بارزانی: كەمال مەزھەر دیرۆكا كوردستان و دەڤەرێ راست كر
نێچیرڤان بارزانی سه‌رۆکێ هه‌رێما کوردستانێ،ل هه‌ولێرێ، ڕۆژا 2021.03.24ێ، به‌شداری د ڕێوره‌سما پێشوازیکرنا ته‌رمێ خوه‌دێژێرازی د. که‌مال مه‌زهه‌ر دیرۆكزانێ مەزنێ كورد دا کر و پەیڤەك پێشكەشی ئامەدبوویان كر..
نێچیرڤان بارزانی گۆت كو ئەڤ جەماوەرە ل ڤر جڤیایە ژ بۆ پێشوازیکرنا ته‌رمێ د. که‌مال مه‌زهه‌ر، ئه‌و دیرۆکنڤیسێ مه‌زنێ کو گه‌له‌ک لێکۆلینێن گرینگ و بهادار ل سه‌ر دیرۆکا گه‌لێ کورد و ناڤچه‌یێ نڤیسیه، ئەو ھەژی ڤێ پێشوازیێ یە و مافێ وی یە كو نھا و ل پاشه‌رۆژێ دا ژی ڕێز لێ بگرین.
سەرۆكێ ھەرێما كوردستانێ گۆت د. که‌مال مه‌زهه‌ر، د وارێ دیرۆکا کوردستان و ناڤچه‌یێ دا زانایه‌ک بوو ، زه‌همه‌ته‌کا زێده کێشا و که‌ده‌کا زێده دا داکو ڕاستیێن دیرۆکا کورد و کوردستان و ناڤچه‌یێ ب هه‌زاران به‌لگه‌نامه‌یان ده‌ربخه و ڕوودانان پێکڤه گرێبده و دیرۆکا کوردستانێ ڕه‌وشه‌ن بکه.
– ئه‌و مرۆڤێ که‌دکار و به‌رهه‌مدار ئیرۆ ئه‌م هه‌موو ژ بۆ ڕێزلێگرتنا وی ل ڤر جڤیانه، خوه‌دیێ ده‌هان لێکۆلین و په‌رتووکانه ل سه‌ر دیرۆکا کوردستانێ، سه‌رپه‌ره‌شتیا سه‌دان لێکۆلینێن ئاکاده‌می یێن د وارێ دیرۆکێ دا کریه، ل زانینگه‌هێن ئیراقێ ده‌رس و وانه دایه هه‌زاران خوه‌نده‌کاران.
بارزانی د پەیڤا خوە دا بەھسا شارەزاییا د. که‌مال مه‌زهه‌ر د دیرۆكێ دا كر و گۆت:
– د. كەمان مەزھەر دیرۆکنڤیسه‌که، هه‌رده‌م ژ بۆنا ساخکرنا په‌یوه‌ندیێن گه‌لان و میڵه‌تان ھەولدان كریە. وی دخوه‌ست وێ یەكێ بده خوویاکرن کو گه‌ل ب پێکڤه د ئاشتیێ دانه و کێشه‌یێن وان ل گه‌ل هه‌ڤدوو نینن، هنده‌ک حکوومه‌ت و سیاسه‌تێن شاش، کێشه‌یان ژ بۆ میله‌تان دروست دکن.
وه‌کی زانایه‌کێ کورد، وی دخوه‌ست دیرۆکێ وه‌کی واره‌کێ زانستی، بكە پره‌کا په‌یوه‌ندیان د ناڤبه‌را گه‌لێن ناڤچه‌یێ دا و رھوریشالێن پێکڤه‌ژیان و جیرانتیا ڤان گه‌لان بكە پیڤانا پێویستیا گەلان ب ھەڤدو ، نه‌کو ئه‌و ململانەتا سیاسی یا كو گه‌لێن ناڤچه‌یێ ژ هه‌ڤدو دوور دخە و ل هه‌ڤدو دكە دژمن.
