ب به‌شداریا نێزیکی ٥۰ پارتییێن سیاسی یێن کوردی ژ ڕۆژاڤایێ کوردستانێ، ئیرۆ ۲٦ێ نیسانا ۲۰۲٥ئان، ده‌مژمێر ۱۰:۰۰ کۆنفه‌رانسا یه‌کهه‌لوه‌ستییا کورد ل باژارێ قامشلۆیێ برێڤه چوو، د داوی دا ژی ئه‌نجامێن کۆنفه‌رانسێ د کۆنفه‌رانسه‌کا ڕۆژنامه‌ڤانی دا هاتن ڕاگەهاندن.
سه‌رۆکێ ئه‌نجوومه‌نا نشتمانی یا کورد ل سووریه‌یێ (ئه‌نەکسە) محه‌مه‌د ئیسماعیل و ئه‌نداما سه‌رۆکاتیا پارتییا یه‌کیتییا ده‌مۆکراتیک (پەیەدە) فه‌وزا یووسف د جڤینه‌کا ڕۆژنامه‌ڤانی دا داخویانییا داوی یا کۆنفه‌رانسێ ب هه‌ر دو زمانێن کوردی و عه‌ره‌بی خوه‌ندن.
ل گۆری داخویانیێ، کۆنفه‌رانسێ بریار دا کو د زووترین ده‌م دا شانده‌یه‌ک هه‌ڤبه‌ش ژ پارتییێن سیاسی یێن کورد یێن ل ڕۆژاڤایێ کوردستانێ بێ ئاڤاکرن، دا کو ل سه‌ر بنگه‌ها تێگەهشتن و نێرینا هه‌ڤپار یا کو د کۆنفه‌رانسێ دا ده‌رکه‌تیه، ل شامێ دانووستاندنان ب ڕایه‌دارێن هه‌یی یێن سووریه‌یێ را بکن.
داخویانییا داوییێ یا کۆنفه‌رانسێ:
“کۆنفه‌رانسا یه‌کرێزی و یه‌کهه‌لوه‌ستا کوردی ل ڕۆژاڤایێ کوردستانێ د ۲٦ێ نیسانێ ۲۰۲٥ان دا ل باژارێ قامشلۆ پشتی دیالۆگێن ده‌مدرێژ و هه‌ولدانێن سپاسدار ژ هه‌ڤال و برایان ڤه، ب به‌شداریا پارتییێن کوردی، ڕێخستنێن جڤاکا سڤیل، ته‌ڤگه‌را ژنان، ڕێخستنێن ژنان و چالاکڤانێن جڤاکا کورد ئێن سه‌ربخوه ژ هه‌رێمێن جودا یێن کوردی ل سووریه‌یێ، ب ئارمانجا په‌ژراندنا دیتنه‌کا یه‌کگرتی یا کوردی ل سه‌ر ئاڤاکرنا سووریه‌یه‌ک نوو و به‌شداربوونا د ته‌شه‌دانا پاشه‌رۆژا وێ و چاره‌سه‌رکرنا پرسگرێکا کوردی دا، د ڤێ قۆناخا گرنگ ئا دیرۆکا سووریه‌یێ دا، پشتی هلوه‌شینا ڕژێما زۆردار ل شامێ د ۸ێ کانوونا پێشین ئا ۲۰۲٤ان دا، ئه‌ڤ ڕژێما کو ئازادی و ڕوومه‌تا گه‌لێ سووریه‌یێ ب هه‌موو پێکهاته‌یێن وێ یێن نه‌ته‌وه‌یی، ئۆلی و جڤاکی بنپێ کر، و وه‌لات ل سه‌رانسه‌رێ ئه‌ردنیگاریا سووریه‌یێ وێران کر، و ب میلیۆنان ژ گه‌لێ وێ کوشتن، کۆچبه‌ر و په‌نابه‌ر کرن، و هه‌ر چه‌ند گه‌لێ سووریه‌یێ ژ بۆ هلوه‌شاندنا وێ ڕژێمێ و بداویکرنا زۆرداریا وێ، و بده‌ستخستنا ئازادی و ڕوومه‌تا خوه قوربانی پێشکێش کرن، گه‌لێ کورد ل سووریه‌یێ ژی د ڕووبرووبوونا وێ ڕژێمێ دا گه‌له‌ک قوربانیێن مه‌زن و ب هه‌زاران شه‌هیدان دان. گه‌لێ کورد ب ده‌هان سالان تێکۆشین کر، دا کو زۆرداریا نه‌ته‌وه‌یی ژ سه‌ر خوه ڕاکه و مافێن خوه یێن نه‌ته‌وه‌یی ب ده‌ست بخه، هه‌ر ده‌م تێکۆشینا خوه یا نه‌ته‌وه‌یی ب تێکۆشینا خوه یا نشتمانی ڤه گرێ دا ژ بۆ ئاڤاکرنا سیسته‌مه‌ک ده‌مۆکراتیک ئا پرئالی ل سووریێ.
ل سه‌ر بنگه‌ها به‌رپرسیاریا دیرۆکی و به‌رسڤدایینا ژ پێدڤیێن قۆناخا نها، ئاڤاکرنا دیتنه‌کا سیاسی یا هه‌ڤبه‌ش ئا کوردی کو ئیراده‌یه‌کا کۆله‌کتیف و پرۆژه‌یه‌ک ڕاستین ژ بۆ چاره‌سه‌ریه‌کا دادمه‌ند ژ بۆ پرسگرێکا کوردی ل سووریه‌یێ وه‌کی ده‌وله‌ته‌ک ده‌مۆکراتیک و نه‌ناڤه‌ندی نیشان بده.
