بھێلن بلا نەورۆز جه‌ژنا کاوه‌یێ ئاسنگه‌ر و سه‌رهلدان به‌رخوه‌دان و ته‌کۆشینێ به
ڤان ڕۆژان، د سه‌ربه‌ندێن پیرۆزکرنا جه‌ژنا نه‌ورۆزێ دا، د ناڤا تۆرێن جڤاکی دا بابه‌ته‌ک که‌ته به‌رچاڤێن من گه‌له‌ک بالا من کشاند و من خوه‌ست ب ڤان چه‌ند ڕێزان دیتنا خوه دیار بکه‌م.
د تۆرێن جڤاکی دا دهێته مناقه‌شه‌کرن کا گه‌لۆ؛ نه‌ورۆز هه‌یه و چ ڕاستی ژ بۆ نه‌ورۆزێ هه‌یه؟ کاوه‌یێ ئاسنگه‌ر کورده یان نه کورده؟ گه‌لۆ نه‌ورۆز و کاوه‌یێ ئاسنگه‌ر ژ هه‌ڤ جودا یان پێکڤه‌گرێدایی نه؟ ما گه‌لۆ نه‌ورۆز ڕاسته یان ئه‌فسانه‌یه؟ و گه‌له‌ک پرسێن دن.
مه کوردان پرۆبله‌مه‌ک هه‌یه کو ئه‌م هه‌موو خوه ب دیرۆکزان، پره‌فه‌سۆر، جڤاکناس، ڕۆژهه‌لتناس، سیاسه‌تمه‌دار، ئه‌ده‌یبزان …هتد دزانن. لێ گه‌رێن بلا هه‌ر که‌س کارێ خوه بکه.
ب دیتنا من ب ته‌نێ دیرۆکزان و ڕۆژهه‌لاتناس دکارن به‌رسڤا پرسێن ل ژۆر بدن. گه‌لۆ د ناڤ مه کوردان دا مه ئه‌و دیرۆکزان و ڕۆژهه‌لاتناس هه‌نه کو بکاربن ب ئاوایه‌کی سه‌ربخوه وێ ڕاستیێ دیار بکن و به‌رسڤا پرسێن مه ژۆر دیار کرنه بدن. یان ژی ئه‌م دێ هه‌ر ڤه‌گه‌رن سه‌ر چاڤکانی و ژێده‌رێن بیانی و بێژن فلان عه‌ره‌ب یان فارسی یان ژی ترکی ل سه‌ر نه‌ورۆزێ و کاوه‌یێ ئاسنگه‌ر هوسا گۆتیه و نڤیسیه. هه‌لبه‌ت دیرۆكزانێ ترک، عه‌ره‌ب و فارس ژی دێ ل گۆر به‌رژه‌وه‌دنیێن وه‌لاتن خوه دیرۆکێ دیار بکن و ئه‌م کورد ژی دێ که‌ڤن په‌ی وان و گۆتن و نڤیسێن وان دوباره بکن و که‌ڤنه د شاشیان دا.
هه‌ر که‌سێ/ا تشته‌کی ل سه‌ر نه‌ورۆز و کاوه‌یێ ئاسنگه‌ر بێژه دڤێ هه‌ما هوسا ژبه‌ر خوه نه‌بێژه، دڤێ ژێده‌ر، چاڤکانی، ده‌کۆمه‌نت، به‌لگه‌نامە و فاکتان دانە به‌رچاڤان و دڤێ گۆتنێن خوە بسه‌لمینه. چێنابە هه‌ر یه‌ک ژ به‌ر خوه ل سه‌ر ڤێ پرسا گرنگ و دیار د دیرۆکا گه‌لێ کوردستانێ دا شرۆڤه بکه و ژ بوها و قیمه‌تا وێ کێم بکه. ئه‌ڤ یه‌ک ژی ئاوایه‌کێ خیانه‌تێ یه ل هه‌مبه‌رشێلووکرنا دیرۆکا کوردستانێ.
