بارزانی; ٤٤ سال ژ ئۆغرکرنێ و ٦۲ سال ژ شۆره‌شا ئیلۆنێ
کۆنێ ڕه‌ش
د ٤٤ سالیا کۆچکرنا بارزانیی یێ نه‌مر دا، ب من خوه‌شه ل ده‌ستپێکا شۆره‌شا ئیلۆنێ ڤه‌گه‌رم و ڤی رووپه‌لێ وندایی ژ وه را بینم زمان؛ د ۱۱ێ ئیلۆنا ۱۹٦۱ێ دا، ده‌ما کو شۆره‌شا ئیلۆنێ ب سه‌رۆکاتیا بارزانیی یێ نه‌مر ده‌ستپێ کر، به‌رپرسیارێن رژیما سووریێ د پارێزگه‌ها هه‌سه‌کێ دا ده‌ست ب جڤینێن پشتگریێ ژ بۆ ڕێژیما ئەبدولکه‌ریم قاسم، دژی شۆره‌شا بارزانی یێ نه‌مر کرن.. ده‌ستپێکێ، جڤینه‌ک ل گوندێ رمێلانا پێک ئانین و د وێ جڤینێ دا ژ شێخ ره‌شیدێ دێرشه‌وی خوه‌ستن کو گۆتنه‌کێ دژی شۆره‌شا بارزانی ببێژه.. شێخ وها ل وان ڤه‌گه‌راند:
”ئه‌ز دێ وه‌ک خوه‌دێ و پێخه‌مبه‌ر گۆتیه ببێژم؛ ئه‌گه‌ر دو به‌ش ژ مسلمانان شه‌رێ هه‌ڤ بکن، وان ل هه‌ڤ بینن، ئه‌گه‌ر یێ خورت و زالم، لهه‌ڤهاتنێ نه‌خوازه و زولما خوه نه‌سه‌کنینه، ل ره‌خ یێ مه‌زلووم بسه‌کنن. مه‌لا موسته‌فا نه هنکووفێ حکوومه‌تا ئیراقێ یه، ئه‌و یێ مه‌زلوومه..” و گه‌له‌ک جاران ژی ره‌شیدێ دێرشه‌وی د ناڤ مه‌لا، سۆفی و مریدێن خوه دا وها دگۆت: ”هه‌چی ل قه‌ومیا خوه نه‌پرسه، بلا ژ ئیمانا خوه بترسه”. هین ئه‌ڤ گۆتنا وی ل سه‌ر زارده‌ڤێ کاله‌مێرا یه.
هه‌روه‌ها د وان سالان دا، به‌رپرسیارێن رێژیمێ چوونه جه‌م شێخێ عه‌ره‌بێن ئێلا شه‌مه‌را و ژێ خوه‌ستنه کو د ناڤ عه‌شیرا خوه دا به‌لاڤ بکه کو سه‌رهلدانا بارزانی نه د رێکا مسلمانتیێ دا یه، پێویسته شه‌رێ وی بکن.. دبێژن؛ شێخێ شه‌مه‌را ل وان ڤه‌گه‌راندیه: ”حه‌یرا! ئه‌م و کورد جیرانن.. کێفا کوردان ژ بارزانی را تێ.. ئه‌م پێوه‌ندیێن خوه ب کوردان را خه‌را ناکن.. گه‌له‌ک رێژیمێن وه‌ک وه هاتنه و چوونه، ئه‌م کورد جیران مانه..”.
د سالا ۱۹٦٦ئان دا، گه‌له‌ک جاران حکوومه‌تا سووریێ زۆر ل شێخ عزه‌دینێ خزنه‌وی کریه کو به‌یاننامه‌یه‌کێ دژی مه‌لا موسته‌فا بارزانی به‌لاڤ بکه و تێده ببێژه؛ شۆره‌شا بارزانی د رێکا کوفرێ دا یه و دووری دینێ ئیسلامێ یه.. دبێژن؛ شێخ عززه‌دین ژی، قه‌بوول نه‌کریه.. رازی نه‌بوویه و وه‌ک وان نه‌کریه..
مێزه‌کن! رۆژا ئیرۆ، پشتی ٦۲ سالان ژ شۆره‌شا ئیلۆنێ، ب سه‌رۆکاتیا بارزانی یێ نه‌مر، بێ چاوا حکوومه‌تا هه‌رێما کوردستانێ، وه‌ک ده‌وله‌ته‌کا ئازاد و سه‌ربخوه، د ناڤ ده‌وله‌تێن دنیایێ دا، ب ئالیکاریا خوه ژ خه‌لکێن عه‌ردهه‌ژا ترکیێ و سووریێ را رادبه.. و د ده‌رحال دا ئالیکاریا (خێرخوازیا بارزانی)، د هاوارا باکوور و ل رۆژاڤایێ کوردستانێ هات شاندن.. بێ جودابوون، ئه‌و ئالیکاریا ئینسانی یا کو د بن ناڤێ بازانی یێ نه‌مر دا بوو ل ته‌ڤ خه‌لکێن ئه‌ردهه‌ژا ٦ێ سباتا ۲۰۲۳ئان، ژ کورد، ترک و عه‌ره‌ب هات به‌لاڤکرن.. خوه‌دێ! چه‌ندی بێهنا ته فره‌هه.. بارزانی یێ نه‌مر! چه‌ندی تو مه‌زن بوو.. گه‌لێ کوردستانێ! پیرۆز به ل مه ده‌وله‌تا کوردستانێ ل باشوورێ کوردستانێ.
کۆنێ ڕه‌ش
قامشلۆ ٢٠٢٣/٢/٢٨
