سەرۆك مەسعوود بارزانی د پەیامەكێ دا خه‌لکێ کوردستانێ پشتراست دکە کو شۆره‌ش و خه‌بات و قوربانیدانا وان ڤالا ناچە.
بارزانی د پەیامەكێ دا ب ھەلكەفتنا 44 سالیا شۆرەشا گولانێ رۆل و كەد و قوبانیدانا ھەموو تێكۆشەر و پێشمەرگەیێن مێرخاس بلند د نرخینە و دبێژە كو ئەو روومەتا گەلێ مە نە و بەشداریا وان د شۆرەشێ دا ژ بۆ گەلێ كوردستانێ دیرۆك تۆمار كر.
سەرۆك بارزانی د پەیاما خوە دا تەكیدێ ل سەر پێكڤەژیان و ئاشتیخوزیا گەلێ كوردستانێ دكە و خەلكێ كوردستانێ دلرەھەت و پشتراست دكە كو شۆرەش، خەبات و كەدا وان ڤالا ناچە.
په‌یاما سه‌رۆک بارزانی یا سالڤه‌گه‌را شۆره‌شا گولانێ
ب ناڤێ خوه‌دایێ مه‌زن و دلۆڤان
د سالڤه‌گه‌را شۆره‌شا گولانێ دا پێزانینێن من ژ بۆ رۆل، که‌د، کۆچبه‌ری و جانگۆریا وان هه‌موو تێکۆشه‌ر و پێشمه‌رگه‌یێن قه‌هره‌مان هه‌یه کو به‌شداری شۆره‌شا گولانێ بوون و دیرۆک و شانازی ژ بۆ گه‌لێ کوردستانێ دروست کرن. هه‌زار سلاڤ ل گیانێ پاکێ شه‌هیدێن شۆره‌شا گولان و هه‌موو شه‌هیدێن کوردستانێ بن.
شۆره‌شا گولانێ هلگرا په‌یام و ئارمانجێن شۆره‌شا مه‌زنا ئیلونێ بوو و یه‌ک ژ وان قۆناغێن گرنگێن به‌رخوه‌دانا پێشمه‌رگه و گه‌لێ کوردستانێ بوو و سه‌لماند کو ئه‌گه‌ر د قۆناغه‌کێ دا خه‌باتا گه‌لێ کوردستانێ تووشی ڕاوه‌ستان و شکه‌ستێ هاتبە لێ ئیراده‌یا تێکۆشینا گه‌لێ کوردستانێ چ ده‌مه‌کی ناشکێ و ب ڤین و هێزه‌کا نوو ڤه سه‌ریهلدده.
په‌یاما شۆره‌شا گولانێ کو د بیست و شه‌شێ گولانا ۱۹۷٦ دا هلپێکر، په‌یاما به‌رده‌وام و به‌رخوه‌دان و پێداگریێ ل مافێن ڕه‌وایێن گه‌لێ مه بوو و به‌رده‌وامیا شۆره‌شێن دن یێن گه‌لێ کوردستانێ بوو. به‌رهه‌مێ شۆره‌شا گولانێ یه‌کرێزیا هێز و ئالیێن گه‌لێ مه بوو ژ بۆ ڕاپه‌رین و فه‌ده‌رالی و پرئالی و هلبژارتن و دامه‌زراندنا سازی و دام وده‌زگه‌هێن هه‌رێما کوردستانێ کو هه‌ر هه‌موو ده‌ستکه‌فتێن گرانبهانه و ب خوین و ڕۆندکان پێکهاتنه.
د سالڤه‌گه‌را چل و چاره‌مین سالڤه‌گه‌را شۆره‌شا گولانێ دا ته‌که‌ز ل سه‌ر په‌یاما پێکڤه‌ژیان و ئاشتیخوازیا گه‌لێ کوردستانێ دکین و خه‌لکێ کوردستانێ ژی ل وێ یه‌کێ پشتراست دکین کو شۆره‌ش و خه‌بات و قوربانیدانا وان ڤالا ناچە.
مه‌سعوود بارزانی
2020.05.25
