سالڤەگەرا وەفاتا هونەرمەند و پێشمەرگە سەعید گاباری
سعید گاباری کەسەک جودا بوو، راستە (نابینا ) بوو لێ بەلێ وی دنیایەکا بەرفره ب چاڤێن خوە یێن زێرین ددیت. پێشمەرگە و ھونەرمەند، سیاسەتمەدار و دیرۆکزان و جڤاکناس بوو.
ھندەك بیرەوەریێن من دگەل سەعید گاباری
هونەرمەند سەعید گاباری ب دەستێن رژێما سوریێ و عێراقێ گەلەک ئێش و ئەزیەت دیتن، لێ وی چو جارا شوپا خوە یا نەتەوەپارێزیێ نەگوھارت.
پشتی كەتنا 1975ێ رادیۆیا كوردی ل بەغدایێ بوو دەرگەھەك کو گەنج و چالاكڤانێن كورد ھەستێن خوە ب ھەلبەست و پەخشانان تێدا دیار بكن، ئەو رادیۆ بوو پرەكا پێناسینێ د ناڤبەرا گەنجێن كورد دا، ب تایبەتی ل باشوور و روژاڤایێ كوردستانێ. من ب وێ رێكێ هونەرمەند سەعید گاباری ناس كر كو بەرھەمێن من ل وێ رادیۆیێ دھاتن بەلاڤ كرن.
دیسان پشتی رێكخستنێن نھێنی یێن پەدەکێ ھاتینە ڤەژاندن، سعید گاباری دگەل قوتابییێن زانكۆیا صلاح الدین ل ھەولێرێ كو، خەتێ رێكخستنا مە ل وێرێ خالد عبداللە توڤی بوو، سەعید وەك ئەندامەك چالاك دگەل وان كار دكر.
ل سالێن ھەشتیان، سەعید گاباری ھاتە ناڤ شۆرەشێ و ل دەڤەرا دھوكێ، ل دووڤ شیان و ھەستێن خوە، بەشداری د ھندەك شەران ژی دا كر.
پاشی ئەو دچە ئیرانێ و ل وێدەرێ دەمەكی دمینە، لێ رەوش ب دلێ وی نەبوو و ژ ھندەك ئالیان ڤە نەئارامی بۆ پەیدا دكر، ل سالا 1984 سەعید گاباری و ئەز باوەركەم احمد زێباری ژی بوو، ژ ئیرانێ ڤەدگەرن و زاروكێن خوە د رێیا سیدەكان ر دشینن ناڤ حكومەتێ و سەعید گاباری ھات ھەتا گوندێ چەم جوھی، دەڤەرا نێروەرێكان، هینگێ مە حازریێن ئاھەنگا بەرەیێ كوردستانی دكر ل لقێ1 ل زێوەشكان. من زانی سەعید ھاتیە جەم جوھی و من نامەیەك بۆ نڤێسی و چەند پێشمەرگە ھنارتن و ھێسترەك ژێ ب خوە را بر. من گوتێ نامێ بۆ بخوینن. چون و روژا پاشتر زڤرین سەعید ئینا و مە ئاھەنگەكا خوش پێكڤە كر و چەند رۆژان ل دەڤ مە ما، مە دو پێشمەرگە دانە دگەل و ھێسترەك دایێ، سەعید گوتە من: ئەز ناچم ھەتا ناڤێ من ل تومارا پێشمەرگا نەنڤێسن و تڤەنگەكێ نەدەنە من. من ژی گوتە سەید صالح یێ رەحمەتی، بەرپرسێ لەشكری بوو، گوت ما دێ سەعید چ ل تڤەنگێ بكەت رەبەنی نابینایە؟ من گوت ئەم ھەستا وی ناشكێنن و ب ھەر حال رازی بو و ئەزچوم من سمینوفەك بو ئینا. ھەرچەندە ب دلی نەبوو لێ من گوتێ: ھەرە زارۆكێن خوە بینە و وەرە دێ بوتە گوھرین. چو لژنا ئامێدیێ و زاروكێن وی ژی ھاتن ل گوندێ كانیبەلاڤێ ئاکنجی بوون. مە دو كەس دانە دگەل وی، حكیم زاخویی و شڤان ئاكرەیی، من گوتێ ئێك ژ وە دێ دگەل بمینە و ھاریكاریا وی بكەن و ھەر ھەیڤێ جارەكێ ئێك و دو بگوھر.
پشتی دەمەكی سەعید گاباری ھات دو-سێ رۆژان ما ل دەڤ مە و ھەر شەڤ ستران و داوەت و كەیفا پێشمەگا گەلە ھات، گوتە من ڤێجارێ ناچم ھەتا كلاشنیكوفەكێ نەدەنە من و ئەگەر ھوون نەدن ژی ئەزێ دێ سترانەكێ ب وە چێكەم، من ژی كرەكەنی و گوتێ سەعید بەختێ تە وەنەكەی، دیسا ئەز چوم جەبلخانێ و ئەڤ كلاشنیكوفا ب ملێ وی ڤە (د وێنەی دا دیاریە) من بو ئینا و گەلەک پێ کەیفخوەش بوو.
سەعید گاباری ھەستەك گەلەك مەزن ھەبوو، ھەر مروڤێ دچو دەستی باش دەستێ وی دگرت و ھەروەك كودەك بوددانا و ھەردەما جارەكا دی دیتبا و چوبا دەستی یەك سەر دنیاسی.
پشتی چەند سالان، سالا 1994 ل ستۆكھۆلمێ، پایتەختێ وەلاتێ سوێدێ، سەعید ھاتبوە ژ بۆ ساخكرنا بیرەوەرییا بارزانی. ئەز ژی چوم من ڤیا ببینم ل ژورەكێ ل پشت مەسرەحێ بوو و سەیدایێ جەعفر ئێمینكی بەرنامە برێڤە دبر و ئەز ژی چوم دەڤ سەعید داکو سلاڤەکێ لێ بکم، ناڤێ وی ھات خاندن کو بچیت سەر مەسرەحێ، ئەز چومە دەستی و من گۆتێ سەعید تە ئەز ناسكرم؟ یەكسەر گۆت بێهنا پێشمەرگا ژ تە دهێت و من خوە داناسین سەعید تەمبورا خوە دانا و ئەز باوەشكرم و ھەوقاس گریا و ئەز ژی بگریا بەردام و گوت ئەڤ چ ھات سەرێ مە سەیدا؟ د ڤێ ناڤبەرێ دا کاک جەعفر ھات و گوت ئەو تە چ ل سەعید كر؟ ئاخر چو سەر مەسرەحێ و یەكسەر سترانا مەتین و بو من و پێشمەرگا كرە دیاری.
سەعید گەلەک ئازار و نەخوشی دیتن ژ دەستێن رژێمێن عێراق و سوریێ. سەعید گاباری وەزیڤێ خوە یێ نەتەوەیی ئەدا كر، ھزار رەحمەت ل گورا تە بن.
ژ فێسبۆکا: رێڤنگ هرۆری
