سۆسیۆلۆگێ ناڤدار ئیسمائیل به‌شیکچی دبێژە:
۱. سری سورەیا ئونده‌ر ژ بۆ من که‌سه‌کی ئه‌رێنی نینه.
۲. ئه‌ز عه‌جێب دبینم کو کورد ژ بۆ ئونده‌ر دگرین.
۳. پەکەکە ژی ئالیکاریا ده‌وله‌تێ دکه کو کوردان ب ترکیتییێ را ئاسیمیله بکه.
به‌شکچی گۆتنێن سری سورەیا ئونده‌ر ڤەدگێرە کو د ئاخاڤتنەکێ دا، دەما کو ل سەر نەتەوەپەرستیا پریمیتیڤ دئاخڤی، وها گۆتبوو: مه هەدەپە دامه‌زراند دا کو پێشیێ ل نه‌ته‌وه‌په‌ره‌ستیا کوردان بگرین
ژ بۆ من، سری سورەیا ئوندەر، قه‌ت که‌سه‌کی ئه‌رێنی نه‌بوویه ژ به‌ر کو ژ وێ ڕۆژێ وەرە ئوندەر کوردان دخاپینه.
ناڤه‌رۆکا نه‌ته‌وه‌په‌روه‌ریا ترک، عه‌ره‌ب و فارس و نه‌ته‌وه‌په‌روه‌ریا کوردی پر ژ هه‌ڤ جودا نه. هه‌ر سێ نه‌ته‌وه‌په‌روه‌ری دخوازن کوردان ئاسیمیله بکن و ب زمان و چاندا خوه وان ژ ڕوویێ عه‌ردێ پاقژ بکن. ئه‌نفال چ یه، هه‌له‌بچه چ یه؟ چه‌مێ زیلان، ساسۆن، دێرسم، مه‌هاباد چ تینن بیرا مه؟ شه‌وتاندنا ٥۰۰ زارۆکێن کورد، کو پرانیا وان خوه‌نده‌کارێن دبستانا سه‌ره‌تایی بوون، د سینه‌مایا ئاموودێ/رۆژاڤا دا د ۱۳ێ مژدارا ۱۹٦۰ئان دا چاوا پێک هات؟ نێزیکی ۳۰۰ ژ وان هاتن شه‌وتاندن، و ۲۰۰ئێن مایی ژی ب گرانی بریندار و سه‌قه‌ت بوون. هه‌ر سێ نه‌ته‌وه‌په‌روه‌ری ئێریشکار و داگیرکه‌رن. ئه‌ڤ هه‌لوه‌سته‌ک نژادپه‌ره‌سته.
ژ ئالیێ دن ڤه، ئارمانجا نه‌ته‌وه‌په‌روه‌ریا کوردی نە ئەوە کو ئێریشی که‌سی بکه ئان ژی ئاخا که‌سی داگیر بکه. ئارمانجا نه‌ته‌وه‌په‌روه‌ریا کوردی نە ئەوە کو کەسەکی ئاسیمیله بکه. ئارمانجا نه‌ته‌وه‌په‌روه‌ریا کوردی ئەوە کو زمانێ زلم و زۆرداریێ ل سەر خوە نەهێلە، پاراستنا زمانێ کوردی یە و ژیانا ب زمانێ کوردی یە، دڤێ پەروەردەکرنا زارۆکێن کوردان ب نەتەوەپەروەریا کوردان ئارمانجەکا کوردان بە.
ل شوونا تێکۆشینا ژ بۆ ماف و ئازادیێن کوردان، هه‌ولدانا ژ بۆ ده‌مۆکراتیککرنا دەولەتا کۆلۆنیالیست ژ خه‌یاله‌ک دوور و درێژ وێده‌تر نه تشته‌که. زۆرداری، توندووتووژی و قه‌ده‌خه ژ بۆ کۆنترۆلکرنا کوردانن. ژ بۆ ده‌مۆکراتیککرنا ترکیه‌یێ نه هه‌وجه یه کو تێکۆشینا چه‌کداری بێ کرن.
سری سورەیا ئونده‌ر د ۳ێ گولانا ۲۰۲٥ئان دا کۆچا داوی کر.
به‌شه‌ک ژ کوردان ل ناژارێن کوردستانا باکور تازی و شینی بۆ گێرا. ئه‌ز عه‌جێب دبینم کو کوردێن کو د مژارێن بنگه‌هین ئێن وه‌کی زمانێ دایکێ دا هه‌ولدانێن جدی ناکن، د هه‌لوه‌سته‌ک ئه‌وقاس د ناڤ تازی و شینی و گریێ دانە.
دڤێ نه‌یێ ژبیرکرن کو سیاسه‌تا ئاسیمیله‌کرنا کوردان د ناڤ ترکبوونێ دا سیاسه‌ته‌که کو ب ئالیکاری و ته‌شویقکرنا پەکەکێ ژ هێلا ده‌وله‌تێ ڤه تێ مه‌شاندن.
