سیاسی

ئارمانجا 16 ئوكتۆبەر نه‌هشتنا کیانا هه‌رێما کوردستانێ بوو

سه‌رۆک: ئه‌م دخوازن که‌رکووک ببە میناکا پێکڤه‌ژیانێ، لێ گۆتوبێژێ ل سه‌ر ناسنامه‌یا کوردستانیبوونا که‌رکووکێ ناکن.ئیرۆ ۱۶ێ ئۆکتۆبه‌رێ یه‌، ئەو ڕۆژا خیانه‌ت ل که‌رکووکێ و گەلێ كورد ب گشتی هاتی کرن‌، سه‌رۆک بارزانی ب مناسه‌به‌تا ڤێ ڕۆژێ داخوویانیه‌ک ژ بۆ ڕایا گشتێ یا کوردستانێ ڕاگەھاند.داخوویانیا سه‌رۆک بارزانی:ب ناڤێ خوه‌دایێ مه‌زن و دلۆڤانشانزده‌هێ جۆتمه‌هێ (ئۆکتۆبه‌ر) ڕۆژه‌کا تاریه‌ د دیرۆکا میڵه‌تێ مه دا‌. د ڤێ ڕۆژێ دا بوو کو خیانه‌تا نامه‌ردانه‌ ل هێڤی و ئومێدێن گه‌له‌کی مه‌زلووم هاته‌ کرن. ب سه‌ده‌ما ده‌سته‌کی ناڤخوه‌ی ڤه‌ یاریه‌کا بێویژدانانه‌ ب چاره‌نووسا گه‌لێ مه‌ هاته‌ کرن و ئه‌ڤ ئاخا ب خوینا هه‌زاران زارۆک و گه‌ده‌یێن ڤی نشتمانی هاتبوو پاراستن، ل چارچێوه‌یا پلانه‌ک دا که‌ته‌ بن داگیرکه‌ری و کاڤلکاری و سڤکاتیکرنا ب پیرۆزیێن گه‌لێ کوردستانێ. ئه‌ڤ پلانا گه‌مار، سڤکایه‌تیه‌ک بوو ب سه‌د سالێن خه‌بات و قوربانیدانا گه‌لێ مه‌. سڤکایه‌تیکرن بوو ب خوینا شه‌هیدان و وان پێشمه‌رگه‌یێن قه‌هره‌مانێن ل شه‌رێ ته‌رۆریستێن داعیش دا که‌رکووک و ناڤچه‌یێن کوردستانیێن دن یێن ده‌رڤه‌یێ ئیداره‌یا هه‌رێما مه‌ پاراست و ل شوونا هه‌موو مرۆڤایه‌تیێ شه‌رێ ته‌رۆرێ کرن. هه‌ر وها سڤکایه‌تی بوو ب ده‌نگێ ڕه‌وا و ئاشتیانه‌یا گه‌لێ کوردستانێ کو ته‌نێ تاوان ئه‌وه‌ بوو ده‌نگێ خوه‌ یێ ڕاستین ب گوهێ جیهانێ گهاند.مه‌ پێشبینیا هه‌موو ئه‌گه‌ره‌ک کربوو، لێ به‌لێ تو ده‌مه‌کی ئه‌م ل به‌ندا ئه‌وه‌ نه‌بوون ده‌سته‌کی ناڤخوه‌یی ب ڤی ئاوایی خه‌نجه‌رێ ل پشتا گه‌لێ کوردستانێ بده‌.ئه‌وان خوه‌ست ب نه‌پاکی و داگیرکه‌ری و ب زه‌بر و زه‌نگ، ئیراده‌یا گه‌لێ مه‌ بشکینن کو ئازادیخوازی و په‌یاما ئاشتی و پێکڤه‌ژیانێ یە‌، لێ به‌لێ ئیراده‌یا گه‌لێ مه‌ ب زیندی ما و ب پشتراستیێ ڤه‌ ئازادیخوازی و په‌یاما ئاشتی، سه‌ربلندیه‌ و نه‌پاکی و داگیرکه‌ری ژی سه‌رشۆری و شووره‌ییه‌.ئارمانجا شانزده‌ها جۆتمه‌هێ، نه‌هشتنا کیانا هه‌رێما کوردستانێ و بێواته‌ کرنا مافێن گه‌لێ کوردستانێ بوو. هه‌ر چه‌نده‌ ب هه‌ڤکاری و چاڤساخیا ده‌سته‌کی نه‌پاکێ ناڤخوه‌یی، پلانه‌کی زێده‌یێ مه‌زن ل دژی گه‌لێ مه‌ ل هۆلێ دا بوو، لێ به‌لێ کو پێشمه‌رگه‌ بریارا به‌رگری و به‌رخوه‌دانێ دا، هاوکێشه‌ گوهه‌رین و سه‌ربلندی ژ بۆ گه‌لێ کوردستانێ ما.ل ڤێ سالڤه‌گه‌را ته‌هل دا، داخواز ژ هه‌موو ئالیه‌ک دکم ڕێز ل دیرۆک و مافێن گه‌لێ کوردستانێ بگرن، سیاسه‌تا شۆڤه‌نی و ئینکارکرنێ هیچ ئه‌نجامه‌کی خوه‌ نینه‌ و ته‌نێ شه‌ر و پاشکه‌تی ژێ ده‌ردکه‌ڤه‌. هه‌رده‌م ژی مه‌ داخواز کریه‌ کو که‌رکووک ببە میناکا پێکڤه‌ژیانێ، لێ به‌لێ موساوه‌مه‌ ل سه‌ر ناسنامه‌یا کوردستانیبوونا که‌رکووکێ نایێ کرن. داخواز ژ هه‌موه‌لاتیێن کوردستانێ دکم ب هێڤی و هێز ڤه‌ ته‌ماشا پاشارۆژ، دۆزا گه‌لێ مه‌یێ ڕه‌وا بکن و ب شه‌ر و پلان و نه‌پاکی، داوی لێ نایێ.شانزده‌ها جۆتمه‌هێ ئه‌و ڕۆژا تاریه‌ د دیرۆکا گه‌لێ مه‌ دا کو تو ده‌مه‌کی نایێ ژ بیر کرن و دڤێ ببێ ده‌رس و وانه‌ ژ بۆ هه‌موو تاکه‌ که‌سه‌کی گه‌لێ کوردستانێ.سلاڤ ژ بۆ شه‌هیدێن کورد و کوردستان و هه‌موو شه‌هیدێن ڕێیا ئازادیێ.سلاڤ ژ بۆ پێشمه‌رگه‌یێن قه‌هره‌مان.سلاڤ ژ بۆ تێکۆشه‌ر و نشتمانپه‌روه‌ران.مه‌سوود بارزانی2018-10-16

Back to top button