شۆره‌ش ئه‌و تشته کو ده‌ما هه‌وجه‌داریا گوهه‌راندنه‌کێ هه‌به پێک تێ. شۆره‌ش ئه‌و تشته کو ده‌ما مله‌تێ بنده‌ست بخوازە خوه ژ بنده‌ستیێ ئازاد بکه شۆره‌شێ دکه.
ب کورتی شۆره‌ش، نووژه‌نیه، ئازادی و سه‌ربه‌ستی یه. ژ به‌ر ڤێ یه کو پشتی داگیرکرنا کوردستانێ و بنده‌ستیا کوردان، کورد ژی قه‌ت ڤالا نه‌سه‌کینینه. ژ بۆنا کورد وه‌لاتێ خوه ئازاد بكن و گه‌لێ كورد ب سەربەستی بژیت، هه‌ر شۆره‌ش کرنه.
ده‌ما هه‌می شۆره‌شێن کوردان ب سه‌رنه‌کتین و پشتی هلوه‌شاندنا کۆمارا کوردستانێ ل مەهابادێ، ئێدی داگیركه‌رێن مه کێف کرن و باوه‌ر کرن دێ کورد ئێدی نکاربن سه‌ری هلدن. ژ به‌ر ڤێ ژی کێفا خوه ل گۆر دلێ خوه و ل گه‌ل هه‌ڤالبه‌ندێن خوه یێن کورد ب هه‌ڤره کرن.
وان کێفکرن و باوه‌ر کرن کو ئێدی کورد قه‌دیان. لێ بارزانیێ مه‌زن و نه‌مر، ژ بۆنا کورد ب ته‌مامی نه‌قه‌دن و نه‌بن کۆلێن داگیرکه‌ران. ئه‌و ل گه‌ل 512 پێشمێرگه‌یێن خوه به‌رب سۆڤیه‌تێ ڤه چوون دا کو ڕۆژه‌کێ ڤه‌گه‌رن و وێ کێفا داگیرکه‌ران د قرکا وان ده بهێله. هه‌ر وه‌ها ژی بوو…
مه‌سه‌له درێژە و ئه‌ڤ نه بابه‌تا نڤیسه‌کێ یه. له‌ورا ژی ئه‌ز ب کورتی ژ بۆنا وه ڕۆنی بکم کو بارزانیان هه‌تا نها چه‌ند شۆره‌ش کرنه.
هه‌گه‌ر هوون یا ڕاستی بخوازن من و گه‌له‌ک جانک و جامێرێن دن مه گه‌له‌ک جاران به‌حسا شۆره‌شه ئیلۆنێ کریه. ل گۆر من شۆره‌شا ئیلۆنێ ژ نوو دا زندیکرنا گه‌لێ کورد ب ڕوحیه‌ته‌کا نه‌ته‌وه‌یی بوو. شۆره‌شا ئیلۆنێ ئه‌و بێده‌نگیا کوردان و ترسا ل سه‌ر وان ڕاکر. شۆره‌شا ئیلۆنێ ژ نوودا باوه‌ریا کوردان ئانی کو دکارن ل هه‌مبه‌ر داگیرکه‌ران شه‌رێ ئازادیێ بكن و وه‌ها بوو.
پشتی ب سه‌رنه‌که‌تنا شۆره‌شا ئیلۆنێ و ده‌ستپکرنا شۆره‌شا گولانێ کورد فێربوون کو دکارن ده‌وله‌تا خوه دامه‌زرینن و ببن خوه‌دی ده‌وله‌تا خوه. ژ به‌ر کو شۆره‌شا گولانێ بوو سه‌ده‌ما دانینا هیمێن ده‌وله‌تبوونێ. هه‌ر ئه‌ڤ ژی وه‌ها بوو.
ب سایا وان هه‌ردو شۆره‌شان ئیرۆ ئه‌م ل باشوورێ کوردستانێ خوه‌دی ده‌وله‌تا خوه نه. دیسا ب سایا ڤان شۆره‌شانا ئه‌م دێ د نێزیك دا ببن ده‌وله‌ت.
