دژمن چو جاری ب هێزا خوه پشتا کوردان نه‌شکاندیه. کورد هه‌ر وه‌ختێ ب خیانه‌ت و بێبه‌ختییێن ناڤخوه‌یی شکه‌ستنه. د سه‌رهلدانا شێخ سەعید دا قاسمێ کۆر (هه‌ڤلنگێ شێخ سەعید)، د سه‌رهلدانا سەید ڕزا دا برازییێ وی ڕێبه‌ر (رایبه‌ر)، د سه‌رهلدانا بارزانییان دا ئیبراهیم ئه‌حمه‌د و تالەبانییان بێبه‌ختی ل کوردان کرنه و بوونه ئەگەرێ شکه‌ستن و تێکچوونا سه‌رهلدانێ. ئیرۆ ژی پارتیا كاركەرێن كوردستانێ (پەکەکە) دایه دووڤ وێ شۆپێ و پشتا کوردان دشکینه.
پەکەکە ب پاره و چه‌کێن میتێ هات ئاڤا کرن (ب گۆتنا ئۆجەلان). چما؟ ژ بۆ شکاندن و ڕێلبه‌رگرتنا ته‌ڤگه‌را ئازادیخوازا نه‌ته‌وی. ب ناڤێ کورد و کوردایه‌تییێ زێده‌یی 40 سالانه کو کوردان دکوژه و ل پێشبه‌ری پێشکه‌تن و بده‌ستخستنا ده‌ستکه‌فتییێن نه‌ته‌وی بوویه و دبه ئاسته‌نگ.
سه‌کره‌ته‌رێ ده‌زگه‌ها نه‌ته‌وی یا تركیێ ئۆرگه‌نه‌رال، تونجه‌ر کلچ، دگۆت: ” ژ بۆ مه شه‌رێ ب پەکەکێ ڕا ئه‌وقاسی نه گرنگه. ژ به‌ر ئه‌م ب پەکەکێ ڕا شه‌ره‌کی ب سینۆر و کۆنترۆل دمه‌شینن. ژ بۆ مه یا گرنگ ئه‌وه کو ئه‌م ڕێ ل به‌ر دامه‌زراندنا ده‌وله‌تا کوردستانێ بگرن. مه بارزانییێن کو ئارمانجا وان ده‌وله‌تا کوردستانێ یه د چاڤێن کوردێن ترکیێ دا ڕه‌ش کر، یا گرنگ ئه‌ڤەیه “.
ئاژان و سیخورێ میت ئێ یێ ب ناڤ و ده‌نگ، ماهیر کایناک، دگۆت: “پەکەکە، مالێ مه و ژ مه یه. پەکەکە نه ئالیگرێ ئاڤاکرنا ده‌وله‌تا کوردستانێ یه. لێ مه‌سعود بارزانی و هه‌ڤالبه‌ندێن وی یێن باکور ده‌وله‌تخوازن. ئه‌ساس یێن خه‌ته‌ر ئه‌ڤن”.
ئاقلمه‌ند و شێورمه‌ندێ پەکەکێ، یالچن کوچوک، دگۆت: ” پەکەکە زیانێ ناگەهینه ترکیێ. مه ب ده‌ستێ پەکەکێ ڕێ ل به‌ر بارزانییێن کو دخوازن ده‌وله‌تێ ئاڤا بکن، گرت. من ب ده‌ستێ پەکەکێ، بارزانی ژ کوردێن باکور ڕا کرن دژمن. ئه‌ڤ ژ بۆ من سه‌رکه‌فتنه‌ک مه‌زنه”.
ئۆجەلان، د هه‌ڤدیتنێن خوه دا مکور تێ و دبێژه: “هه‌تا پەکەکە هه‌به ئه‌ز ناهێلم بارزانی ده‌وله‌تێ ئاڤا بکن”.
دوران کالکان، جه‌میل بایک، مورات کارایلان، موستافا کاراسو، ئا. هایدار کایتان، ڕزا ئالتون، به‌سێ هۆزات و ته‌مامێ ڕێڤه‌برێن پەکەکێ ب هه‌مان ئارمانجێ دژمناتییا ده‌وله‌تبوونا کوردستانێ دکن و ل گۆر داخوازێن ده‌وله‌تا ترک ئێریشی پارتیا دەمۆكراتا كوردستانێ (پەدەکێ) و بارزانییان دکن. ئه‌ڤ یه‌ک نه ڤه‌شارتی یه، ئاشکه‌ره و زه‌لاله.
