سیاسی

بارزانی: جڤینا مە جڤینەك بەرھەمدار بوو

ل بەغدایێ سه‌رۆکێ هه‌رێما کوردستانێ نێچیرڤان بارزانی و سه‌رۆكێ فرانسایێ ئه‌مانوێل ماكرۆن جڤیان. پشتی جڤینێ نێچیرڤان بارزانی گۆت کو جڤینا وان جڤینەك بەرھەمدار بوو.
سەرۆكێ فرانسایێ رۆژا چوارشەمێ 2020.09.02، ب سەردانەكا فەرمی ھات بەغدایێ و ب تەنێ شەش دەمژمێران ل بەغدایێ ما، ژ بەر ھندێ دەمێ وی نەبوو سەردانا ھەولێرێ ژی بكە و سەرۆكێ ھەرێما كوردستانێ ڤەخواند بەغدایێ داكو ب ھەڤ را بجڤن.

نێچیرڤان بارزانی و ئه‌مانوێل ماكرۆن د جڤینێ دا پرسێن گرنگ و تایبه‌ت ب هه‌رێما کوردستانێ و فرانسایێ گۆتووبێژکرن.

نێچیرڤان بارزانی پشتی جڤینێ د تویته‌کێ دا‌ ڕاگهاند، “ئه‌ز ب دیتنا سه‌رۆک ئه‌مانه‌ئوێل ماكرۆن خوه‌شحال بووم. ئیرۆ ل به‌غدایێ مە جڤینه‌کا‌ به‌رهه‌مدار هه‌بوو. ئه‌م سپاسیا پشته‌ڤانیا به‌رده‌وم و په‌یوه‌ندیێن ب هێز یێن فرانسایێ و هه‌رێما کوردستانێ دکن. ب هێڤیا پێشخستن و بهێزترکرنا په‌یوه‌ندیێن مه‌ یێن ل گه‌ل فرانسایێ.”

د جڤینێ دا‌ ڕه‌وشا سیاسی یا عراق و هه‌رێما کوردستانێ، پرسگرێکێن د ناڤبه‌را هه‌ولێر و به‌غدایێ دا، په‌یوه‌ندیێن هه‌رێما کوردستانێ و فرانسایێ و داوی پێشهاتێن ھەرێمی هاتن گۆتووبێژکرن.

ل گۆر داخویانیا سەرۆكاتیا ھەرێما لكوردستانێ، سه‌رۆکێ فرانسایێ ئه‌مانوێل ماكرۆن په‌سنا ڕۆلا هه‌رێما کوردستانێ یا ل دژی ته‌رۆرێ دا و کێفخوه‌شیا خوه‌ ل هه‌مبه‌ر دیالۆگا د ناڤبه‌را هه‌ولێر و به‌غدایێ دا نیشان دا.

ماكرۆن د جڤینا د گه‌ل نێچیرڤان بارزانی دا پشته‌ڤانیا وه‌لاتێ خوه‌ ژ بۆ هه‌رێما کوردستانێ دووپات کر و تەئكید ل سه‌ر وێ یەكێ کر کو دڤێ پرسگرێکێن ھەولێر و بەغدایێ ل سه‌ر بنگه‌ها ده‌ستوورا عیراقێ بێن چاره‌سه‌رکرن.

‌ نێچیرڤان بارزانی ژ به‌ر پشته‌ڤانیا بۆ هه‌رێما کوردستانێ و ڕۆلا وی یا ژ بۆ چاره‌سه‌رکرنا پرسگرێکێن د ناڤبه‌را هه‌ولێر و به‌غدایێ دا‌ سپاسیا سه‌رۆکێ فرانسایێ ماكرۆن کر.

سه‌رۆکێ فرانسایێ د جڤینێ دا دیار کر کو ئه‌و دخوازه‌ د سه‌ردانا خوه‌ یا بھێت دا سه‌ردانا هه‌رێما کوردستانێ ژی بکه‌.

وەكە تێ زانین، ل بەغدایێ سەرۆكێ فرانسایێ ماكرۆن دو جاران دگەل سەرۆكێ ھەرێما كوردستانێ نێچیرڤان بارزانی جڤیایە، جڤینا وان یا یەكێ نیڤ دەمژمێرێ و جڤیان دویێ ژی دەمژمێرەكێ ڤەكێشایە

ئەرشیڤ
Back to top button