بۆرینا ٤۲ سالان ل سەر جینۆسایدكرنا هەشت هزار بارزانی یێن بێتاوان ژلایێ رژێما بەعس ڤە. هەر ژ کەڤندا و هەتا نۆکە پتریا جاران کورد و کوردستان ل گەل ئێراقا شوڤینێ نینە، نموونە ژی ئەنفال و کیمیاباران و جینۆسایدکرن و عەرەبکرن یا سەلماندی.
جینۆسایدكرنا هەشت هزار بارزانییان، بێ جیاوازی د ناڤبەرا پیڕو جوان و ساغ و نەخۆش و پەككەفتی و گەنج و زەلام و ئافرەتان دا، ئێك ژ مەزنترین كارەساتا و تراژیدیا و هێرشێن هۆڤانە یێن دژمرۆڤایەتی بوویە د دیرۆکا هەڤچەرخ كو بەرامبەر میللەتێ كورد ب گشتی و بارزانیان ب تایبەتی هاتییە کرن، ئەو ژی ژبەر هندێ کو بارزانی كورد بوون. ئەڤ جینۆسـایدا ھۆڤانە یا رژێما بەعس و بەرزەکرن و زیندانکرن و کوشتنا ب کۆم هەمبەری کەسێن بێگۆنەهـ و بێ دەستھەلات یێن بارزانیان ئەنجامدای، برینەکا کوورە و ھەر وەکی سەرۆك مسعود بارزانی گوتی “ئەڤە زنجیرەیەك بوو ژ زنجیرەیەکا تاوانێن مەزن هەمبەری گەلێ کۆردستانێ.
هەروەسا وەك بێسەروشوینکرنا ۱۲۰۰۰ کۆردێن فەیلی، کێمیابارانکرنا حەلەبچە و چەندیین جهێن دی یێن کۆردستانێ، زیندانکرن و بەرزەکرنا گەلەک کوردان. شەھیدێن کورد و بارزانی ناسنامەیا خەبات و بەرخوەدانێ نە و قۆربانیێن وان بەرێ بنیاتێ رێکا بەر ب سەرخوەبوونێ یە و موکمکرنا ئیرادە و ھێزێ بۆ بەردەوامیدانێ ب خەبات و رێبازا پیرۆزە.
ئەنفالا بارزانیان برینەکا کوورە کو چ جاران ناهێتە ژبیرکرن و چونکی کارەساتەکا دژی مرۆڤایەتیێ هاتە ئەنجامدان.
نها، ئەڤا کو نوکە ل هەرێما کوردستانێ ب دەستڤەهاتی، ب هەبوونا خۆڕاگریێ و ماندیبوونا خەلکێ ئەڤێ ھەرێمێ یە کو سەدەهان سالان، خوە نەداینە پاش. ب درێژیا دیرۆکێ دوژمنێن گەلێ کورد هەمی رێک بکارئیناینە ژبۆ ژناڤبرنا نفشێ مللەتێ کورد کو ئەنفالا بارزانیان ژی ئێك ژ وان نموونەیانە، بیرکرن د رویدانەکا ب ئەڤی شێوەیێ هۆڤانە دا ناخێ مروڤایەتیێ دهەژینیت. ئەنفالا بارزانیان و گەلێ کورد قوربانیێن عەقلیەتا چەپەل یا رژێما بەعسی و وەکو وان تاوانێن دژی هەموو گەلێ کوردبوون کو هزر و عەقلی رژێما چەپەل یا ئیراقێ دڤیان کوردو گەلێ کورد هەر نەمینن و ب ئێكجاری بهێن ژناڤببەن.
بەلێ گەلێ کورد بهێز و ئیرادەیەکا خۆراگر شیاینە، دیسا خۆڕاگر بن بەرامبەری داگیرکەران و رژێما بەعس و ئەڤ خۆراگریا خوە پاراستی یە و ل دوماهیێ ماندوبوون و قوربانیێن خەلکێ کوردستانێ ب گیان و خوینێ ئەڤ ھەرێمە هاتیە ئاڤاکرن و پاراستن، و نۆکە ژی سەرەرای گەلەک ھەول و پیلانێن دوژمنان ھەر ژیان ل ڤێ هەرێما کوردستانێ یا بەردەوامە بەر ب ئەزموون و دەستکەفتێن باشتر ڤە دچیت.
