پارێزگارێ هه‌ولێرێ، فه‌رسه‌ت سۆفی، پشتی پێکەتنا ب ڤیرۆسا کۆرۆنایێ (كۆڤید-19)، رۆژا چوارشه‌مێ 2020.11.18 ل دەرڤەیی وەلاتی کۆچاداوی کر. بریارە تەمێ وی رۆژا پێنجشەمێ 2020.11.19 بگەھە ھەولێرێ.
ل گۆر ئاگاھیێن ل بەر دەستن، پارێزگارێ هه‌ولێرێ رۆژا 20 جۆتمه‌ها 2020ێ ب ڤیرۆسا كۆرۆنایێ كه‌تبوو و پشتی كو تەندروستیا وی گەلەك تێكچووی و خه‌ته‌ری كه‌تیە سه‌ر ژیانا وی، ژ بۆ چارەسەریێ بۆ ده‌رڤه‌یی كوردستانێ هاتبوو شاندن.
پشتی به‌لاڤبوونا نووچه‌یا كۆچاداویێ یا پارێزگارێ ھەولێر، فه‌رسه‌ت سۆفی، ھەرێما كوردستانێ ب ھەموو تەخێن جڤاكی ڤە؛ كه‌ساتیێن سیاسی، رۆشه‌نبیر، نڤیسكار و رێخستنێن جودا-جودا ب پەیامان خه‌مگینییا خوه نیشان دان.
فرسه‌ت سۆفی سالا 1978 ێ ل قه‌زایا چۆمانێ یا سه‌ر ب پارێزگه‌ها هه‌ولێرێ ڤه ژ دایک بووبوو و د مه‌ها ئیلۆنا 2019ێ دا وه‌که پارێزگارێ هه‌ولێرێ هاتبوو ده‌ستنیشانکرن.
سه‌رۆک بارزانی ژ به‌ر کۆچا داوی یا پارێزگارێ هه‌ولێرێ، در. فرسه‌ت سۆفی په‌یامه‌ک به‌لاڤ کر.
سەرۆك بارزانی دبێژه: “د. فرسه‌ت سۆفی میناکه‌ک ژ ژێهاتیبوونێ، دلسۆزی و ده‌ستپاکیێ و کادرۆیه‌کی نشتمانپه‌روه‌ر و چالاک بوو د ده‌مه‌که کێم دا کاری خوه ئیسبات بکه و د ناڤا دلێ گه‌ل دا جهێ خوه به‌که.”
سه‌رۆکێ هه‌رێما کوردستانێ، نێچیرڤان بارزانی د په‌یامه‌کا سه‌رساخیێ دا ژ بۆ مالباتا فرسه‌ت سۆفی، ژ دل ڤه خه‌مگێنیا خوه دیار دكە و دبێژه، “د. فرسه‌ت سۆفی هه‌ر ژ ده‌ستپێکا ته‌مه‌نێ خوه ڤه ڕۆله‌که گرنگ د ناڤ ڕه‌فێن یه‌کیتیا قۆتابیێن کوردستانێ دا گێرا، پاشێ ژی وه‌که کادرۆیه‌کی پێشکه‌تی د وارێ کارێ جڤاكێی دا خوه‌دان ڕۆل بوو، هه‌روها وه‌ک پارلامه‌نته‌ره‌کی چالاک و یاسازانه‌کی ژێهاتی ڕۆله‌کا به‌رب چاڤ د پارلامه‌نتۆیا کوردستانێ دا هه‌بوو. شاره‌زایی، ده‌ستپاکی، نشتمانپه‌روه‌ری و دلسۆزیا د. فرسه‌ت ئه‌و کربوو که‌سه‌کی خوه‌شتڤی و جه‌ماوه‌ری.”
نێچیرڤان بارزانی هه‌روها دبێژه: “پشتی وه‌رگرتنا پۆستا پارێزگارێ هه‌ولێرێ، گەلەك ب دلسۆزی ژ پرسگرێکێن خه‌لکێ دپرسی. گه‌له‌ک پرۆژه‌یێن وی یێن مه‌زن هه‌بوون ژ بۆ زێده‌تر پێشخستنا باژارێ هه‌ولێرێ و هه‌موو ناڤچه‌یێن پارێزگه‌ها ھەولێرێ، مخابن مرنێ ڕێ نه‌دا کو وپتر خزمه‌تا هه‌ولێر و کوردستانێ بکه.”
سه‌رۆکوه‌زیرێ هه‌رێما کوردستانێ، مه‌سروور بارزانی ژی په‌یامه‌کا سه‌رساخیێ به‌لاڤ کر و تێدا دبێژە: “د. فرسه‌ت که‌سه‌کێ نشتمانپه‌روه‌ر، دلسۆز و ژێهاتی بوو و هه‌موو ژیان و ته‌مه‌نێ خوه د خزمه‌تکرنا نشتمان و خه‌لکێ دا ده‌رباس کر.”
مه‌سروور بارزانی هه‌روها دبێژه: “ژ نێزیک ڤه ئاگاهداری دلسۆزی، خه‌مخۆری و ژێهاتیبوونا وی بوون د خزمه‌تکرنا خه‌لکێ هه‌ولێرێ و هه‌رێما کوردستانێ دا، له‌وما کۆچکرنا وی گه‌له‌ک ئه‌ز خه‌مگین کرم و زراره‌کا مه‌زنه ژی ژ بۆ حکوومه‌تا هه‌رێما کوردستانێ.”
جیگرێ سه‌رۆکوه‌زیرێ کوردستانێ، قوباد تاله‌بانی ژی د په‌یامه‌کێ دا دیار کركو که‌ک فرسه‌ت ژ سه‌رکرداتیا پەدەکێ بوو، پارێزگارێ هه‌ولێرێ بوو، لێ نه ته‌نێ یێ هه‌ولێر و پارتیا ده‌مۆرکاتا کوردستانێ، لێ یێ مه ته‌ڤان بوو و ئەو ژ ده‌ست مه ته‌ڤان چوو.
قوباد تاله‌بانی دبێژە: “فرسه‌ت سۆفی هه‌رتم د خه‌ما یه‌کرێزیا سیاسی یا کوردستانێ دا بوو. ڕۆلا وی د هه‌موو ڕێکه‌فتن و پێنگاڤێن وان چه‌ند سالێن داویێ دا، یێن ژ بۆ ئارامی و تەناھیا ناڤبه‌را یەنەکێ و پەدەکێ ھەبوو.”
فرسه‌ت سۆفی د چەند رێزان دا:
د یاسایا گشتی دا باوه‌رنامه‌یا دۆکتۆرایێ هه‌بوو.
مامۆستایێ زانینگه‌ها پۆلیته‌کنیکا هه‌ولێرێ بوو.
ئه‌ندامێ خوولا چواره‌م یا پارلەمه‌نتۆیا کوردستانێ بوو.
ئه‌ندامێ ده‌سته‌یا ڕاوێژکاریا یاسایی ل سه‌رۆکاتیا هه‌رێما کوردستانێ بوو.
ئه‌ندامێ کۆمیته‌یا نڤیسینا ده‌ستوورا هه‌رێما کوردستانێ بوو.
ئه‌ندامێ کۆمیته‌یا بلند یا چاکسازیێ بوو.
سه‌رۆکێ کۆمیته‌یا ده‌مکی یا پەیرەوا ناڤخوه یا پارلەمه‌نتۆیا کوردستانێ بوو.
