سه‌لاهەتتن ده‌مرتاش دبێژە: ” ژ بۆ کو هوون کوردن ئه‌و (ترک) چقاس ئێریشی وه بکن، هوون ترکا هه‌مێز بکن. دێ ئه‌ڤ ڕۆژ ده‌رباسببن، تشتا کو دمینه برایه‌تیه.”
تێ زانین کو گه‌له‌ک جارا ل باژارێن ترکا و هنده‌ک ناڤچه‌یان ئێریشی کوردا دکن، پرانی ده‌ما هنده‌ک ب کوردی دئاخڤن، یان ژی نژادپه‌ره‌ستێن ترک، دبینن کو چه‌ند جوان سترانه‌ک کوردی دبێژن یان ژی گه‌له‌ک جارا نژادپه‌ره‌ست ژ کوردا عاجزن و ئێریشی وان دکن. ژ ئه‌نجاما وان ئێریشان ھەتا نھا ب ده‌هان خورتێن کورد هاتنه کوشتن و ب سه‌دان کوردا ل باژارێن ترکا لێدان خوارنه و بریندار بوونه.
پپشتی دستپێكرنا شه‌رێ پەکەکێ، ده‌وله‌تا ترک ب ئاوایەكێ هۆڤانه ئێریش بر سه‌ر جھ و وارێن کوردا و ب سه‌د هه‌زاران کورد کۆچبه‌ر بوون و به‌رێ خوه دان ناڤ ترکان. ژ بۆ کوردستان ژ خه‌لکێ ڤالا ببه ده‌وله‌تا ترك و پەکەکێ هه‌ر تشت کرن و ب ملیۆنا کورد ژ جھ و وارێن خوه کۆچبه‌ربوون. ل گۆرا هنده‌ک ئامارا زێده‌یی 6 ملیۆن کورد ژ کوردستانێ بار کرن و ل ترکیێ بوونە به‌نابه‌ر. وه‌ک دن سیاسه‌تا پەکەکێ یا شاش وه‌ک شه‌رێ خه‌نده‌کان، جاردن بوو ئەگەر کو کورد کۆچبه‌ر ببن.
ئه‌ڤ یه‌ک وه‌ک برینه‌کا جڤاکی یه و ئەو برین گه‌له‌ک کوور بوویه. لێ گه‌له‌ک ئەگەرێن ڤێ یه‌کێ هه‌نه. پرانیا جاران سیاسه‌تا ل باکورێ کوردستانێ سه‌رده‌ست، بوویه ئەگەرەك ژ ڤان ئێریشان. هه‌ر چقاس سیاسه‌تا پەکەکە/هەدەپە به‌هسا “براتیا گه‌لان” دکن و دبێژن کو ئه‌م نه پارتیه‌ک یا کوردانه و ئه‌م دخوازن ده‌مۆکراسیێ بینن ترکیێ. یانی چ شیعاره‌ک به‌له‌ڤاجی دبیژن، ئه‌و دبە سه‌ده‌مه‌ک کو ترک پتر ئێریشێ کوردا بکن. گه‌له‌ک ترک وسا دزانن کو “کورد هه‌موو پەکەکەیی نه و هه‌موو ته‌رۆرستن”. یانی د چاڤێ ترکان دا کورد پۆتانسیه‌ل ته‌رۆرستن. هه‌تا گه‌له‌ک جارا ده‌وله‌ت ژی ڤێ سیاسه‌تا هەنێ دپه‌ژرینه.
“ژ بۆ کو هوون کوردن ئه‌و (ترک) چقاس ئێریشی وه بکن،هوون ترکا هه‌مێز بکن. دێ ئه‌ڤ ڕۆژ ده‌رباسببن، تشتا کو دمینه برایه‌تیه.“ سه‌لاهەتین ده‌مرتاش
چقاس ئێریشه‌ک یا نژادپه‌ره‌ستێن ترک چێدبه هەدەپە و ڕێڤه‌به‌رێن وێ ژ ئالیه‌کی ڤان ئێریشان ب ئوسلووبێن خوه شه‌رمه‌زار دکن ژ ئالیه‌ک دن ڤه هێشتا پتر به‌هسا براتیه‌ک ده‌ره‌و دکن.
براتیا گه‌لان تشته‌ک پیرۆزه و هێژایه، لێ دڤێ براتیه‌ک ڕاسته‌قینە به. کورد و ترک برایێ هه‌ڤن ده‌ما کو هه‌موو مافێن وان وه‌ک هه‌ڤ بن. کورد و ترک ڕاستی ب برایه‌تی دکارن د وه‌لاته‌کی دا ل گه‌ل هه‌ڤ بژین. لێ دڤێ د هه‌موو واری دا وه‌ک هه‌ڤ بن. مافێ دو برا چیه دڤێ یێ کوردا و ترکا ژی ئه‌و به. ئه‌ڤ ماف چنه؟ ده‌وله‌تا ترکا هه‌یه، بلا یا کوردا ژی هه‌به، زمانێ وان فه‌رمیە. بلا یێ کوردا ژی فه‌رمی به، ناڤێ وان ل ده‌وله‌تا وان هاتیه کرن بلا ناڤێ کوردا ژی ل ده‌وله‌تا کوردا بێ کرن..
براتیا ڕاست ئه‌ڤه. وه‌ک دن گۆتنا براتیێ نابه ببه شیعاره‌ک یا سیاسه‌تێن قرێژ. ترک ئێریشی مه دکن، یێن وه‌ک ده‌مرتاش دبێژن بلا ئه‌و مه بکوژن، لێ ئه‌م وان هه‌مێز بکن. بلا هه‌رکه‌س بزانبه هه‌ر ده‌ما کورد دبێژن “براتیا گه‌لان” ترک حه‌نه‌کێن خوه ل مه دکن. ئه‌و براتیا مه قه‌بوول ناکن. گۆتنا براتیا وان ژ بۆ کوردان دبه خولامه‌تی و کۆله‌تی. سیاسه‌تێن وه‌ک هەدەپێ ژی دبن زه‌مینێ سیاسه‌تا وان یا ده‌ره‌و.
ده‌ما ئێریشێ کوردان دکن ژ بۆ کو ته‌نێ ئه‌و کوردن، نابە ده‌مرتاش ب ڕحه‌ک کۆمپله‌کسا بنده‌ستیێ گۆتنێن ڤاله بێژه. هه‌ر گۆتن دبه سه‌ده‌مێ ئێریشه‌ک دن.
نووچه/ئانالیز
