داعش و کۆچبەر ئالاڤێن بازرگانیکرنا ترکیانە!
ل سەردەمێ ئەردوگانی تورکیا بوویە مۆڵا باسکێ ئیسلاما سیاسی ب هەردوو باسکێن میانڕەو و توندڕەو ڤە. هەرچەندە و پشتی ئیخوان ژ لایێ پڕانیا وەڵاتێن رۆژئاڤایی و ئەمریکایی‌ڤە کریە د خانا تیرۆرێ دا، تورکیا پیچەکێ ب ژیرانەتر سەرەدەریێ دگەل تەڤایا باسکێن ئیسلاما سیاسی دکەت.
ل دەف تورکیا، ب تایبەت ل دەف ئەردوگانی، ئیسلام و باسکێ ئیسلاما سیاسی تنێ بازارپێکرنە و ژ بۆ قاییمکرنا پێگەهێ خوە ل ناڤ تورکیا و جیهانا ئیسلامی دا وەک کارتەک فشارێ ل دژی ئێکەتیا ئەورۆپایێ بکار بینیت.
ئەڤ سیاسەتا “بانەکە و دوو هەوا” ئەردوگانی د پرسگرێکا سوریێ دا ب شەهرەزایی پەیادەکریە و ل ئاریشەیا ئاوارەیان مەزنترین بازار پێکریە و دەستکەفتنێن ئابووری بدەستڤە ئینانە.
هەلبەت ئەڤ یاریا قرێژا ئەردوگانی هەتا دوماهیکێ بۆ نەچوو سەر بەلکو ب رێکا دەزگەهێن رۆژنامەڤانی، ب تایبەت یێن تورکیایێ، دوروویی و هەڤکاریا وی ژ بۆ باسکێ ئیسلاما توندڕەو و ب تایبەت جەماعەتێن قاعیدە و بەرەیێ نوسرە و داعشێ دیارکرن کانێ چەوان ب رێکا کاروانێن هاریکاریا خەلکێ سڤیلێ سوریێ چەک و جبەخانە دگەهاندنە تەرۆریستان.
دیاربوونا هەڤکاریا ئەردوگانی ژ بۆ تەرۆریستێن ئیسلامی ل سوریێ و بازرگانیا کەسێن نێزیکی وی دگەل تەرۆریستێن داعشێ (پرسا کڕین و فروتنا پەترولێ)، رژێما ئەردوگانی نەچار کر ب ئاوایەکێ ڤەشارتی بەردەوامیێ ب هاریکاریێ بدەت. پشتی زانی ئێدی بازرگانیکرن ب کێشا تەروریستێن ئیسلامی بێ باج دەرباز نابیت (کێشا وی دگەل هەڤپەیمانیا دژی داعشێ) ئەڤجا بەرێ خوە دا کۆچبەران و کشی ئەورۆپایێ کرن و هەتا ئەڤرۆ ژی ل سەر ڤێ چەندێ یێ بەردەوامە، لێ وەکو دبێژن سحر ب سەر ساحری دا هاتە خار و ریسێ وی ب ئێکگرتیا هەلویستێ ئەورۆپا و ئەمریکایێ بووڤە هری و دەست ژ پیا درێزتر ما ل سەر رویشێن بەڕێ (بەڕکێ) و بوویە قاژەقاژا وی بەرامبەری کێشا سوریێ و کو بێ دەستکەفت یێ ژێ دهێتە دوورخستن!
ئەردوگان نە ژوان کەسانە بێهڤی ببیت و ئەگەرێن ڤێ چەندێ ژی ئەوە پێگەهێ جوگرافی و نێزیکیا ئەورۆپایێ و پشتەڤانیا ئەلمانیایێ یا مسوگەر (پشتەڤانیا ئەلمانیایێ بۆ تورکیایێ ئەگەرێن وی د ئابوورینە و تورکیا وەک کولۆنیالەکا بازراگنیا ئەلمانیایێ یە و هەر بۆ زانین پتر ژ ٦٥٠٠ کارگەهێن بەرهەمئینانێ یێن ئەلمانی ل تورکیایێ هەنە ژبلی بۆرس و ئوتۆبان و کەرتێ گەشتوگوزارێ هەموو د دەستێن کۆمپانیێن ئەلمانیان دانە) دەست ب یاریەکا دن کرەڤە، هەر یاریا بەرێ پرسا داعش و کۆچبەران.
