هوون یا ڕاستی بخوازن کوردێن کو بارزانیان ناسنه‌کن نه‌مانە و پرانیا کوردان ژی وێ ڕێبازا پیرۆز دزانن و دناسن. کار و خه‌باتێن بارزانیان ژ بۆنا گه‌لێ خوه کرننە ب زه‌لالی و ئاشکه‌ره‌یی تێ زانین.
چ ده‌ما بارزانی تێ ب ناڤکرن کار و خه‌باتێن ژ بۆنا ئازادیا کوردستانێ تێ بیرا مرۆڤان. هه‌ر وه‌ها ده‌ما مرۆڤ دبێژه کوردستان ژی یه‌ک سه‌ر بارزانی دکه‌ڤن بیرا مرۆڤ. ژ به‌ر کو د دیرۆکا بارزانیان ده سه‌ریهلدان و به‌رخوه‌دانا ژ بۆنا گه‌لێ کورد جهه‌کی تایبه‌تی دگره. دێ هه‌ر ئه‌ڤ تایبه‌تی هه‌تا کو جیهان هه‌به، دێ جهێ خوه د دلێ هه‌ر کورده‌کی ده بپارێزه.
له‌ورا ژی بارزانیان د دلێ هه‌موو کوردان ده جهه‌کی خوه یێ پیرۆز و ته‌یبه‌تی هه‌یه. ژ به‌ر ڤێ یه کو داگیرکه‌رێن وه‌لاتێ مه تم خوه‌ستنه کو وێ تایبه‌تمه‌ندیێ ژ دلێ کوردان ده‌رخن. ژ به‌ر ڤێ بوو کو وان شه‌ر و په‌ڤچوون ل هه‌مبه‌ر بارزانیان دکرن. گه‌له‌ک ژ وان کوشتن. هن ل سێدارێ خستن، هن د زنداناندا ڕێزاندن. و تالیا تالی ژی ب گشتی ۸۰۰۰ زلامێن وان ئه‌نفال کرن.
لێ دژمنان و هه‌ڤالبه‌ندێن وان چ جاران ژی نکاریبوون بارزانیان بقه‌دینن، ژناڤ ببن و بێده‌نگ بکن. لۆما ژی بارزانیان د هه‌ر ماله‌کا کوردان ده هێلنا خوه دانیبوون و د وێ هێلینێ ده ژ بۆنا دۆز و داوایا کوردان، ژ بۆنا ئازادیا کوردستانێ ده‌رسێن په‌روه‌ردەییێ ددان گه‌لێ خوه، هه‌ڤال، هۆگر و ئه‌ندامێن خوه. که‌سێن کو ئه‌و په‌روه‌رده‌یی دگرتن ب ڕووحیه‌تا خوه یا کوردانی دهه‌سیان و دژیان و شه‌رێ ژبۆ ئازادیا گه‌لێ خوه بێ ترس دکرن.
ژ به‌ر کو که‌سێن ب وێ ڕێبازێ مه‌زن ببن و ب وێ په‌روه‌رده‌ییێ بێنه په‌روه‌رده‌کرن، وێ گاڤێ ب ئاقلیه‌تا خوه، ب بیر و باوریێن کورده‌واری مه‌زن دبن. ژ بۆنا ڤێ یه کو بارزانیان تم ترس دخست دلێ داگیرکه‌ران لۆما ژی ئه‌و ژ داگیرکه‌ران و هه‌ڤالبه‌ندن وان ڕه بووبوون خه‌ته‌ر. ڤێ خه‌ته‌رێ هه‌تا کو باشوورێ کوردستانێ ئازاد بوو به‌رده‌وام کر…
بارزانی کی نه؟ بارزانی نه عه‌شیره‌که. ئه‌و ژ کۆنفه‌ده‌راسیۆنا پێنج عه‌شیران پێک هاتیه و بارزان ب خوه ژی ناڤێ گونده‌کی یه. بارزانی و بنه‌مالا بارزانیان کو شێخێن نه‌قشیبه‌ندی بوون و سه‌رۆکاتیا دینی و نه‌توه‌یی کرنه و ژ به‌ر عه‌داله‌ت و وه‌کهه‌ڤیا د ناڤا وان ده، عه‌شیرێن دن خوه دانه دۆرا وان و کۆنفه‌دراسیۆنه‌ک چێکرنه و ئه‌و کۆنفه‌ده‌راسیۆن ب ناڤێ بارزانیان تێ زانین.
