نڤیسار

بێدەنگیا حوکمەتا هەرێمێ ل سەر ئێریشێن ترکیێ

!بێدەنگیا حوکمەتا هەرێما کوردستانێ ل سەر سنوربەزاندنا ترکیێ ئەگەر چنە

کێستە، ملا ڕەدێ، گۆپک و چەلکێ ل بن پۆستالێن رەشێن لەشکەرێ داگیرکەرێ ترکیەیێ دنالن… بەری نوکە ژی حەفت تەنین، نزدوور و رویسێ ژێ داگیرکرنە، لێ یا ژ هەموویێ ب کۆڤانتر بێدەنگیا هەموو هێز و ئالیێن سیاسی و حوکمی یە ل کوردستانێ د گەل لایەنێن سیاسی یێن کوردستانی ل دەرڤەیی کوردستانێ ب تایبەت یێن نێزیکی پەکەکێ …

 مرۆڤ دترسیت ئەڤە پیلانەکا مەزن بیت ژ ئالیێ دەولەتێن داگیرکەرێن کوردستانێ ڤە بۆ تەمراندنا چرایێ حوکمەتا هەرێما کوردستانێ ب هێجەتە کونترۆلکرنا سنوری کو هێزێن پێشمەرگەی شیانێن پاراستنا سنوری نینن و ب ڤێ هێجەتێ حوکمەتا ناڤەندی بڤەگەریت و داوی ب حوکمێ خۆمالیێ کوردستانێ بینن.

بێدەنگیا حوکمەتا ناڤەند و ئەمریکایێ ڤێ بۆچوونێ بهێز دئێخن، چونکو ترکییە ب پلان و رێکوپێک پێنگاڤێن داگیرکرنا کوردستانێ دهاڤێژیت ب هەمان مەتود و پێنگاڤێن هاڤێتین بۆ داگیرکرنا عەفرین و سەرێ کانی و دەڤەرێن دن یێن ل بن حوکمێ پەیەدێ …

بۆچی حوکمەتا هەرێما کوردستانێ ل سەر ڤێ چەندێ بێدەنگە؟ ئەرێ ئەمریکا گڤاشتنان ل سەر حوکمەتێ دکەت دا یا بێدەنگ بیت یان ژی تەپکەکە بۆ ترکیەیێ ڤەدای و حوکمەتا هەرێمێ ل سەر هاتیە ئاگەهدارکرن دا ب وێ هێجەتێ بریارا 688ێ بڤەژینن و تركیە وەک هێزەک تێکدەرا ئاساییشا دەڤەرێ بهێتە گونەهبارکرن و نەچار ببیت ل رێکە چارەیێن دن بگەرهیت بۆ چارەسەرکرنا کێشا کوردی ل باکور؟ دڤێت ئەم بزانین کو ئەمریکا ژ بۆ خاترا ترکیەیێ بریارا بتەرۆرهەژمارتنا پەکەکێ و سەرکردێن پەکەکێ دەرخستیە. ب تەرۆریستهەژمارتنا چەند سەرکردێن پەکەکێ د ڤی دەمی دا چێدبیت ژ بۆ ھندێ بە داكو سەرکردێن پەکەکێ یێن ئەلهۆیی، یێن باوەری ب شەرێ چەکداری هەی، ژ بریاردانێ بھێنە دووركرن و رێ ل پێش سەرکردێن کەڤۆکی، یێن باوەری ب چارەسەریا ئاشتیانە هەی، دەشت بیت.  چونکو ب هەموو پیڤەران سەردەمێ شەرێ پارتیزانی نەمایە و ئەگەر گەلەکن و یا ژ هەموویێ بەرچاڤتر جهگرتنا خەباتا مەدەنی و کاریگەریا وێ ل سەر رایا گشتی و پێشڤەچوونا زانستێ لەشکەری کو جھ ژ بۆ شەرێن کلاسیک و پارتیزانی نەهێلایە و بێی لەشکەر لڤینەکێ بکەتن زیانێن مەزن دگەهنە پارتیزانان   .

