بارزانی: ڕه‌وشا ل که‌رکووکێ هه‌یه چێنابه به‌رده‌وام به
سەرۆك مەسعوود بارزانی د پەیامەكێ دا بەحسا رەوشا كەركووكێ و چەوانیا چارەسەركرنا پرسگرێكان و نۆرمالیزەكرنا رەوشا كەركووكێ دكە.
بارزانی د پەیاما خوە دا دیار دكە كو رەشا كەركووكی نە ب تەنێ ئاریشەكا سیاسی یا ناڤبەرا دو پارتیان یان ژی مناقەشەیا ناڤبەرا چەند ئالیان دا یە و دبێژە “كێشەیا كەركووكێ پرسەك، دیرۆكی، سیاسی و كەڤنە…”
بارزانی دبێژە كو رەوشەك نە نۆرمال ب سەر كەركووكێ دا ھاتیە و پێویستە ئەو رەوش ژ ئالیێ سیاسی، ئەمنی و ئیداری ڤە بھێتە چارەسەر كرن و ژ بۆنا كو ئەو رەوش بھێتە چارەسەر كرن، پێویستە ئالیێن كوردی یەك دەنگ و یەك ھێز و یەكگرتی بن.
بارزانی د پەیما خوە دا تەئكیدێ ل سەر وێ یەكێ دكە كو كەركووكێ باژارەك كوردستانی یە و دڤێ كەكووكێ ببە میناكا پێكڤەژیانا ھەموو پێكھاتەیان.
تێكستا پەیاما سەرۆك بارزانی:
کێشه‌یا که‌رکووکێ ته‌نێ گرفتا سیاسی یا د ناڤبه‌را دو پارتی یان گه‌نگه‌شه‌یا سیاسی یا د ناڤبه‌را چه‌ند ئالیان دا نینه. د ڕاستیێ دا کێشه‌یا که‌رکووکێ بابه‌ته‌ک دیرۆکی، سیاسی و که‌ڤنه و د هه‌مان ده‌می دا ژی فره‌ھ ڕه‌هه‌ند و مه‌زنه.
ژ سه‌ده‌ما وێ ڕه‌وشا نه‌ئاسایی یا ب سه‌ر که‌رکووکێ دا هاتیه و ژ به‌ر پێویستیا ئاساییکرنا ڕه‌وشا ئه‌منی و ئیداری یا باژار و خزمه‌تکرنا خه‌لکێ که‌رکووکێ و هه‌روها چاره‌سه‌رکرنا کێشه‌یان ب گشتی، ئه‌م د گه‌ل وێ یه‌کێ نه کو ڕێکه‌فتن و یەكرەئی یا ئالیێن کوردان پێنگاڤەكا گرینگه. لێ به‌لێ د گه‌ل وێ ژی پێویسته کێشه‌یێن که‌رکووکێ، ب پارێزگار ڤه ژی، د ده‌ستپێکێ دا د ناڤبه‌را هه‌ولێر و بەغدایێ دا بێن یه‌کالیکرن و بێن چاره‌سه‌رکرن. هه‌ر ئه‌نجامه‌ک ژی کو هه‌بە دڤێ جهێ رازەمەندیا هه‌موو پێکهاتێن که‌رکووکێ بە.
نها ڕه‌وشه‌که ئه‌رێنی د په‌یوه‌ندیێن د ناڤبه‌را هه‌ولێر و بەغدایێ دا هاتیه هۆلێ و ئه‌ڤه ژی ده‌رفه‌ته‌ک گه‌له‌ک باشه کو ب سوودوه‌رگرتنا وێ ڕه‌وشا ئه‌رێنی گرفتێن ئه‌منی و ئیداریێن که‌رکووکێ ژی چاره‌سه‌ر ببن و د چارچۆڤه‌یا ده‌ستوورێ دا که‌رکووک ڤه‌گه‌ره سه‌ر ڕه‌وشا خوه یا ئاسایی. ژ به‌ر کو ئه‌و ڕه‌وشا نها ل که‌رکووکێ هه‌یه چێنابه به‌رده‌وام به.
نها و به‌رێ ژی ڕایا مه وها بوویه کو ئه‌م ل سه‌ر کوردستانیبوونا ناسنامه‌یا که‌رکووکێ پاشڤه‌کێشیێ ناکن و دڤێ که‌رکووک ببه میناکا پێکڤه‌ژیانا نه‌ته‌وه‌یی و ئۆلی و هه‌موو پێکهات بکارن ب ئاشتی و برایه‌تی و ته‌بایی ل که‌رکووکێ د گه‌ل هه‌ڤدوو بژین.
مه‌سعوود بارزانی
2019.07،13
