به‌شکجی: خیانه‌تا که‌رکووکێ خیانه‌ته‌که‌ مه‌زن بوو

دۆستێ گه‌لێ کورد، ڕۆناکبیر و دیرۆکنڤیسێ ترک ئیسماعیل به‌شکجی د سالڤه‌گه‌را خیانه‌تا ۱۶ێ جۆتمه‌ها ۲۰۱۷ێ ده‌ دبێژه‌ كو خیانه‌تا که‌رکووکێ خیانه‌ته‌که‌ مه‌زن بوو و برینه‌که‌ مه‌زن بوو ژ کوردان ڕه‌.ئیسماعیل به‌شکجی د هه‌ڤپه‌یڤینه‌کێ ده‌ لگه‌ل مالپه‌را kdp.info ڕاگەهاند: د ۱۶ێ جۆتمه‌ها پار ده‌ خیانه‌ت هات کرن، کو د ئه‌نجامێ ده‌ چه‌ند ناڤچه‌ ژ ده‌ستێ کوردستانێ ده‌رکه‌تن و ژ به‌ر وێ یه‌کێ کورد بریندارن.ده‌ربارێ ڕه‌فه‌راندوما به‌ریا ۱۶ێ جۆتمه‌هێ ژی به‌شکجی وها گۆت: مافێ گشتپرسی و ڕه‌فه‌راندومێ مافه‌کێ ڕه‌وا یێ مله‌تانه‌. ناسکرن و ڤه‌گه‌را بۆ نێرینا گه‌لان یه‌ک ژ بنگه‌هێن سه‌ره‌که‌ یێن ده‌مۆکراسیێ نە، ڕه‌فه‌راندوما هه‌رێما کوردستانێ ژی وسا ڕه‌وا بوو. پێویسته‌ گه‌ل و مله‌ت نێرینا خوه‌ ب ئازادی بدەن و نابه‌ ڕێگری ل نێرینا وان بێکرن. ئه‌نجاما ڕه‌فه‌راندوما هه‌رێما کوردستانێ پر ئه‌رێنی بوو، کو پرانیا خه‌لکێ کوردستانێ داخوازا سه‌رخوه‌بوونێ کرن. ئه‌و ئه‌نجام پر گرنگه‌ و ڕۆلا سه‌رۆک بارزانی ژی د وێ پرۆسه‌یێ ده‌ پر مه‌زن بوو و جهێ ڕێزێ بوو.ده‌ربارێ کاره‌ساتا ۱۶ێ جۆتمه‌هێ وه‌ک خیانه‌ت بناڤ دکه‌ و دبێژه‌، د وێ ڕۆژێ ده‌ کورد و کوردستان ڕاستی خیانه‌ته‌که‌ پر مه‌زن بوون و کورد ژ به‌ر وێ خیانه‌تێ ڕاستی برینه‌که‌ مه‌زن بوونه‌.وی نڤیسکارێ مه‌زن یێ ترک ئاماژه‌ ب وێ یه‌کێ دکه‌، ته‌ڤی کو کوردان ڕووبه‌ره‌که‌ به‌رفره‌ھ ژ ئاخا خوه‌ ژده‌ست دان و نها د قۆناخه‌که‌ زه‌حمه‌ت ده‌ نه‌، لێ لڕۆژا ڕه‌فه‌راندوما ۲۵ێ ئیلۆنا ۲۰۱۷ کورد و خوه‌دیێ کوردستانێ دیار بوون.ئیسماعیل به‌شکجی دبێژه‌: پرسا کورد و کوردستانێ پرسه‌که‌ ۱۰۰ سالی یه‌، گه‌ره‌ک زووتر ئه‌ڤ پرس هاتبا چاره‌سه‌رکرن و به‌ریا ۱۰۰ سالی ده‌وله‌تا کوردان هه‌با.به‌شکچی وها دۆماند: داعش هه‌ڤکێشه‌یا سیاسی ل عیراقێ گوهه‌رت و هه‌تا نها ئه‌و وه‌لات د ڕه‌وشه‌که‌ تژی ئالۆزی ده‌ ده‌رباس دبه‌. لێ داعش و حه‌شدا شه‌عبی ۲ به‌لا و ده‌ردێ سه‌رێ کوردانه‌. ژ بۆ کو مه‌ترسیا داعش و حه‌شدا شه‌عبی ل سه‌ر کوردان نه‌مینه‌ دڤێ هزره‌ک د سه‌رێ مرۆڤێ کورد ده‌ چێببه‌ کو زێده‌تر خوه‌ ڕێخستی بکه‌ و ب ئاوایه‌کی باشتر کار ژ بۆ پرسێن خوه‌ یێن چاره‌نڤیساز بکه‌.ده‌ربارێ وه‌لاتێن ده‌ردۆرێ ژی به‌شکچی دبێژه‌: ئیران و ترکیه‌ و عیراق و سووریێ هه‌رده‌م دکارن ل دژی کوردان ده‌ستێ خوه‌ بدن هه‌ڤ، لێ پێویسته‌ کورد ل دژی وان یه‌کگرتی و یه‌کهه‌لوێست بن.ده‌ربارێ هلبژارتنێن پارلامه‌نتۆیا کوردستانێ ژی کوپارتیا دەموكراتا كوردستانێ (پدک) ڕێژه‌یه‌که‌ مه‌زن ژ ده‌نگان تێ ده‌ بده‌ستڤه‌ ئانیه‌، ئیسماعیل به‌شکچی دبێژه‌، ئه‌و ده‌نگێ مه‌زن ئێن (پدک)ێ نیشانه‌ کو ئه‌و پارتی ل سه‌ر ڕێیا ڕاست دچه‌.