن ئەمه‌ریکایێ ژ ڕۆژاڤایێ کوردستانێ ڤه‌نه‌کشینه.”
ژێده‌ر: ڕووداو
