بارزانی: رەوشا مە ژ یا ئەفگانستانێ جودایە

پشتی ئەمه‌ریکایێ ده‌ست ب ڤه‌کشاندنا له‌شکه‌رێن خوه‌ ژ ئه‌فگانستانێ کری، گه‌له‌ک ئالیێن کوردی ل سه‌ر ڕه‌وشا کوردستانێ ژی داخوویانی دان. گه‌له‌ک که‌سان پرسا کو ئه‌گه‌ر ئەمه‌ریکا ژ ئیراقێ ڤه‌کشه‌ دێ ڕه‌وشا کوردان ژی وەكی رەوشا ئەفگانستانێ لێھێت.
لێ سه‌رۆک بارزانی د داخوویانیه‌کێ دا دبێژە كو جوداهیه‌کا زێده‌ د ناڤبه‌را ئه‌فگانستان و کوردستانێ دا هه‌یه‌. جوداهیه‌کا زێده‌ ژی د ناڤبه‌را پێشمه‌رگه‌ و ئارتێشا ئه‌فگانستانێ دا هه‌یه‌ و هه‌ر مله‌ته‌ک ئه‌گه‌ر پشتا خوه‌ ب خوه‌ و شیانێن خوه‌ گرێ نه‌ده‌ هه‌رده‌م ئه‌گه‌را گه‌ف و ژناڤچوونێ ژی ل سه‌ر هه‌یه‌.

داخوویانیا سه‌رۆک بارزانی:

ب ناڤێ خوه‌دایێ مه‌زن و دلۆڤان

پشتی بوویه‌رێن ئه‌فگانستانێ ئه‌ڤه‌ چه‌ند ڕۆژه‌که‌ ئارسته‌یه‌کا سیاسی و مه‌دیایی به‌ر ب دروستکرنا مه‌ترسیێ و بێهێڤیێ ل ناڤ خه‌لکێ کوردستانێ دا و ژ بۆ به‌رامبه‌رکرنا د ناڤبه‌را هه‌رێما کوردستان و ئه‌فگانستانێ دا کاردکن. د ڤی واری دا پێدڤیه‌ هه‌موو ئالیه‌ک باش بزانن کو هه‌ر مله‌ته‌ک ئه‌گه‌ر پشتا خوه‌ ب خوه‌ و شیانێن خوه‌ گرێ نه‌ده‌ هه‌رده‌م ئه‌گه‌را گه‌ف و ژناڤچوونێ ژی ل سه‌ر هه‌یه‌. پالپشتیا خه‌لکێ ژی وێ ده‌مێ بهایا خوه‌ هه‌یه‌ و ب باندۆر دبه‌ کو ئه‌م ب خوه‌ هه‌بین و ئیراده‌یا مه‌ هه‌به‌.

جووداهیه‌کا زێده‌ د ناڤبه‌را ئه‌فگانستان و کوردستانێ دا هه‌یه‌. جووداهیه‌کا زێده‌ ژی د ناڤبه‌را پێشمه‌رگه‌ و ئارتێشا ئه‌فگانستانێ دا هه‌یه‌. پێشمه‌رگه‌ زاده‌یێ دیرۆک و خوین و ڕۆندکێن گه‌لێ کوردستانه‌. خوه‌دیێ سه‌دان ده‌ستانێن دیرۆکی و قه‌هره‌مانیێ یه‌. میناکێن ده‌ستانا کۆرێ و تێکشکاندنا ئه‌فسانه‌یا داعیش و ده‌ستانێن پردێ و سحێلا کو نه‌یارێن کوردستانێ پلانا وێ یه‌کێ هه‌بوو ئیراده‌یا گه‌لێ کوردستانێ بشکینن، لێ به‌لێ پێشمه‌رگه‌ و گه‌لێ کوردستانێ ب خوه‌راگری و ئیراده‌یا پۆلایی پلانا نه‌یار و دژمنان هلوه‌شاند.

ل ڤێرێ دخوازم خه‌لکێ کوردستانێ ژ وێ یه‌کێ پشتراست بکم کو ڕه‌وشا کوردستانێ جووداهیه‌کا زێده‌ هه‌یه‌ ل گه‌ل هه‌موو جهێن دن. سپاس ژ بۆ خوه‌دایێ مه‌زن کو مه‌ پێشمه‌رگه‌ یێن قه‌هره‌مان و هێزا مه‌ هه‌یه‌ و ژ هه‌موویان ژی گرنگتر ئه‌م مله‌ته‌کین خوه‌دی ئیراده‌ و دۆزین. ئه‌گه‌ر دژمن و نه‌حه‌زان ژی خه‌یالا وان ھئه‌به‌ و خه‌لکێ کوردستانێ ئازار بدن، چو ده‌مه‌کی ئه‌و ب هێسانی ژ بۆ وان نه‌چوویه‌ سه‌ری و ب پشتراستیێ ڤه‌ د پاشه‌رۆژێ دا ژی ب هێسانی ژ بۆ وان ناچه‌ سه‌ر. هه‌ر که‌سه‌ک ژی بخوازه‌ بێهیڤیێ و خوه‌بکێمزانین و به‌راوردکرنێن نه‌ ل جھ د ناڤ خه‌لکی دا به‌لاڤ بکه‌ دیاره‌ هێشتا ژی ئه‌و که‌س نه‌کاریه‌ د ئیراده‌ و خوه‌راگریا گه‌لێ خوه‌ تێبگه‌هه‌.

مسعود بارزانی
۲۰۲۱.۰۸.۲۲