ئه‌ڤە ب هه‌زاران سالانه، ل گۆر سالنامه ل به‌رده‌ست هه‌یه، ئه‌ڤه ۲۷۱۹ سالا نه‌ورۆز و سه‌رسالا کوردی هه‌یه و تێ پیرۆز کرن. ب سه‌دان شانۆگه‌ریێن ئه‌دیبێن کوردان یێن کلاسیک یان ژی هه‌ڤچه‌رخ ل سه‌ر داستانا کاوه‌یێ ئاسنگه و زوهاک هاتینه نڤیسین، ب هه‌زاران که‌سان ناڤێ کاوه و نه‌ورۆز ل خوه کرنه، هه‌ما بێژه هه‌موو هونەرمه‌ندێن کورد ستران ب نه‌ورۆزێ و کاوه گۆتنه، چیرۆک و ڕۆمان ل سه‌ر نه‌ورۆزێ نڤیسینه. گه‌لۆ ما سودێ وێ ژ بۆ مه کوردان چیه ئه‌م ڤێ دیرۆکێ هه‌میێ بەرۆڤاژی بكن و ژ ھولێ راكن.
نه‌ورۆز جه‌ژنا کوردا و ھەموو گەلێن ئاریە، سه‌رسالا کوردانه، به‌رخودانه، خه‌بات و ته‌کوشینه و بلا هه‌ر وسا بمینه ب سه‌دان هه‌لبه‌ست و په‌خشان، چیرۆک و ستران ل سه‌ر نه‌ورۆزێ وه‌که جه‌ژنا به‌رخوه‌دانێ، جه‌ژنا سه‌رهلدانێ، جه‌ژنا خه‌بات و ته‌کۆشینا دژی داگیرکه‌رێن کوردستانێ هاتینه نڤیسین و گۆتن.
ما گه‌لۆ فایدەیێ وێ چیه نها ئه‌م ژ قیمه‌تا وێ کێم بکن. داگیرکه‌رێن کوردستانێ ب هۆڤانه ل دژی نه‌ورۆزێ ده‌ردکه‌تن و هه‌تا نها ژی ل باکور، ڕۆژهه‌لات و ڕۆژاڤایێ کوردستانێ حکومه‌تێن داگیرکه‌ر ڕێ نادن نه‌ورۆز ب ئازادی و سه‌ربه‌ستی بێ پیرۆز کرن و ئه‌و گه‌له‌ک ژ ڕۆژا نه‌ورۆزێ دترسن. دژمنان ب هه‌ر ئاوایی هه‌ولدایه ناڤێ نه‌روۆزێ بگوهه‌رن ب جه‌ژنا دایکێ یان جه‌ژنا بوهارێ یان ژی …هتد. ڤێچا نها د ناڤ مه کوردان ژی دا په‌یدابوونە ژ نه‌ورۆزێ ڕا دبێژن جه‌ژنا بوهارێ یان جه‌ژنا جڤاکێ، چما جه‌ژنا بهارێ ب ته‌نێ به، چما هنده‌ک ژێ ڕا بێژن جه‌ژنا جڤاکی. ما فایدەیێ مه کوردان د ڤێ یه‌کێ دا هه‌یه؟ بلا هه‌ر بمینه جه‌ژنا کاوه‌یێ ئاسنگه‌ر و جه‌ژنا سه‌رهلدان، به‌رخوه‌دان و ته‌کۆشینێ به، ب تایبه‌ت د ڤێ قۆناغێ دا کو هێشتا کورد دبن ده‌ستێ ترک، عه‌ره‌ب و فارسان دانه.
بلا خەلكێ مه سه‌ره خوه ب ڤێ یه‌کێ نه‌ئێشینن و وه‌خت و ئه‌نه‌رژیا خوه ل سه‌ر ڤێ پرسێ کا گه‌لۆ کاوه کورد بوو یان نه، کا گه‌لۆ نه‌ورۆز جه‌ژنا کوردانه یان نه، سه‌رف نه‌کن. ڤێ پرسێ ب تەنێ ژبۆ دیرۆكزان و رۆژھەلاتناسان بھێلن.
نسرەت حاجی
24.03.2019
