سه‌رۆک بارزانی پێشوازی ل یانه‌یا دهۆکێ کر و ژ بۆ بده‌ستخستنا جاما که‌نداڤێ، پیرۆزباهی لێ کر و گۆت: “هوون دکارن دۆزا گه‌لێ خوه ژ سیاسه‌تێ زێده‌تر و باشتر ب جیهانێ بدن ناسین.”
سه‌رۆک مه‌سعود بارزانی رۆا ۱۷ێ نیسانێ ٢٠٢٥ێ پێشوازی ل ڕێڤه‌به‌ر، لیستکڤان و کارمه‌ندێن یانه‌یا وه‌رزشێ یا دهۆکێ کر.
د هه‌ڤدیتنێ دا کو پارێزگارێ دهۆکێ در. عه‌لی ته‌ته‌ر ژی ئاماده بوو، سه‌رۆک بارزانی ب گه‌رمی پێشوازی ل یانه‌یا دهۆکێ کر و ژ بۆ سه‌رکه‌تنا وێ د جاما که‌نداڤێ دا پیرۆزباهی ل وان کر و ده‌ستخوه‌شی ل لیستکڤان، کارمه‌ند، ڕێڤه‌به‌ر و هه‌موو که‌سێن کو د ڤێ سه‌رکه‌فتنا دیرۆکی دا ڕۆل لیستنه، کر.
سه‌رۆک بارزانی بال کشاند سه‌ر ڕۆلا وه‌رزش و وه‌رزشڤانان د ژیانا مله‌تان دا و گۆت: هوون دکارن دۆزا گه‌لێ خوه ژ سیاسه‌تێ زێده‌تر و باشتر ب جیهانێ بدن ناسین.
سه‌رۆک بارزانی پشتگریا خوه ژ بۆ یانه‌یا وه‌رزشێ یا دهۆکێ و هه‌موو وه‌رزشڤانێن کورد نیشان دا و ژ وان را سه‌رکه‌فتن و به‌رده‌وامی خواست.
د هه‌ڤدیتنێ دا، شاندەیا مێڤان سپاسیا پشتگریا سه‌رۆک بارزانیێ کر و ڕاگەهاند کو پشتگریا سه‌رۆک بارزانی ئیراده‌یا سه‌رکه‌فتن و وێره‌کیێ دایه وان و ئه‌و سه‌رکه‌فتن و کاسێ وه‌کی دیاریه‌کێ پێشکێشی سه‌رۆک بارزانی دکن.