نێچیرڤان بارزانی د پەیڤا خوە دا دیار كر كو د.كەمال مەزھەر لێدخەبتی كو دیرۆکا کوردستان و ئیراقێ ب ئاوایه‌کێ ئاکاده‌می زانستی بده خوویاکرن و خوه ژ ڤه‌گێرانا بێبنگه‌ھ و چاڤکانیێن نەباوەرپێكری بپارێزە و دیرۆکێ وه‌کی زانسته‌کا جهێ باوه‌ریێ ژ بۆ گەهشتنا ڕاستیا بوویەران بده خوویاکرن. “ئه‌ڤه ژی ده‌ستکه‌فته‌کا مه‌زنه ژ بۆ دیرۆکێ، پاشی ژ بۆ گه‌لان و نه‌ته‌وه‌یان هه‌تا کو خوه ژ بریارێن پێشوه‌خت بپارێزن و ڤه‌گۆتنێن ئاسایی نه‌کن پیڤه‌ر ژ بۆ حوکمدانا ل سه‌ر هه‌ڤدو دا.
کورد و گه‌لێ کوردستانێ ب گشتی د بن چه‌وساندنه‌کا پرئالی دا بوویه، د گه‌ل تێکدان و وێرانکرنا کوردستانێ دا، دیرۆکا کوردستانێ ژی گه‌له‌ک هاتیه شێواندن و وه‌ندا کرن. پێشمه‌رگه ب جان و ژیانا خوه، گه‌لێ کوردستانێ ژ نه‌مانێ پاراستیه، ڕه‌وشه‌نبیر و نڤیسکار و زانایێن کورد ژی، ژ بۆ پاراستنا زمان و کولتوورا کوردی و تۆمارکرن و ساخکرنا دیرۆکا کوردستانێ گەلەك دژواری و نه‌خوه‌شیه‌کا زێده دیتیە. ژ به‌ر ڤێ ژی ڕه‌وشه‌نبیر و نڤیسکارێن کورد کو ب پێنووس و په‌یڤان خزمه‌تا گه‌ل و وه‌لاتیان کریە هێژایی ڕێزگرتنه‌کا تایبه‌تینه.
– ڕه‌وشه‌نبیر و نڤیسکارێن کورد، د درێژاهیا دیرۆکا شۆره‌شێن کوردستانێ ب قەد سازی و ده‌زگه‌هێن گه‌له‌ک مه‌زنێن ده‌وله‌تی و نیشتمانی، ژ بۆ هشیارکرن و پاراستنا زمان و ڕه‌وشه‌نبیریا کورد دا ڕۆلا خوه دیتنه. ب ئیمكانێن گه‌له‌ک کێم ئەو یەك کریه، لێ به‌لێ ژ به‌ر کو دلسۆزی و باوه‌ری و شیانا وان گەلەك بوون، کارین وێ بکن. تەڤی هه‌موو ڕێگری و کێمبوونا ئیمكانا، هه‌رده‌م ته‌ڤگه‌را ڕه‌وشه‌نبیریا کوردستانێ چالاک و کتێبخانه‌یا کوردی ئاڤادان بوویه .
سەرۆكێ ھەرێما كوردستانێ گۆت كو، پشتی سالا 2003ێ د. که‌مال مه‌زهه‌ر گه‌له‌ک دخوه‌ست ل جیهه‌کێ ئارام ئاكنجی ببە و ل سەر لێکۆلینێ به‌رده‌وام بە، “ژ بۆ وێ یه‌کێ مه هه‌موو پشتگیری و ئاسانکاری ژ بۆ وی کرن هه‌تا کو ئه‌رشیف و کتێبخانه‌یا خوه یا ده‌وله‌مه‌ند بینه هه‌ولێرێ، لێ به‌لێ مخابن نه‌خوه‌شیا ده‌رفه‌ت نه‌دا کو هه‌موو وان داخواز و ئارمانجێن خوه ته‌مام بکه.
د ڕێوره‌سمێ دا نوونه‌رێن سه‌رۆکوه‌زیرێ ئیراقا فه‌ده‌رال و سه‌رۆککۆمار، وه‌زیرێ ڕه‌وشه‌نبیریا حکوومه‌تا هه‌رێما کوردستانێ، هه‌ڤژین و مالباتا خوه‌دێ ژێرازی د. که‌مال مه‌زهه‌ر و هه‌ژماره‌ک ژ نڤیسکار و ڕه‌وشه‌نبیر ئاماده بوون.
