بیرئانینا 58 سالیا ئاگرێ سینەمایا باژارێ عاموودێ
ئاگرێ سینه‌مایا عاموودێ.
ئیرۆ د دیرۆکا گه‌لێ کورد ده، یه‌ک ژ ڕۆژێن ب ئێش، ڕه‌وش و تاریه، ۵۸مین سالڤه‌گه‌را شه‌واتا سینه‌ما عاموودێ یه، یان ژی ئاگرێ سینه‌ما عاموودێ یه،
د ۱۳ێ چله‌یا پاشین سالا ۱۹۶۰ ده، ژ بۆ ئالیکاریا “شۆره‌شا جه‌زایرێ”، وێ ڕۆژێ، ڕێڤه‌به‌ریا باژارێ عاموودێ هه‌موو شاگرتێن دبستانێن سه‌ره‌تایی یێن باژێر مه‌جبوور کرن بچن سینه‌مایێ و ل فیلمێ، جریمه نصف ئاڵیل (جه‌ریمه‌یا نیڤێ شه‌ڤێ) ته‌ماشه بکن.
ل عاموودێ یا ڕۆژاڤایێ کوردستانێ ب سه‌دان زارۆکێن کورد به‌رێ خوه دانه سینه‌مایا باژێر یا ته‌نها دا کو ل فیلمێ ل سه‌ر شۆره‌شا جه‌زایرێ ته‌ماشه بکن.
ژ به‌ریا 58 سالان سینه‌مایا باژێر شه‌وتی و د ئه‌نجاما شه‌واتا ده، ۲۸۳ زارۆکێن کورد ژیانا خوه ژ ده‌ست دان.
ل سه‌ر ڤێ بوویه‌رێ نڤیسکار نامی دبێژه:
هن ب هن پێتێن ئاگر دژوار و بلندتر دبوون، ڕه‌نگێ شیپا ئاش د ده‌ری، کوله‌ک و په‌نجه‌ران ڕه تاڤێتن. که‌سی نه‌ما دکاری بوو نێزیک ببه، یێن دهاتن، ددیتن کۆ ئاگر ب ڤی ڕه‌نگی یه، ناچار دسه‌کنین، مینا زه‌رده‌شتیان ل دۆر ئاگر دچوون و دهاتن و ددیتن بێ چاوا پێلێن ئاگرێ سۆر و شین بیست بیست، چل چل خۆرتێن جوان د کوورانگها سینه‌مێ ده ددان به‌ر سینگا خوه.
وه‌که ڕه‌فده‌ک گورێن کانوونان یێن برچی، بکه‌ڤه کۆزا به‌رخان یا بێ شڤان و بێ خوه‌دی. ژ وان هن دکه‌تن و هن ڕادبوون و هن ڕادبوون و دیسا دکه‌تن. ب یه‌ک ده‌نگی دگۆتن:
یادێ… یابۆ… هاواره… ئه‌ز شه‌وتیم، ئه‌ز په‌رتیم.
ب ڤی ڕه‌نگی قێرین و هاوارا وان، د ناڤ پێل و پێتێن ئاگر ده ب ڕه‌نگه‌کی مووسیقی ئاواز و ده‌نگ ددا.
لێ یادێ و یابۆ، خویشک و برا، مه‌تک و خالتیک، ئاپ و خال، پسمام و دۆتمام ژ وان دوور بوون و ده‌نگێ وێ مووسیقا ب شه‌وات نه دکرن.
مه‌ته‌لۆک دبێژه: خوه‌دیێ تالانێ ده‌نگێ هاوارێ ناکه..
تشتێ کۆ د چیرۆکێ ده هاتیه گۆتن پرێ وان من ب چاڤێن خوه دیتنه و یێن دن ژ ڕاستگۆیێن باوه‌رپێ بهیستنه. نامی ب پێنووسا خوه هشتیه کۆ بوویه‌را شه‌هیدبوونا ڕفده‌ک ژ خوه‌نده‌ڤانێن کورد یێن د ناڤا کوورانگه‌ها ئاگرێ سینه‌مێ ده جان دابوون، د ناڤا ڕووپه‌لێن دیرۆکا کورد و کوردستانێ زندی بمینه.
من ژی خوه‌ست د ڤێ بیرانینێ ده ڕووپه‌لکی ژ پرتووکا ئاگرێ سینه‌ما ئاموودێ یا ب ناڤێ جڤینا ڕۆژا پێشی، پێشکێشی خوه‌نده‌ڤانێن برێز بکم و ب نامی ڕه ببێژم: ئه‌ز ڤێ پرتووکێ پێشکێشی خویشک و برایێن خوه یێن خوه‌نده‌ڤان و خۆشه‌ویست و خیره‌تشناس دکم و سه‌رساخی و دلخوه‌شیێ ژ گه‌لێ ئاموودێ ڕه دخوازم
ژ پرتووکا، ئاگرێ سینه‌ما عاموودێ، ڕووپه‌ل، ۳۱ یا نڤیسکار مه‌لا ئه‌حمه‌دێ نامی، قامشلۆ