پەکەکە و هه‌موو پرۆپاگاندە و دژبه‌رییا پەکەکێ ل سه‌ر دژمناتییا بارزانییان و ئاڤاکرنا ده‌وله‌تا کوردستانێ هاتیه سازکرن. تێکلییێن وێ یێن ب هه‌ر چار ده‌وله‌تێن داگیرکه‌ر و یەكێتیا نشتمانیا كوردستانێ (یەنەكێ) ڕا دیسا ل سه‌ر ڤێ بنگه‌هێ هاتنه دانین. کوشتنا پێشمه‌رگه‌یان و ئالۆزکرنا ئارامییا هه‌رێما کوردستانێ ل سه‌ر ڤێ بنگه‌هێ یه.
ڕووخاندن و وێرانکرنا باکورێ کوردستانێ و ئالۆزکرنا ڕۆژاڤایێ کوردستانێ ل سه‌ر ڤێ بنگه‌هێ یه. ژ بۆ پەدەکە و بارزانییان د چاڤێ کوردان و ئاورا گه‌له‌مپه‌ری دا ڕه‌ش بکه، پەکەکە هه‌ر تشتی دکه، هه‌ر ڤڕ و ده‌ره‌وان دکه و خیانه‌تێن کو به‌شه‌ک ژ یەنەکێ ل وان دکه ژی دخه ستویێ پەدەکێ و بارزانییان.
پەکەکە یا کو دگۆت “مه ل مه‌تینا پێشمه‌رگه نه‌کوشتنه” دیسا ده‌ره‌و کر و ده‌ره‌وا وان ب داخویانییێن فه‌رماندارێ پایه‌بلند یێ پەکەکێ ئۆزگور ژیاندا ئاشکه‌ره بوو. یا بالکێشتر؛ ئه‌ندام و ڕێڤه‌برێن پەکەکی یێن کو ل سلێمانی و ده‌ردۆرا وێ ژ ئالی هنده‌ک ڕێڤه‌برێن یەنەکێ ڤه تێن ئیخبار کرن و ب بالافرێن ترکان تێن کوژتن، دیسا دخن ستویێ پەدەکێ و بارزانییان. لێ ئه‌ڤ ڤڕ و ده‌ره‌وا وان ژی ب وان دا ته‌قییا و ژ ئالی فایق گولپێ ڤه هات ئه‌شکه‌ره کرن.
د ده‌ربارێ ئیخباری و بۆمبه‌باراندنا ئه‌ندام و ڕێڤه‌برێن پەکەکێ دا سه‌رۆکێ به‌رێ یێ پارتییا چاره‌سه‌رییا ده‌مۆکراتیک ئا کوردستانێ (پچدک) فایق گولپێ، دبێژە: “ڕێڤه‌برێن پەکەکێ زێده‌تر ل سینۆرێ سلێمانییێ بوونه ئارمانجا ئێریشێن ده‌وله‌تا ترک و هاتنه کوشتن. دبه کو پەکەکە ژی دزانه یەنەک ئیخبارییێ دکه لێ به‌حس ناکه، هه‌گه‌ر پێوه‌ندییێن له‌شکه‌ری د ناڤبه‌را پەدەکێ و ترکییێ دا هه‌بن، هه‌روه‌ها پێوه‌ندییێن ئیستیخباراتی ژی د ناڤبه‌را یەنەک و ترکییێ دا هه‌نه و دبه ژ به‌ر وێ ئەگەرێ ئه‌ندامێن پەکەکێ زێده‌تر ل سلێمانییێ دبن ئارمانجا ئێریشان”.
ب کورت و کورمانجی هه‌گه‌ر ئه‌م بێژن؛ پەکەکە و دیرۆکا پەکەکێ ل سه‌ر ئه‌ساس و بنگه‌هێ ده‌ره‌و و بێبه‌ختییان هاتیه ئاڤاکرن. چو که‌س ب ده‌ره‌و و بێبه‌ختییان نه گەهایه ئارمانجا خوه. ڕۆژ تێ ئه‌و ده‌ره‌و و بێبه‌ختی ل خوه‌دییێ خوه ڤه‌دگه‌رن و وه‌ک بۆمبه‌یه‌کێ ب وان دا دپه‌قن.
نووچه‌ئەنالیز
ن.چ
