نێچیرڤان بارزانی داخوازێ ژ هه‌موو هێز و پێکهاته‌یێن کوردستانێ دکه کو بیرانینا سه‌رهلدانێ بکن هێڤێنێ براتی، پێکڤه‌ژیان، یه‌کرێزییێ و نه‌هێلانا پرسگرێک و ناکۆکیان داکو ب ڤێ یه‌کێ جانێ کاروانێ شه‌هیدێن کوردستانێ شاد بکن و هه‌موو پێکڤه به‌ر ب پاشه‌رۆژه‌کا باشتر پێنگاڤان پاڤێژن. پێکڤه ژ بۆ کوردستانه‌که ئارام، ئاڤادان تێبکۆشن کو هه‌رده‌م ب لاندکا ئازادی، لێبۆرینی، پێکڤه‌ژیان و هه‌ڤدووقه‌بوولکرنێ بمینه
تێکستا په‌یاما سه‌رۆکێ هه‌رێما کوردستانێ:
د بیرانینا سیھ سالیا سه‌رهلدانا ئادارا گه‌لێ کوردستانێ دا، سلاڤ ژ بۆ شه‌هیدێن ئازادیا کوردستانێ، سه‌رێ ڕێز و ڕوومه‌تێ ژی ل به‌ر گیانێ وان یێ پیرۆز دا دچه‌مینین، ب حورمه‌ت و ڕوومه‌تێ ڤه وان ب بیرتینین.
سلاڤ ل گه‌لێ خوه‌راگرێ کوردستانێ کو ب هه‌موو پێکهاتەیێن وێ ڤه وه‌کی ئیرۆ به‌ری سیھ سالان ل ڕانیایا خوه‌شدڤی ده‌رباسگه‌ها سه‌رهلدانێ، ب گرسه‌یه‌کا جه‌ماوه‌ریا مه‌زن دا به‌رامبه‌ر ب سته‌م و دیکتاتۆریێ سه‌رهلدان کر و ل گه‌ل پێشمه‌رگه‌یێن قه‌هره‌مانێن کوردستانێ، یه‌ک ب یه‌ک گوند و باژارۆک و باژارێن وه‌لاتی ئازاد کرن.
ئیرۆ د ده‌مه‌ک دا بیرانینا وان ڕۆژێن پیرۆز و قه‌هره‌مانێن وێ دکین، کوردستان ژ هه‌موو ده‌مه‌کێ زێده‌تر پێویستی ب ته‌بایی و پێکڤه‌یی و یه‌کرێزیا هه‌موو ئالیان و پێکهاتەیێن وێ هه‌یه، هه‌تا کو بکارە په‌یام و ئارمانجێن پیرۆزێن سه‌رهه‌لدانێ و به‌رهه‌مێ خوینا شه‌هیدان بپارێزه و به‌ر ب پاشه‌رۆژه‌کا باشتر پێنگاڤان پاڤێژه.
وه‌کی چاوا د ده‌ما سه‌رهلدانێ دا ته‌ڤاهیا کوردستانیان ب هه‌موو پێکهاتێن نه‌ته‌وه‌یی و ئۆلی و هه‌موو هێز و ئالیێن سیاسیێن جوودا ڤه، ل به‌ره‌یه‌ک یه‌کگرتی دا پێکڤه ڕاپه‌رین و سه‌رکه‌فتین، نها ژی ب هه‌مان ئاوایی ئه‌م هه‌موو پێکڤه دکارین ڕووبروویێ دژواری و گه‌فان ببین و مافێن خوه یێن ده‌ستووری ب ده‌ست ڤه بینین و بپارێزین.
د ڤێ بیرانینا پیرۆز دا داخوازێ ژ هه‌موو هێز و ئالیان و پێکهاتەیێن کوردستانێ دکم، بیرانینا سه‌رهلدانێ بکین هێڤێنێ ته‌بایی و پێکڤه‌یی و یه‌کرێزی و نه‌هێلانا پرسگرێک و ناکۆکیان هه‌تا كو جانێ کاروانێ شه‌هیدێن کوردستانێ شاد بکین و ئه‌م هه‌موو پێکڤه به‌ر ب پاشه‌رۆژه‌کا باشتر پێنگاڤان پاڤێژین، پێکڤه ژ بۆ کوردستانه‌که ئارام، ئاڤادان و تەنا تێبکۆشین کو هه‌رده‌م ب لاندکا ئازادی، لێبۆرینی، پێکڤه‌ژیان و هه‌ڤدوو قه‌بوولکرنێ بمینه.
نێچیرڤان بارزانی
سه‌رۆکێ هه‌رێما کوردستانێ
2021.0305