له‌ورا ژی ده‌ڤه‌را بارزان ژ بۆنا بارزانیان و کوردان تم بوویه وه‌که سیوانه‌کێ کو هه‌موویان د بن وێ ده یه‌کیتیا خوه پێک ئانینه. ئه‌و ده‌ڤه‌ر بوویه وه‌که که‌له‌هه‌کا کوردپه‌روه‌ران کو تم نه‌رازیبوونا خوه ل دژ هه‌موو ڕژیمێن عیراقێ و هه‌موو داگیرکه‌ران دیار کری یه.
ده‌ما کو مرۆڤ بالا خوه دده دیرۆکێ، تێ دیتن کو داگیرکه‌رێن کوردستانێ یێن هه‌ر چار په‌رچان تم ژی ل گه‌ل هه‌ڤ و ب هه‌ڤره خوه‌ستنه ڤێ کۆنفه‌ده‌راسیۆنێ ئانگۆ بارزانیان ژ هۆلێ ڕاکن. ب تایبه‌تی سه‌دام خوه‌ستبوو ده‌ڤه‌را بارزان بێ ناڤ بکه و هه‌موو بارزانیان ژی ژ ویرێ کۆچه‌بار بکه، بکوژه، ئه‌نفال بکه. لۆما ژی سه‌دام باوه‌ر دکر کو ده‌ما ئه‌و بارزانیان بقه‌دینه وێ ته‌کۆشینا گه‌لێ کورد ژی ب داوی ببە. د ڤێ نه‌رینا خوه ده ب حه‌ق بوو. ژ به‌ر کو داخوازا بارزانیان و ب ته‌یبه‌تی یا نه‌مر بارزانی ئه‌و بوو کو وه‌لاتێ خوه ژ بن ده‌ستێ داگیرکه‌ران ئازاد بکه. لۆما ژی قه‌ت نه‌سه‌کنی، ته‌سلیم نه‌بوو، هه‌تا تالیا ژیانا خوه ژ بۆنا گه‌لێ خوه ژ بۆنا خه‌لکێ خوه د ناڤا ته‌کۆشینا ژ بۆنا ئازادیا وه‌لاتێ خوه ده کار و خزمه‌تا گه‌لێ خوه کر.
سه‌دام ب هێرسه‌که گه‌له‌ک مه‌زن خوه‌ست بارزانیان بقه‌دینه. ژ به‌ر ڤێ وی د 1983.07.31 ێ دا بریارا كۆمكوژیا بارزانیان دا و 8000 زلامێن بارزانیان ژ ناڤا مالباتێن وان ده‌رخستن و برن جهه‌کی نه دیار. لێ وی ب وێ کریارێ نه ته‌نێ 8000 بارزانی بناخ کر…
لۆما ژی دڤێ ئیرۆ ل سه‌رانسه‌رێ جهانێ هه‌موو کورد خوه‌دی ل وێ ته‌کۆشینا وان ده‌رکه‌ڤن. هه‌موو د دادگه‌ها عیراقێ ده ژ بۆنا ڤێ وه‌که بوویه‌ره‌که جینوسیدا بدن قه‌بوول کرن کار و خه‌باتێ بکن. دژمن چقاسی ژ بارزانیان عاجز بوون، دڤێ ئه‌م ژی ئه‌وقاسی ژ وان و ژ وێ ڕێبازا پیرۆز یا بارزانیێ نه‌مر حه‌ز بکن. حه‌زکرنا بارزانیان تێ واته‌یا خوه‌دی ل وه‌لاتێ خوه ده‌رکه‌تن. ژ به‌ر کو بارزانیێ نه‌مر ب ته‌قاندنا گوله‌یا ئیلۆنێ بێده‌نگیا کوردان و ترس وان ڕاکر و دا زانین کو وێ چ جاران کورد نه‌مرن، وێ هه‌ر بژین، هه‌تا کو وه‌لاتێ خوه ئازاد بکن.
بووبێ ئەسەر
2019.07.04
