بێده‌نگیا دنیایێ ل هه‌مبه‌ری نژادپه‌ره‌ستیا ترکان
بێده‌نگیا دنیایێ ل هه‌مبه‌ری نژادپه‌ره‌ستیا ترکان…
وه‌لاتێ مه کوردستان هاتیه پارچه کرن. وه‌لاتێ مه هاتیه پارڤه کرن. نه‌ته‌وه‌یا مه ل وه‌لاتێ خوه ب ئاوایه‌کی ئاشتی و ئینسانی ژ بۆنا ئازادی و ڕزگاریا خوه خه‌بات دکه. ل هه‌مبه‌ری تێکۆشینا ئازادی و ڕزگاریا وه‌لات و نه‌ته‌وه‌یا مه ده‌وله‌تێن داگیرکه‌ر كومكوژیان دکن.
ده‌نگ ژ دنیایێ ده‌رناکه‌ڤه.
نه‌ته‌وه‌یێن یه‌کبوویی دبێژه: “ئه‌ز ل دنیایێ ژ هه‌موو وه‌لاتان و نه‌ته‌وه‌یان به‌رپرسم”، لێ ل هه‌مبه‌ری ڤێ نەحەقیێ و كومكوژیان ده‌نگ ده‌رنه‌خست و نووها ژی ده‌نگ ده‌رناخه.
یه‌کیتیا ئه‌ورۆپایێ، دبێژه: ” ئه‌م وارێ ده‌مۆکراسیێ، ماف و ئازادیانن”، لێ ئه‌و ژی ده‌نگێ خوه ده‌رناخه. پلاتفۆرمێن ئینسانی و ده‌مۆکرات یێن ناڤنه‌ته‌وه‌یی ده‌نگێن خوه ده‌رناخن.
ل دنیایێ ژ ده‌رڤه‌یی نه‌ته‌وه‌یا کورد، نه‌ته‌وه‌یه‌ک بێده‌وله‌ت نه‌مایه. کورد ده‌وله‌تا خوه دخوازن، دنیا، نه‌ته‌وه‌یێن یه‌کبوویی، یه‌کیتیا ئه‌ورۆپایێ پشتگریێ ناکن.
کوردان ل باشوورێ کوردستانێ ب ڕێیا ده‌مۆکراتیک و رەفەرەندوومێ بریار دا کو ده‌وله‌تا خوه ئاڤا بکن. ب پشتگریا ئه‌مریکا و ده‌وله‌تێن ئه‌ورۆپایێ پێشیا ڤێ هات گرتن و ڕێ ل به‌ر داگیركرنا باژارێ دلێ کوردان که‌رکوک هات ڤەكرن.
ل سه‌ر کوردان نژادپه‌ره‌ستیه‌کا گه‌له‌ک خورت تێ مه‌شاندن. چاند و زمان و موزیکا کوردان ژ هۆلێ تێ ڕاکرن، ده‌نگ ژ دنیایێ ده‌رناکه‌ڤه.
نه‌ته‌وه‌یێن خوه‌دی ده‌وله‌ت و ل کوردستانێ ده‌ستهلاتدار و سه‌روه‌رن، نه‌ته‌وه‌یا کورد بچووک دبینن و دنیا ده‌نگ ده‌رناخه.
ده‌وله‌تێن نژادپه‌ره‌ست دبێژن کو زمان و چاندا کوردی ژ بۆنا په‌روه‌رده‌یا هه‌ڤده‌م تێرا ناکه، دنیا ده‌نگێ خوه ده‌رناخه.
کورد ژ بۆنا کو ژ زمانێ خوه و ژ چاندا خوه و ژ موزیکا خوه ڕا ب ئاوایه‌کی گه‌له‌ک خوه‌زایی خوه‌دی ده‌ردکه‌ڤن، تێن کووشتن
دنیا دیسا بێ ده‌نگه.
ل ترکیێ گه‌له‌ک جوانێن کورد ژ بۆنا کو ل زانینگه‌هان ژ هێژاییێن خوه یێن ملی و مافێن خوه یێن ده‌مۆکراتیک ڕا خوه‌دی ده‌رکه‌تن/ده‌ردکه‌ڤن هاتن کووشتن و تێن کووشتن.
وه‌ک شێرزاد کوورتێ باتمانی.
گه‌له‌ک که‌س و جوانێن کورد ژ بۆنا کو موزیکا کوردی گوهدار دکن تێن کووشتن.
د ڤان ڕۆژێن داویێ دا جوانێن کورد یێن ژ پاتنۆسا ئاگریێ بارش چاکان ژ بۆنا کو موزیکا کوردی گوهدار کر، ئه‌نجاما ئێریشه‌کا نژادپه‌ره‌ست و ب ده‌ستێ گه‌له‌ک ترکان هات کوشتن، ب ئاوایه‌کی گه‌له‌ک ھۆڤ و درندانە هات کووشتن، ب کێران هات کووشتن.
ڤێ بوویه‌رێ ژی جاره‌کا دن ده‌رخست هۆلێ کو نژادپه‌ره‌ستیا ترک ل سه‌ر کوردان چقاس خورت و بەردەوامە.
نژادپه‌ره‌ستیا ترکان ل دژی هه‌موو هێژاییێن مللی یێن کوردانه. هه‌موو هێژاییێن کوردان چنە قه‌بوول دکه، ژ بۆنا کو ئەو هێژاییێن كوردان ژ هۆلێ ڕابن نژادپەرستی و کۆلۆنیالیست ۱۰۰ سالن بەردەوام دكە.
نژادپه‌ره‌ستیا ترکان، نه به‌س نژادپه‌ره‌ستیا ده‌وله‌تێ یه. نژادپه‌ره‌ستیا ترکان، ب ده‌ستێ ده‌وله‌تا نژاپەرست و کۆلۆنیالیست، ب ده‌ستێ ئیدیۆلۆژیا فه‌رمی یا ده‌وله‌تێ بوو نژادپه‌ره‌ستیه‌کا جڤاکی.
هه‌زار مخابن نووها ترک ب ته‌ڤایی نژادپه‌ره‌ستن. لۆما ژی نە به‌س ده‌وله‌ت جڤاتا ترک ژی ئه‌نجاما زهنیه‌تا خوه یا نژادپه‌ره‌ستی کوردان دکوژه.
ل هه‌مبه‌ری نژادپه‌ره‌ستیا پۆلیسێ ئه‌مریکایێ ل دژی ڕه‌شکان، دنیا ڕادبه سه‌ر لنگان. لێ ژ بۆنا کوردان و ژ بۆنا جوانێ کورد بارش چاکان جیھان بێ ده‌نگه.
ژ بۆنا ڤێ یه‌کێ دڤێ ئه‌م کورد ژ خوه ڕا و ژ دۆزا خوه ڕا خوه‌دی ده‌رکه‌ڤن.
دڤێ ئه‌م دۆزا بارش چاکان بکن دۆزه‌کا نه‌ته‌وه‌یی، ژێ ڕا خوه‌دی ده‌رکه‌ڤن.
ژ بۆنا کو ئه‌و که‌سێن نژادپه‌ره‌ست یێن کو بارش چاکان کووشتنه بێن گرتن و بێن دارزاندن، دڤێ ئه‌م خه‌باتێ بکن.
دیاربه‌کیر، 2020.06.12
ئ̇براهیم گوچلو