خالێن د کۆنفه‌رانسێ دا هاتنه:
۱. په‌ژراندنا دیتنا هه‌ڤبه‌ش ئا کورد: به‌شدارێن کۆنفه‌رانسێ “دیتنا هه‌ڤبه‌ش ئا کورد” وه‌کی به‌لگه‌یه‌کا بنگه‌هین په‌ژراندن. ئه‌ڤ دیتن ئیراده‌یا کۆله‌کتیف ئا کوردان نیشان دده و ڕێیه‌ک ڕاستین ژ بۆ چاره‌سه‌ریه‌کا دادپه‌روه‌ر و به‌رفره ئا پرسگرێکا کورد د چارچۆڤه‌یا سووریه‌یه‌کا یه‌کگرتی دا پێشنیار دکه.
۲. تایبه‌تمه‌ندیێن سووریه‌یا یه‌کگرتی: دڤێ ئه‌ڤ سووریه‌یا یه‌کگرتی خوه‌دی ناسنامه‌یه‌که پر-ئه‌تنیکی، پر-ئۆلی، پر-چاندی و پر-نه‌ته‌وه‌یی به.
۳. گارانتیکرنا مافان د ده‌ستوورێ دا: ده‌ستوورا سووریه‌یێ دڤێ مافێن نه‌ته‌وه‌یی یێن گه‌لێ کورد گارانتی بکه، پابه‌ندی په‌یمانێن ناڤنه‌ته‌وه‌یی یێن مافێن مرۆڤان به، و ئازادی و مافێن ژنان بپارێزه و به‌شداریا وان ئا ب باندۆر د هه‌موو سازیان دا (سیاسی، جڤاکی، له‌شکه‌ری) مسۆگه‌ر بکه.
٤. دیتنا هه‌ڤبه‌ش ببه بنگه‌هه‌ک ژ بۆ دیالۆگا نه‌ته‌وه‌یی: کۆنفه‌رانس داخواز دکه کو ئه‌ڤ دیتنا هه‌ڤبه‌ش ببه بنگه‌هه‌ک ژ بۆ دیالۆگا نه‌ته‌وه‌یی، د ناڤبه‌را هێزێن سیاسی یێن کورد ب خوه دا.
٥. دیتنا هه‌ڤبه‌ش ببه بنگه‌هه‌ک ژ بۆ دیالۆگا نشتمانی: کۆنفه‌رانس داخواز دکه کو ئه‌ڤ دیتنا هه‌ڤبه‌ش ببه بنگه‌هه‌ک د ناڤبه‌را وان و ڕێڤه‌به‌ریا نوو یا شامێ و هه‌موو هێزێن دن ئێن نه‌ته‌وه‌یی یێن سووریه‌یێ دا.
٦. ئارمانجا ئاڤاکرنا سووریه‌یا نوو: ئه‌ڤ دیالۆگ دڤێ ببه ئالیکار ژ بۆ ئاڤاکرنا سووریه‌یه‌کا نوو کو هه‌موو گه‌لێ خوه هه‌مبێز بکه، چو پێکهاته‌یه‌کێ پاشگوه نه‌که یان ژ هۆلێ ڕاکه، دووری زهنیه‌تا یه‌کالی به، ڕوومه‌ت و مافێن وه‌لاتیان ب ده‌ستووری بێ جوداهی بپارێزه، و ببه فاکتۆره‌ک ئارامی و ئه‌وله‌هیێ ل هه‌رێمێ ب ڕێزگرتنا ل تێکلیێن خوه یێن ناڤنه‌ته‌وه‌یی.
۷. ئاڤاکرنا شانده‌یا هه‌ڤبه‌ش: کۆنفه‌رانسێ بریار دا کو د ده‌مه‌ک نێزیک دا شانده‌یه‌کا هه‌ڤبه‌ش ئا کوردی وه‌ره ئاڤاکرن. ئه‌رکا ڤێ شانده‌یێ ئه‌وه کو ژ بۆ پێکانینا ڤێ دیتنێ د وارێ سیاسی دا بخه‌بته و ب ئالیێن په‌یوه‌ندیدار را دانووستاندن و دیالۆگێ بکه دا کو ناڤه‌رۆکا وێ مسۆگه‌ر بکه.
کۆنفه‌رانسا یه‌کرێزی و یه‌کهه‌لوه‌ستا کوردی
ئارمانج ژ ڤێ کۆنفه‌رانسێ ڕاگەهاندنا یه‌کهه‌لوه‌ستیا کورد و ئاڤاکرنا شانده‌یه‌که هه‌ڤپار ئا کوردی یه، ژ بۆ دانووستاندنا ل گه‌ل حکوومه‌تا نوو یا سووریه‌یێ و مسۆگه‌رکرنا مافێن گه‌لێ کورد.
د کۆنفه‌رانسێ دا، فه‌رماندارێ گشتی یێ هسدێ مه‌زلووم ئه‌بدی، نوونه‌رێ سه‌رۆک مه‌سعود بارزانی، د. حه‌مید ده‌ربه‌ندی، شانده‌ک ژ یه‌کیتیا نشتمانییا کوردستانێ (یەنەک) و شانده‌که ده‌م پارتی و دەبەپێ و نوونه‌رێن پارتی و هێزێن دن ئێن کوردستانی ژی ئاماده بوون.