هه‌تا ڤر ته‌مامه و ئه‌م کورد قه‌رزدارێ ڤان شۆره‌شانه کو د ناڤا ڤێ ته‌کۆشین و شۆره‌شان دا بارزانیێ مه‌زن کورد کرن خوه‌دیێ ڕێبازه‌کێ ئانگۆ خوودیێ فه‌لسه‌فه‌یه‌که کو ڕێیا ئازادی و سه‌رخوه‌بوونێ ب خوه ڕه دانی و ئەساسێ ده‌وله‌تبوونێ ژ نوودا دانی.
لێ من خوه‌ست پشتی ئازادیا باشوورێ کوردستانێ و هه‌تا نها گه‌لۆ چ شۆره‌ش پێک هاتن، چاوا پێک هاتن و ل سه‌ر ده‌ستێ کێ ئه‌ڤ هاتن کرن ژ بۆنا وه بێژم…
مه دیت و ئه‌م هه‌می ب هه‌ڤرا بوونه شاهدێ وێ یه‌کێ کو پشتی ئازادیا باشوور کوردستانێ (1991) ێ و هه‌تا نها هه‌می بارزانی تێدکۆشن کو بۆ مه کوردستانه‌کا سه‌ربخوه و ده‌وله‌ته‌کا کوردی ڕاگەهینن.
ئه‌ڤ کار ژی هێدی هێدی لێ ب گاڤێن ئەساسی هاتن ئاڤێتن. له‌ورا ب ده‌ستێن سه‌رۆکێ کوردستانێ ڕێزدار مه‌سعود بارزانی ژی چه‌ند شۆره‌ش پێک هاتن. من خوه‌ست ڤێ ژ بۆنا وه ژی ڤه‌کم دا کو ئه‌م کورد هێژایی، قیمه‌ت و ڕوومه‌تا بارزانیان بزانبن و ببینن کو هه‌می بارزانی ل گۆر ڕێبازا بارزانیێ نه‌مر و ل سه‌ر خه‌تا نه‌ته‌وه‌یی کارێ خوه کرنه و دکن.
بالا خوه بدەنێ. ل باکورێ کوردستانێ ناڤێ کوردستانێ قه‌ده‌خه بوو. ب گۆتنا وی ناڤێ پیرۆز که‌س دکاریبوون ب سالان د زێندانان دا بمینن. ژ بۆنا ئه‌ڤ کارەساتا خه‌راب ڕابه، ڕێزدار مه‌سعود بارزانی ب چووینا خوه یا باکورێ کوردستانێ سێ شۆره‌شێن گرینگ پێک ئانی:
ده‌ما سه‌رۆکۆمارێ کوردستانێ برێز مه‌سود بارزانی د سالا 2017 ێ د گه‌ل شڤان په‌روه‌ر چووبوو باکورێ کوردستانێ، ب وێ چووینا خوه وی شۆره‌شه‌ک ل باکورێ کوردستان و ل ترکیێ پێک ئانی بوو. ژ وێ ڕۆژێ و پێده ناڤێ کوردستانێ ئێدی ل تركیێ نه قه‌ده‌خه‌بوو ئانگۆ قه‌ده‌خه‌بوونا ل سه‌ر ناڤێ کوردستانێ هاته هلانین. ژ وێ ڕۆژێ پێ دا ئێدی د هه‌می تڤ یێن ترکان و ترکان ب خوه ژی دگۆتن: ”کوردستان”.ل گۆر من ئه‌ڤ شۆره‌شه‌کا مه‌زن بوو کو هاتبوو کرن. لێ خویا یه هه‌رکه‌سی ئه‌ڤ وه‌ها فێم نه‌کربوون. فێم نه‌کربوون کو ناڤێ کوردستانێ چاوا وه‌ها ل باکورێ کوردستانێ و ل ترکیێ ب ئازاد دهات گۆتن.
ها هن دکارن بێژن نها دیسا ناڤێ کوردستانێ قه‌ده‌خه کرنه. ڕاسته هه‌گه‌ر تو خوه‌دی ل شۆره‌شا خوه ده‌رنه‌که‌ڤی و ده‌ستکه‌تیێن خوه نه‌پارێزی وێ وه‌ها ببه.
