نڤیسار

براتیا كورد و تركان

هن ده‌ردۆر هه‌ر ڕۆژ د ناڤا گۆتنێن خوه‌ دا بەحسا مژارا براتیا کورد و ترکان دكن و وێ دپارێزن. گه‌لۆ ئه‌ڤ مژار حه‌ق دکه‌ کو مرۆڤ ئەو قاس ل سه‌ر ڕاوه‌سته‌ ؟

تێ زانین کو د ڕۆژێن بوری دا سێ سه‌رۆکێن شاره‌داریێن مه‌زن، ئامه‌د، وان و مێردین، ژ کار هاتن گرتن. ئه‌و ب هلبژارتنان هاتبوون ده‌ستنیشانکرن و ب میلیۆنان که‌سان ده‌نگێ خوه‌ دابوون وان. لێ به‌لێ ده‌ستهلاتداریا ئاکەپێ هه‌بوونا وان ته‌حه‌مول نه‌کر، ب بریارا وه‌زیرێ کارێ ده‌رڤه‌ ئه‌و ژ شاره‌داریان هاتن دوورخستن و که‌سێن کو تێكەلیا وان ب شاره‌داریان نینە وه‌که‌ سه‌رۆکێن هه‌مان شاره‌داریان هاتن وه‌زیفه‌دارکرن. چه‌ندی گرسه‌یێن گه‌ل ڤێ ڕه‌وشێ قه‌بوول نه‌کن و ب ڕۆژان پرۆته‌ستۆیان دکن ژی ڕایه‌دارێن ده‌وله‌تا ترک که‌ر و کۆرن، نه‌ تشته‌کێ دبهیسن نه‌ ژی دبینن. ووسا دخوویێ کو وێ ئه‌ڤ بێدادی و نه‌حه‌قی بەردوام بە.

د ئالیه‌کێ دا ژی، ئەڤ چەند ھەیڤەكە، ده‌وله‌تا ترک هه‌ول دده‌ کو بکه‌ڤه‌ هه‌موو ڕۆژاڤایێ كوردستانێ و هه‌مان هه‌رێمێ بکه‌ بن ده‌ستێ خوه‌. لێ به‌لێ هێزا ئه‌مه‌ریکا ده‌ستوورێ ژ تركیا را نادە، ئه‌و نکاره‌ ب ئاوایه‌کێ ئازاد ڤێ داخوازا خوه‌ بینه‌ جھ. له‌ورا ده‌وله‌تا ترک هه‌ول دده‌ کو ب فتنه‌ و فه‌سادیان ژ خوه‌ ڕا ده‌رفه‌ته‌کێ بئافرینه‌ کو بکه‌ڤه‌ ڕۆژاڤا. چما ده‌وله‌تا ترک ئەڤ قاس ژ ڕۆژاڤا عاجزه‌؟ بێگومان سه‌ده‌م هه‌بوونا کوردانه‌. ئه‌و ته‌حه‌مول ناکه‌ کو کورد ل ڕۆژاڤایێ كوردستانێ ببن خوه‌دی باندۆر.

نه‌ ته‌نێ ل ڕۆژاڤایێ کوردستانێ، ده‌وله‌تا ترک ل چ ده‌ڤه‌رێ هه‌بوونا کوردێن زیندی قه‌بوول ناکه‌. ئه‌گه‌ر ئه‌و ب هه‌رێما کوردستانا باشور ڕا د ناڤا هندەك تێکەلیان دا یه‌ سه‌ده‌م ئه‌وه‌ کو کوردێن باشور د بن باندۆرا وێ ده‌ نه‌. ئه‌گه‌ر پارتیا دەمۆكراتا كوردستانێ (پەدەكە) و هه‌روها یەكێتیا نشتمانیا كوردستانێ (یەنەكە) ل دژی به‌رژه‌وه‌ندیێن ده‌وله‌تا ترک ته‌ڤ بگه‌رن ئه‌و نکارن یه‌ک ڕۆژێ ب ده‌وله‌تا ترک ڕا تێکەلیان بمه‌شینن. ئه‌ڤ ڕاستیه‌که‌ و ئه‌ز باوه‌رم ڕایه‌دارێن باشوورژی ڤێ یه‌کێ باش دزانن.

