بارزانی دبێژە كو یێ كو ل سەر قادا جەنگێ، ل سەر ئەردی و ل بەرەیێن شەری ب خوین و قوربانیدانا خوە كوردستان ژ ئێریشێن داعشێ پاراستی، ھێزێن پێشمەرگەیێ كوردستانێ بوو.
سەرۆك مەسعود بارزانی د پەیامەكێ دا دبێژە كو ئەڤە ھەیامەكە ل ھندەك ناڤەندێن مەدیایێ و یێن سیاسی بەحسا تێكشكاندنا رێخستنا داعشێ تێ كرن و رۆلا مێرخاسانەیا پێشمەرگەیێ كوردستانێ د وێ شەری دا ل بەر چاڤان ناھێت گرتن.
سەرۆك بارزانی دبێژە كو شەرێ دژی داعشێ شەرەكێ ب ساناھێ نەبوو، شەرەكێ بەرفرەھ و پرئالی و پێویست ب ھەڤئاھەنگی و كارێ ھەڤبەش ھەبوو.
تێكستا پەیاما سەرۆك بارزانی:
ب ناڤێ خوه‌دایێ مه‌زن و دلۆڤان
ئه‌ڤە ده‌مه‌که ل هنده‌ک ناڤه‌ندێن ڕاگەهاندن و یێن سیاسی دا به‌حسا شه‌رێ داعشێ دھێتە كرن. ل ڤێرێ ڕاستیه‌ک هه‌یه نابە مرۆڤ چاڤێ خوە ل سەر بگرە، داعش دیارده‌یه‌که کو دژمنێ تەڤایا مرۆڤایه‌تیێ یه و شه‌رکرنا ل دژی داعشێ شه‌ره‌کێ ب ساناھی نینه ژ به‌ر کو به‌ره‌یه‌ک به‌رفره‌ھ و گەلەك ئالیە و ئالیه‌ک ژی ب ته‌نێ نکارە داعشێ تێکبشکینە. ژ بۆ بنبركرنا داعشێ هه‌ماهه‌نگی و کارێ هه‌ڤبه‌ش د ناڤبەرا هه‌موو ئالیان و جڤاکا ناڤده‌وله‌تی دا پێویسته.
د ده‌ما خوه دا، د دەما شه‌رێ ل دژی داعشێ دا، مه سپاسیا هه‌ڤپه‌یمانان و ئەمریکایێ کر کو ئالیكاریا هێزێن پێشمه‌رگه‌یێن کوردستانێ كرنە. مە سپاسیا وان هه‌موو ئالیان ژی کر یێن کو ب ئاوایەكی د شه‌رێ دژی داعشێ دا به‌شداربوونه و ئالیكاریا پێشمه‌رگه‌یان كرنە. لێ به‌لێ تەڤێ ڤێ یەكێ ژی پێویسته ھەر ئالیه‌ک وێ یەكێ بزانە یێ كو ل سه‌ر قادا ڕاستیێ ب خوین و قوربانیدانا خوه، کوردستان ژ ئێریشا داعشێ پاراستی، هێزێن پێشمه‌رگه‌یێن کوردستانێ بوون. چ که‌س و ئالیه‌ک نکارە وێ ڕاستیێ ڤه‌شه‌رە کو ئه‌فسانه‌یا داعشێ ل سه‌ر ده‌ستێ گه‌ده‌یێن قه‌هره‌مانێن گه‌لێ کوردستانێ هاته تێکشکاندن.
مه‌سعود بارزانی
2021.01.27
