هه‌می جیهان و کوردێن ل جیهانێ دیتن و فێمکرن کو ته‌نها کورد دکارن ب ئالیکاریا هه‌ڤدو بکن. کورد دکارن ده‌ستێن خوه درێژی برایێ خوه یێن کو پێویستیا وان ژ وی ده‌ستێ ئالیکاریێ هه‌یه بکن. مه دیت و بهیست کو پرانیا کارساز، ده‌وله‌مد و یێن خوه‌دی هه‌بوون، ب ئالیکاریا برایێ خوه رابوون. ئه‌ڤە ژی جهێ کێفخوه‌شیێ یه.
ئاها مه دیت ئازادیا کۆبانێ ب پشتەڤانی و هاریکاریا پێشمێرگه یێن قه‌هره‌مان، پێشمەرگە یێن کوردستانێ پێک هات. ئاها مه دیت و ئه‌م بوونه شاهدێ وێ یه‌کێ کو د ئه‌ردهەژا باکور و رۆژاڤایێ کوردستانێ دا، به‌رێ ده‌وله‌تا ترک، هێزێن ئالیکاریا باشوورێ کوردستانێ ئاماده بوون. ب هه‌می کێم ئیمکانێن خوه ڤە ب ئالیکاریا برایێن خوه رابوون. براتی و دۆستانی د رۆژێن ته‌نگ دا دیار دبه.
دڤێ ئێدی کورد هشێ خوه بینن سه‌رێ خوه و دەست ژ براتیا گه‌لان، ب دۆستانیا دژمنان و ب دژمناتیا هه‌ڤدو بەردن. کا بنێرن ئه‌و که‌س و پارتیێن ل دژی بارزانیان نە هه‌تا نها ژ گه‌لێ خوه یێن دبن کاڤلان دا مانه چ کرن؟ ژ برینداران را چ ده‌رمان و ئالیکاری برن. رۆژ نه رۆژا په‌سندایینا خوه یه. رۆژ رۆژا هندێیە کا کی دکارە و چاوا ب ئالیکاریا برایێ خوە رابن.
بنێرن و ببینن کا حوکومه‌تا هه‌رێما کوردستانێ ل باشوور، دگه‌ل ده‌زگه‌هێ خێروازیێ بارزانی چەوا ئالیکاریا برایێن خوه یێن رۆژاڤا و باکور کرن و دکن. ب ڤێ نیڤده‌وله‌تا خوه به‌ری هه‌رکه‌سان ئه‌و ب ئالیکاریا برایێن خوه رابوون. لێ هێ ژی هندەک خێرنه‌خواز هه‌نه دخوازن ڤێ وه‌که ده‌ره‌وه‌کێ ب ناڤ بکن. ژ به‌ر کو هه‌می ژیانا وان ب خوه ده‌ره‌وه.
دڤێ ئێدی ئه‌م بزانبن، ژ کوردان پێڤه چو که‌س نابن برایێ کوردان. پێویسته ئێدی بێ دیتن کو ئه‌ڤ سه‌رێ سه‌د سالانه بارزانی چما و ژ بۆنا چ شه‌رێ ئازادیا گه‌لێ خوه ددن.
گه‌لۆ ئه‌و که‌سێن چاڤ ل وان وێنه‌یێن ئامبولانسێن ژ باشوور هاتنه باکور کو ئالیکاریا برایێ خوه بکه و وان ژ بن کاڤلان ده‌رخن، بکه‌ڤن وێ چ بفکرن؟ گه‌لۆ ب راستی ژی وێ بفکرن کو بارزانی دژمنێ گه‌لێ کورده؟ ئان چ ده‌ما پێویستیا کوردان ژ ئالیکاریێ هه‌به وێ ب ئالیکاریا وی و وان ڤه را به؟
جاره‌کێ بنێرن و ببینن کو هێ بارزانی نیڤده‌وله‌ته و ب نیڤده‌وله‌تبوونا خوه ژی هه‌ر جار ب ئالیکاریا برایێ خوه یێن کوردێن پارچەیێن دن رابوونه و رادبن. ژ بۆنا ئالیکاریا وان چ ژ ده‌ستێ وان تێ دکن.
بنێرن و ببینن کو د ڤێ کاراسات و ئه‌ردهەژا کو ل باکور و رۆژاڤایێ کوردستانێ پێک هاتیه ده‌زگه‌هێ خێروازیێ بارزانی بێ چه‌ندین ئالیکاری و ئانبولانس ژ برایێن خوه را شاندنه. بنێرن و ببینن بێ چاوا بێ کو وه‌ختێ ده‌رباس بکن ب هه‌می ئیمکان و هێزا خوه یا نیڤده‌وله‌تی ئالیکاریا برایێ خوه دکن.
گه‌لۆ وان پارتی و که‌سێن دژمناتیا بارزانیان دکن، کا هه‌تا نها ژ گه‌لێ خوه را چ کرن و دێ چ بکن؟ فه‌رقا کوردستانیبوونێ ئه‌ڤه. دڤێ ئێدی کوردێن مه ڤێ باش بزانبن و فێر ببن کو دۆست د ره‌وشێن دژوار دا ب ئالیکاریێن خوه تێنه ناسین.
ما گه‌لۆ ئێدی گۆتن ژ ڤێ را دڤێ؟
جاره‌کا دن سه‌رساخیێ ژ مالباتێن که‌سێن وان جانێ خوه ژ ده‌ست دایە دکم و شیفایێ ژ که‌سێن بریندار را دخوازم. هێڤیدارم کو ئێدی کورد ره‌وشا ل به‌ر چاڤان باش بنرخینن و ببینن کو کی دۆست و کی دژمن ە…
Bûbê Eser
