سهرۆک بارزانی د پەیامەکێ دا، ل سەر ئێریشا سەر مالا سەرۆکێ هەرێما کوردستانێ، ڕاگەهاند، دڤێ چارهسهریهکا جددی و یهکجارهکی ژ بۆ وان ئێرتشان بێ دیتن. د ڕاستیێ دا، ئهڤ یهک ب شهرمهزارکرن، تهلهفۆن، پهیام و کۆمیتهیان چارهسهر نابه. دهستهلاتدارێن ئیراقێ دڤێ خوه زهلال بکن و ئان ڕاگەهینن کو نکارن ڕێ ل بهر وان کۆمێن دهرقانوونی بگرن، ئان ژی دڤێ ب جددی بێنه سهر ڕێ و دهولهتێ بپارێزن و ڕێکارێن جددی بگرن دا کو ئێدی ڕێ نهیێ دایین ئێریش و نهحەقی ل سهر ههرێما کوردستانێ بێن کرن.
سهرۆک بارزانی دیار کر کو ژ دهما کو شهر دهست پێ کریه هەتا نها ٥ جاران ئێرشی بارهگهها وی هاتیه کرن لێ وی دهنگێ خوه نهکر دا کو د ناڤ خهلکێ دا دلگرانی و هێرس چێنهبه.
پهیاما سهرۆک بارزانی
ب ناڤێ خوهدایێ مهزن و دلۆڤان
ههرێما کوردستانێ چو جاران نهبوویه بهشهک ژ وان کێشه و ئالۆزی و شهرێن کو ل ههرێمێ هەنە، لێ مخابن کۆمهک کهس ههنه کو بێیی کو کهسهک ڕێ ل بهر وان بگره، بالێ دکشینن سهر ڤێ یهکێ کو چاوا و ب چ ڕێیێ دژایهتییا ههرێما کوردستانێ بکن و ههر تم ب نهحهقی ئێریشی ههرێم و پێشمهرگه دکن و دبن گەف ل سهر ژیان و ئارامییا خهلکێ کوردستانێ.
د درێژاهیا سالێن بۆری دا ب دههان جاران ب زلم و بێ هێجهت، ب درۆن و مووشهکان ئێریشی ههرێما کوردستانێ و بارهگههێن پێشمهرگه کرنه و خهلکێ بێگونهه شههید و بریندار کرنه. ژ دهما کو ئهڤ شهر دهست پێ کریه زێدهترێ ٤٥۰ جاران ب مووشهک و درۆنان ئێریشی ههرێما کوردستانێ و بارهگههێن هێزێن پێشمهرگه یێن کوردستانێ کرنه. د ههمان دهمێ دا پێنج جاران ئێریشی بارهگهها مه کرنه، لێ مه بێدهنگی هلبژارت دا کو د ناڤ گهل دا خهمگینی و هێرس چێنهبه. دۆهی ژی (٢٨\٣\٢٠٢٦) ل باژارێ دهۆکێ ب درۆنێ ئێریشی مالا سهرۆکێ ههرێمێ کرن. مژار نه مالا کهسی ئان بارهگهها کهسی یه، ههر دهرێ کوردستانێ و ههر مالا کوردستانیان ل جهم مه خوهدی قیمهته.
ئهڤ جوره ئێریش شهرفرۆشیهکا ئاشکهره و زلمهکا مهزن و دهستدرێژی و نهحهقیهکا مهزنه ل ههمبهر ههرێما کوردستانێ و دڤێ چارهسهریهکا جددی و یهکجارهکی ژ بۆ وان بێ دیتن. د ڕاستیێ دا، ئهڤ یهک ب شهرمهزارکرن، تهلهفۆن، پهیام و کۆمیتهیان چارهسهر نابه. دهستهلاتدارێن ئیراقێ دڤێ خوه زهلال بکن و ئان ڕاگەهینن کو نکارن ڕێ ل بهر وان کۆمێن دهرقانوونی بگرن، ئان ژی دڤێ ب جددی بێنه سهر ڕێ و دهولهتێ بپارێزن و ڕێکارێن جددی بگرن دا کو ئێدی ڕێ نهیێ دایین ئێریش و نهحەقی ل سهر ههرێما کوردستانێ بێن کرن.
ل ڤر ئهم دوباره دکن، گهلێ کوردستانێ ب ئیرادهیهکا پۆلایین پاراستنا پهیاما خوه یا ئاشتیانه و دۆزا خوه یا ڕهوا دکه و چو گهف، ئێریش و دژمنهک نهکاریه و نکاره وێ ئیرادهیێ بشکینه.
مهسعوود بارزانی
۲۹ێ ئادارێ ۲۰۲٦