دیسا ده‌ما جاره‌کا دن سه‌رۆکۆمارێ کوردستانێ برێز مه‌سعود بارزانی چوو بوو ترکیێ وێ ده‌مێ ژی ل بالافرگه‌ها ئاتاتورکی یا ل سته‌نبۆلێ ب ئاوایه‌کی فه‌رمی ئالا کوردستانێ هاتبوو هلکشاندن و دگه‌ل ئالا ترکان ل با دکه‌ت. ڤێ ژ مه ڕا ددا زانین کو ئێدی ترکان ناڤێ کوردستانێ و ئالا وان قه‌بوول کرنه. خویا یه ئه‌ڤ ژی زێده نه‌هات فێم کرنێ بێ ئه‌ڤ شۆره‌ش چاوا پێک هاتبوو.
شۆره‌شا دن یا مه‌زن کو برێز سه‌رۆکۆمارێ کوردستانێ مه‌سعود بارزانی پێک ئانی بوو، ئه‌و ژی ڕه‌فه‌راندووم ئانگۆ ڕاپرسینا 25 ئیلۆنا 2017 ێ بوو. ڤێ بریارێ وه‌کی ڕاکرنا بێده‌نگیا ل سه‌ر سه‌رێ کوردستانێ هه‌تا شۆره‌شا ئیلۆنێ (1947-1961) ێ کر. ڤێ ڕاپرسینێ پشتی کۆمارا کوردستانێ ل مه‌هابادێ کورد کر خوه‌دی ئیراده‌یا ده‌وله‌تا کوردی. ڤێ ڕاپرسینێ وه‌ها کر کو کورد ژ نوودا زیندی بوون، وان ژ نوو دا ڕوه گرت و مرۆڤ دکاره بێژه کو ژ نوودا و بێتر ل کوردبوونا خوه های بوون ئانگۆ ئه‌و ڕوحیه‌ت گرتن.
شۆره‌شا تالی کو ئه‌و ژی ب ده‌ستێ ڕێزدار سه‌رۆکۆمارێ کوردستانێ مه‌سعود بارزانی پێک هات ئه‌ڤ بوو.
باوه‌ر دكم ئێدی ئه‌ڤ شۆره‌شا تالی بوو کو پێک ئانی. ئه‌ڤ ژی ئه‌ڤه کو خوه‌ست و خست ژیانێ کو دڤێ ئێدی کوردستان ب ده‌ستێ، که‌سێن جوان، زیره‌ک و تێگهشتێ بێته ب ڕێڤه‌برنێ.
هه‌ر وه‌ها ڕێزدار ئه‌ڤ ژی خست ژیانێ و ڕێزدار نێچیرڤان بارزانی کر سه‌رۆکێ هه‌رێما کوردستانێ. ژ به‌ر کو ڕێزدار نێچیرڤان خوه‌دی ته‌جروبه‌یێن هێژا و زانینێن ده‌لاله. لۆما ئه‌و لایقێ ڤی ئه‌رکی هاته دیتن و پارله‌مه‌نا کوردستانێ ئه‌و ب پرانیا ده‌نگان وه‌که سه‌رۆکێ هه‌رێما کوردستانێ هلبژارت. هه‌لبه‌ت ئه‌ڤ ژی ل گۆر من شۆره‌شه‌ک بوو.
شۆره‌شا تالی ژی ڕێزدار مه‌سروور بارزانی ژ ته‌ره‌ف سه‌رۆکێ هه‌رێما کوردستانێ ڕێزدار نێچیرڤان بارزانی وه‌که سه‌رۆکوه‌زیرێ کوردستانێ هاته ده‌ستنیشانکرن و بوو ژی.
هه‌لبه‌ت ئەڤ هه‌می به‌رهه‌مێن وێ ڕێبازا پیرۆز یا بارزانیێ نه‌مره. لێ ئه‌و ڕێباز ژ ته‌ره‌ف ڕێزدار مه‌سعود بارزانی ڤه که‌ته ژیانێ. لۆما ژی که‌د و خه‌باتێن ڕێزدار مه‌سعود بارزانی گه‌له‌که. دڤێ کورد ڤێ ژ بیر نه‌کن.
ئێدی پێویستیا باشوورێ کوردتانێ ژ شۆره‌شان نه‌ما. تشتێن لازم ئه‌وه کو ئاڤادانا گه‌لێ خوه، ده‌مۆکراسیا ناڤا خوه ل گۆر ڕێبازا بارزانیێ نه‌مر پێک بینن.
بووبێ ئەسەر
2019.06.17
