بوویەرێن رۆژهلاتێ کوردستانێ و هەلوەستێ نەتەوەیی یێ کوردان
کوشتنا ژنا کورد مه‌هسا ئەمینی (ژینا ئەمینی) ئیران سه‌رووبنێ هه‌ڤ کر و ل گه‌له‌ک باژاران سه‌رهلدانان ده‌ست پێ کر. ئه‌ڤ چرووسکا ئێگر ئه‌نجاما زلمکارییا رژێما ئیرانێ و هه‌بوونا پرسگرێکێن نه‌ته‌وی، ئابۆری و یاسایێن دژی مافێ مرۆڤان بوو.
هه‌لبه‌ت مه‌هسا ئەمینی نه ته‌نێ ژ به‌ر کو پۆرێ وێ ڤه‌کری بوو هات کوشتن، ژ به‌ر کو ئەو ژنه‌ک کورد بوو هات کوشتن. کوشتنا مه‌هسا ئەمینی ژ بۆ سه‌رهلدانا کوردێن رۆژهلات و هه‌روه‌ها ژ بۆ گه‌لێن ئیرانێ ژی بوو چرووسکا سه‌رهلدانێ. سه‌رهلدانا کوردێن رۆژهلات هه‌روه‌ها باندۆرا خوه ل باژارێن ئیران و ئازه‌ربه‌یجانێ ژی کر و ل وێرێ ژی سه‌رهلدانان ده‌ست پێ کر.
ئه‌ڤ نه جارا یه‌که‌مه کو ل سه‌رانسه‌رێ ئیرانێ چالاکییێن سه‌رهلدانێ روو ددن. گه‌له‌ک جاران ل دژی یاسا و هه‌لوه‌ستێن رژێما ئیرانێ چالاکییێن گرسه‌یی هاتنه کرن، لێ بێ ئه‌نجام مانه. رژێمێ ب ئاسن و ئاگر ئه‌و چالاکی و سه‌رهلدان ڤه‌مراندنه، دیسا کوشتن و برینداری بوویه پارا گه‌ل.
د بوویه‌رێن ڤێ داوییێ دا ژی گه‌له‌ک کورد ژ ئالی هێزێن رژێمێ ڤه هاتن کوشتن. بوویه‌ر بەردەوام دکن و وێ چ ئه‌نجام ژێ ده‌رکه‌ڤن نه زەلاله.
کوشتنا ژنا کورد مه‌هسا ئەمینی، ژ ئالیێ گه‌له‌ک ئالییان ڤه ژ قالبێ نه‌ته‌وی هات ده‌رخستن و ته‌نێ ب لاچک و پۆرێ ڤه هات گرێدان. بێگومان ئه‌ڤ یه‌ک ب زانایی تێ کرن و دخوازن ناڤه‌رۆکا سه‌رهلدانێن ل رۆژهلاتێ کوردستانێ پووچ بکن. سه‌رهلدانێن کو ل رۆژهلاتێ کوردستانێ هاتنه و تێن کرن نه ژ بۆ دۆزا لاچک و پۆرێ ڤه‌کری یان چارچه‌فێ یه. ژ وێ زێده‌تر ژ بۆ ماف و حه‌ق و حقووقێ نه‌ته‌وا کورده، ژ بۆ خاکا کوردستانێ یه. ژ بۆ ئه‌ڤ راستی بێ ڤه‌شارتن یان ئاشکه‌ره نه‌به، پارتی، ده‌زگه‌ه و رژێمێن خێرنه‌خواز مژارێ به‌رۆڤاژی هه‌ڤ دکن و ب داخویانی و چالاکییێن جودا سه‌رهلدانا کوردێن رۆژهلات ب لاچک و پۆرێ ڤه گرێددن. ئه‌ڤ ژی نه به‌سه، سه‌رهلدانا کوردێن رۆژهلات ته‌نێ ب ئازادی و حه‌ق و حقووقێ ژنێ ڤه گرێددن و هه‌ول ددن وێ ژ ناڤه‌رۆکا مافێ حه‌ق و حقوونێ نه‌ته‌وی دوور دخن. ب تایبه‌تی پەکەکە و ده‌ر و دۆرا وێ ڤی کاری باش دکن. ژ به‌ر تێکلییێن وان و رژێما ئیرانێ، دخوازن به‌رخوه‌دان و سه‌رهلدانا کوردێن رۆژهلات به‌راڤێتی بکن و ناڤه‌رۆکا سه‌رهلدانێ پووچ بکن.
سه‌رهلدانێن ل رۆژهلاتێ کوردستانێ جاره‌ک دن دوبه‌ندی، سێبه‌ندی، چار و پێنجبه‌ندییا مه کوردان راخست به‌ر چاڤ. کوردێن باکور، باشوور و رۆژاڤا خووشک و برایێن خوه یێن رۆژهلاتی ب ته‌نێ هشتن و ده‌نگه‌کی خورت ژ خوه ده‌رنه‌خستن. ته‌نێ ب چه‌ند داخویانی و رێزگرتنێ پشتگری و هه‌ڤکارییه‌ک نه‌ته‌وی نایێ کرن. دڤیابوو ل قاد و کۆلانان قێرینا ده‌نگێ وان بگها سه‌رانسه‌رێ جیهانێ و یه‌کیتییا مله‌تان. لێ مخابن نه‌بوو و نه‌کرن. یێن هێزا وان هه‌بوو ژ بۆ به‌رژه‌وه‌ندییێن خوه و ده‌وله‌تێن کو پێ ڤه گرێدایی نه نه‌کرن، یێن بێهێز بوون ژی نه‌وێریبوون یان نه‌وێرن ده‌نگ ژ خوه ده‌رخن. یانی، مه پشتا خوه دا کوردێن رۆژهلات و مه ئه‌و ب ته‌نێ هشتن. ئه‌ڤ یه‌ک ژی بێگومان نه کوردایه‌تی یه، نه نه‌ته‌وپه‌روه‌ری یه، ل دژی رێ و رێبازا نه‌مر قازی محه‌مه‌ده. قازی محه‌مه‌د دگۆت „کوردستان یه‌ک پارچه یه، نه چاره.” لێ مخابن جاره‌ک دن خویا بوو کو کوردستان نه یه‌ک پارچه یه، ٤-٥ پارچه یه و هه‌ر پارچه‌یه‌ک ل سه‌ر مرییێن خوه دگری.