ده‌ما کو مرۆڤ ل ڕه‌وشا باکورێ کوردستانێ دنێره‌ هه‌مان ڕاستی باشتر تێ خویا كرن. کوردێن کو ژ ئالیێ ده‌وله‌تا ترک ڤه‌ تێنه‌ حه‌زکرن ئه‌ون یێن کو ته‌نێ ژ ده‌وله‌تێ ڕا خزمه‌تێ دکه‌ن. یانی کوردێن مری، نه‌ یێن زینده‌. هه‌ر کوردێ کو خوه‌ ب ڕاستی وه‌که‌ کورد دبینه‌ ژ ئالیێ ده‌وله‌تا ترک ڤه‌ و هه‌روها ژ ئالیێ پارتی و سازیێن ترک ڤه‌ نایێن حه‌زکرن. هه‌موو سازیێن ئه‌وله‌کاریا ده‌وله‌تا ترک ده‌ربارێ کوردان دا خوه‌دی یه‌ک ھەلوەست و نێزیکاتینە، کوردێن زینده‌ هه‌رده‌م د بن چاڤاندانن.

نه‌ ته‌نێ ده‌وله‌تا ترک، پڕانیا گه‌لێ ترک ژی خوه‌دی هه‌مان نێزیکاتیێ یه‌. له‌وره‌ هندەك باژارێن ترکان ژ کوردان ڕا قه‌ده‌خه‌نن. هه‌ر سالێ ب سه‌دان ئێرش ل دژی کوردان تێن کرن و هه‌موو ژی ل باژارێن ترکان دقه‌وومن، یێن کو هه‌مان ئێرشان دکن ژی ترکن.

ب کورتایی مرۆڤ نکاره‌ د ناڤا هه‌مان شه‌رت و مه‌رجان دا و ب دله‌کێ ڕه‌حه‌ت دۆزا براتیا کورد و ترکان بپارێزه‌. یه‌ک ژی، یاکو زێده‌تر بالا مرۆڤ دکێشینه‌ ئه‌ڤه‌؛ مژارا براتیا کورد و ترکان ب گرانی ژ ئالیێ کوردان ڤه‌ تێ نقاشکرن. پڕ کێم ڕه‌وشه‌نبیرێن کو ئه‌سلێ خوه‌ ترکن ڤێ مژارێ گۆتوبێژ دکن.

ئه‌ز ل دژی براتیا گه‌لان نینم، لێ به‌لێ پێویسته‌ براتی یه‌کالی نه‌به‌. دڤێ هه‌ر دو ئالی ژی براتیێ بخوازن و هه‌ز بکن. ئه‌گه‌ر نه‌ وسان به‌ ئه‌و براتی نه‌ یا ڕاسته‌، ژ که‌سێ ڕا ژی فه‌یده‌یا وێ نابه‌.

ئه‌گه‌ر سیاسه‌تا ده‌وله‌تا ترک وسان بەردوام بكە تێ واتەیا کو ده‌مه‌کێ ب شووندا وێ چ مه‌جال نه‌مینه‌ کو مرۆڤ به‌حسا “براتیا کورد و ترکان بکه‌”.

د داویێ دا ئه‌ز دخوازم ڤێ ژی بێژم؛ دڤێ کو ئه‌م کورد زێده‌ ڤێ مژارێ نقاش نه‌کن داکو ” ترک ” نه‌بێژن “کورد هه‌وجه‌یێن براتیا مه‌نە”. چقاس کورد هه‌وجه‌یێ براتیا ب گه‌لان ڕا نه‌، ئەوقاس ژی ترک، عه‌ره‌ب و فارس ژی هه‌وجه‌نە.

ئەحمه‌د گولاب ده‌ره‌

2019.08.30

Back to top button