نڤیسین: ئاشتى فەتحى بێسفكى
سەرەدانا، سەزاى تەمەللى، هەڤسەروكێ پارتیا دەمۆكراتیك یا گەلان (هەدەپە) و شاندەیا دگەل دا ل 8 ێ ئیلونا سالا 2019 ێ بو هەرێما كوردستانێ و كومبونا دگەل سەركردێ كورد مسعود بارزانى، سەرۆكێ هەرێما كوردستانێ نێچيرڤان بارزانى و سەرۆكوەزيرێ هەرێما كوردستانێ (مەسرور بارزانى) ل هەولێرا پايتەخت بو گفتوگوكرن ل سەر چەندين پرسگرێكێن جودا جودا يێن گرێداى رەوشا كوردان، ژ بۆ گەلێ كورد ل باكوورێ كوردستانێ ئومێدەك نوو یە.
ئەڤ سەرەدانە دهێتە هژمارتن ئێكەمين سەرەدانا شاندێ هەدەپێ پشتى پێكئانینا حكومەتا نوو يا هەرێما كوردستانێ، ئارمانجا شاندێ هەدەپێ ڤەدگەريتەڤە بو سێ ئارمانجان:
ئارمانجا ئێكێ: پيرۆزباهيكرن ل سەرۆكێ هەرێما كوردستانێ و سەرۆكوەزيرێ هەرێما كوردستانێ و سەروكاتيا پەرلەمانێ كوردستانێ.
ئارمانجا دووێ: چەوانيا دروستكرنا ئێكەتيا كوردان ل هەر چار پارچێن كوردستانێ كو باشوور ب ئەڤى ئەركێ مەزن رولێ خوە بگێرە.
ئارمانجا سيێ: داخازا پشتەڤانيا كوردێن باشوور ژ بو كوردێن باكوور د ڤەگەراندنا قوناغا ئاشتيێ ل باكوورێ كوردستانێ.
د كومبونا شاندێ هەدەپێ د گەل سەرۆكێ هەرێما كوردستانێ نێچيرڤان بارزانى، مژارا قوناغا ئاشتيێ هاتە باسكرن، سەرۆكێ هەرێما كوردستانێ دا دياركرن كو نوھا دەما ئاشتيێ يە و پرسگرێكا كوردان پێدڤيە ب رێكا ئاشتيێ بهێتە چارەسەركرن، شەر چ ئاريشەيان چارەسەر ناكە و نابە چ دەرفەتێن ئاشتيێ ل توركيا بهێنە ژ دەست دان.
سەرۆكێ ھەرێما كوردستانێ گۆت:” ژ بو دەستپێكرن و سەرئێخستنا پرۆسەيا ئاشتيێ ل توركيا و باكوورێ كوردستانێ دێ بەردەوام د ناڤ ھەولدانا دا بین و هەر چ ژ دەستێ مە بهێت دێ ئەنجام دەين”.
ل ڤێرێ بو مە ديار دبە كو رولێ سەرۆكێ هەرێما كوردستانێ نێچيرڤان بارزانى، وەك سەركردەكێ گرنگ ل ناوچەیێ، د چەسپاندنا ئاشتيێ ل تەڤايا ناوچێ رولەكێ ئێكجار مەزنە. لەورا ئەڤ چەندە بويە ئەگەر كو گەلێ كورد ل باكوور داخازا دەستپێشخەريا ئاشتيێ ل سەروكێ هەرێما كوردستانێ نێچيرڤان بارزانى بكە، د باوەريەكا مەزن دانە كو دێ قوناغا ئاشتيێ ب پشتەڤانيا سەروكێ هەرێما كوردستانێ هێتە دەست پێ كرن.
