سیاسی

بیرھاتنەك د گەل سالح موسلم

سالح مسلم وەك خوە

ل گۆر ڤەگێرانا جوانەمەرگ كاوانی حەمەسەعید كو دبێژە:

 د مەھا ئۆكتۆبەرا سالا 2014ێ د ا كو ل باژارێ كۆبانێ شەر یێ گەرم بوو، ئەم 46 شەرڤان ھاتن ھلبژارتن كو بەر ب باژارێ قامیشلۆ ڤە بچن. پاشی ل قامیشلۆ 100 شەرڤانێن بژارتە و مێرخاس ل وێرێ ئامادە بوون.

 سالح مسلم جڤینەكا گەلەك گرنگ و كورت دگەل مە كر و گۆت كو  ئەڤ شەڤ د بن سەرۆكاتیا پۆلات جان كو بەرپرسەكێ سەربازیێ یەپەگێ بوو، ھوون دێ ئەركەكێ مێژویی ب جھ ئینن. سالح مسلم ب خوە 9 كەس ژ شەرڤانان ھلبژارتن داكو زێرەڤانیا وی بكن و وی بگەھینن فرۆكەخانەیا قامیشلۆ و ژ وێرێ ژی بچە دیمەشقێ.

 تشتەك عەجێب بوو،  چما د ڤێ رەوشێ دا كو كۆبانێ پارچەیەكا ئاگریە سالح بەر ب دیمەشق و ژێر حوكمێ بەشار ئەسەد دكەڤە رێ؟ ب ھەر حال ئەڤە یەكەم جار بوو ئەز قامیشلۆ دبینم و من ھەست دكر كو ھێشتا ئەڤ باژێر د دەستێ بەعسیێن سوری دایە. تەڤی ڤێ ژی ئەم ل بەندا ئەركێ خوە یێ شەڤێ بوون، دانێ ئێڤارێ پۆلات جان ھات و ئەم كۆمكرن و ھندەك گۆتێن نە زەلال ژ مە را كرن كو دێ چینە ئەركەكێ گەلەك نھێنی ل فرۆكاخانەیا قامیشلۆ.

 وەسا كەتە سەرێ من كو ئەم دێ ڤێ شەڤێ چین فرۆكەخانەیا قامیشلۆ كو ھێشتا دبن دەستێ پۆلیسێن بەعسیان دا بوو رزگار و پاقژ كەین و ئێخینە ژێر حوكمێ خوە.

 دەما ئەم گەھشتینە فرۆكەخانەیا قامیشلۆ، پۆلیس و مخابراتا سوری ب روویەكێ گەش پێشوازیا مە كر و ئەم ھەموو ل مەیدانەكا مەزن كۆم كرن. پۆلات ب خوە نەھاتبوو، ڤێ جارێ ئەفسەرەكێ پۆلیسەكێ عەرەب بۆ مە ئاخفت و شەرڤانەكی ئاخفتنا وی دكرە كوردی، ژ بەر كو من عەرەبی باش دزانی ژ ئاوایێ ئاخفتنا وی ئەفسەرێ عەرەب دیار بوو كو یێ فەرمانا ل مە دكە و گۆتنێن وی ھەموو فەرمان بوون.  پاشی وی ئەفسەرێ عەرەب ئەركێ مە ژ مە را گۆت كو دڤێ ئەم زێرەڤانیا گرۆپەكا پاسدارێن ئیرانێ بكەین كو ب چەند قۆناغان ژ عیراقێ ھاتبوونە فرۆكەخانەیا قامیشلۆ.

 ژمارا پاسدارێن ئیرانی نێزیكی 300 پاسداران بوون، ل چەند پاسان سوار بوون و دڤیا بوو ئەم ژی ھەتا دگەھینینە  سنوورێ رژێما سوریا زێرەڤانیا وان بكن، ژ بەر كو ئەو پاسدار بێچەك بوون.  ھەتا مە گەھاندنە  یەكەم بنگەھێ لەشكەرێ سوریێ، د رێ دا چەند جاران ئەم راستی شەرێن سڤك ھاتن دژی داعیش و دژی جەبھەیێ نوسرە.  

لێ من بخوە خوە وەكە كرێگرتیەك ددیت و من ھەزار تف ل خوە كرن. ھەر وێ رۆژێ ئێدی من بریار دا د دەرفەتەكا مناسب دا برەڤم، لێ پشتی سێ سالان ئەو دەرفەت ژ من را چێبوو برەڤم.

نھا ژی دەما ئەز ھزرا خوە دكەم سالح موسلم ژ بۆ وەرگرتنا خەلاتێ پرۆسەسا ڤەگوھاستنا پاسداران چوو بوو دیمەشقێ، لێ دەمامن زێدەتر بابەت ڤەكۆلا ژ من را دیار بوو كو تێكەلیێن ناڤبەرا سالح موسلم و مخابراتا سوریێ تێكەلیێن گەلەك دێرینن.

Back to top button