نوکە بەرێ کۆچبەران دایە بێلاروسیایێ و تەڤ ب رێکا تورکیا و کۆمپانیێن تورکیایێ گەهشتنە بێلاروسیایێ و ئێکەتیا ئەورۆپایێ ژی ئەڤێ چەندێ باش دزانیت، لەوا پرسا بەردانا سەلاحەدین دەمیرتاش و عەدنان کافالا ئینایە رۆژەڤێ و ئەگەر نەهێنە بەردان، گەفا لیستەکا دن یا عەمبارگۆیان ل بەندا ئەردوگانی نە، ژ بلی وەرنەگرتنا کۆچبەرێن ل سەر سنوورێ پۆلەندا، ئێدی چەکێ بکارئانینا کۆچبەرا ژ دەستێ ئەردوگانی هاتیە دەر و تەنێ باسکێ ئیسلاما توندڕەو یا دروستر تەرۆریست د دەستێ وی دا مایە.
لڤینێن داعشێ ل سوریێ و ل عێراقێ بڤی رەنگێ نوکە هاتیەڤە سەر دەپێ روودانان، ب هاریکاریا تورکیایێ یە.
ئەگەر ل دەڤەرێن داعش جارەکا دی لێ پەیدابووی مێزە بکەین دێ بینین هەموو دنێزکی بنگەهێن لەشکەرێ تورکیایێ نە ئانکو تورکیا وان دلڤینیت. ب تایبەت پشتی ژ هێرشکرنا سەر رۆژئاڤایێ کوردستانێ بێهیڤی بووی کو گۆلۆپا کەسکا روسیا و ئەمریکایێ بدەستڤە بینیت، لەوا ئەڤرۆ ل هەرێما کوردستانێ (دەڤەرێن نێزیکی ئوردیگەهێ لەشکەرێ تورکیایێ ل باشیکێ) داعش پەیدابوویەڤە و جهێ خوەپاراستنا وان د ستۆیێ هێزێن تورکیایێ دایە. هندی ئوردیگەهێن لەشکەرێ تورکیایێ ل کوردستانێ و عێراق و سوریێ بن، داعش و دەستەخویشکێن وێ دێ هەر هەبن و بەردەوام بن.
ل ڤێرە پرسەک ئاراستەی هەڤپەیمانیا ناڤدەولەتیا دژی داعش دبیت، هەتا کەنگی دێ بیاڤێ یاریکرنا ئەردوگانی ب باسکێ ئیسلاما سیاسی و داعش هێتە دان؟
ب ئێکگرتنا هەلویستێ ئێکەتیا ئەورۆپایێ د پرسا کۆچبەران دا مەودایێ یاریکرنا ئەردوگانی هشک کرن و بن گۆر کرن. بێدەنگیا هەلویستێ هەڤپەیمانیا دژی داعشێ ب تایبەت ئەمریکایێ بەرامبەری نەقۆلەیێن تورکیا ئەردوگانی، سیناریۆیەکا جەهننەمی خوە ل پشت ڤەدشێریت کو تایبەتە ب بەردەوامیدان ب رەوشا ئاورتەیا دەڤەرێ و هەر بمینیت ب کێشێن ناڤخویی ڤە و دا هەر دەڤەر بمینیت بازارەکێ مسۆگەرێ یێن کاڵایێن وان و دەڤەر بمینیت دووری ئارامبوون و کەفتنا سەر سککێ شاریستانیبوونێ. ئەگەر ئەڤە نە سیناریۆیەکا نەخشەکری بیت، بۆچی جارەکی دی داعش ب ڤێ هێزێ دیاربووڤە ؟
٥-١٢-٢٠٢١