ب دیتنا من هەژمارتنا سەرکردێن پەکەکێ ب تەرۆریست بۆ هندێیە دا وان ژبریارا سیاسی دەربکەن و رێکا خەباتا مەدەنی ل بەر کوردان دەشت بکەن، بڤێ ستراتیجییەتێ ئەمریکا دخازیت پەکەکێ بێی شەر ژ سنورێن باشورێ کوردستانێ دوور بکەت و بەرێ وان بدەتە ناڤخوەیا تركیەیێ چونکو دەرکرنا پەکەکێ د شیانێن حکومەتا هەرێمێ دا نینە و ئەو هێزا بکاریت شەرێ دژی پارتیزانیێ بکەت ل کوردستانێ نەهاتیە دامەزراندن ژبلی بهایێ شەری د شیانێن حوکمەتێ دا نینە و قەیرانا ئابووری حوکمەت ئیفلیج کرییە یا ژ هەموویێ گرنگتر  ژی نەئامادەبوونا حکومەتا هەرێما کوردستانێ یە بۆ شەرەکێ براکوژیێ.

ئەگەر سەدەمێ بێدەنگیا حكومەتا هەرێما کوردستنێ ل سەر بجهکرنا لەشکەرێ تركیەیێ ل سرتا نێزیکی سنوری ئەو بیت یا مە ل سەری ئاماژە پێدای لێ کی دێ ڤێ پەیامێ گەهینیتە سەرکردێن پەکەکێ و وان ب ڤێ ستراتیجییا ئەمریکایێ هایدار کەتن؟ ئەرێ سەرکردێن ئەلهۆیی دێ دئامادە بن ب ئاشتیانە خوە ژ رێبەراتیا پەکەکێ دوور بێخن، رێکێ ژ بۆ نڤشێ نوو دەشت بکەن و ببنە پالپشت و پشتەڤان ژ بۆ هەر پێنگاڤەکا ئەو بهاڤێژن و نڤشێ نوو بهێنە سەرپشکرن كو پێڤاژوویا ئاشتیانە ب ئامادەبوونا نوێنەرێن هەر ئێک ژ یوئێنێ، ئەمریکا و ئێکەتیا ئەورۆپایێ دەست پێ بكن؟ نەوەکو پڤاژوویا ئوسلۆیێ بە کو ژ هەوالگیریا ترکیێ و هندەک سەرکردێن پەکەکی ل ئەورۆپایێ و دووری ڕایا گشتیا جیهانی دانوستاندن کرین،  لەوا ژی وان دانوستاندنان سەر نەگرت، چونکو تركیە  نەیا رژد بوو بەلکو وەک بادەکەک ئەمنی و دوماهیک پێ ئینانا تەرۆرێ بوو هەروەک وان دایە دیارکرن ئانکو نە مینا دۆزا نەتەوەیەک ئازادیخاز و دڤێت ئەڤ کێشە بهێتە چارەسەرکرن.

نوکە و هەر نوکە ژ پەکەکێ دهێتە خواستن كو تەک لایانانە بریارا چەک بێدەنگکرنێ بدەت، هەموو شیانێن هەین بێختە بەردەستێ هەدەپێ،  جادەیا گشتیا باکورێ کوردستانێ هانبدەت ژ بۆ ئەنجامدانا بزاڤ و چالاكیێن مەدەنیانە و ل گەل حکومەتا هەرێما کوردستانێ بکەڤیتە دانوستاندنێ و ژ حکومەتا هەرێمێ بخازیت كو ژ بۆنا  ئاساییکرنا رەوشا هەیی دگەل ئەمریکا ببیتە ناڤبەینچی. چونکو ئەمریکا و ئێکەتیا ئەورۆپایێ گڤاشتن ل سەر تركیەیێ زێدەکرنە و ئەگەر د هەلبژارتنێن 2023ێ  دا پەکەکە ژی بکەڤیتە دگەل ڤی باسکێ ئەنتی ئەردۆگان دێ ژ بۆ ئەردۆگانی و ئاکەپێ یا بزەحمەت بیت دووبارە بڕاوەیێن ئێکێ بن و ئەردۆگان دێ نەچار بیت رێکا ئاشتیێ دگەل کوردان بهەلبژێریت و بەر ب کوردانڤە بهێت و دێ داوی ب هێرشێن تورکیا هێت.  ل باکور گڤاشتنێن ل سەر هەدەپێ دی سڤک بن و بەلکی هەر نەمینن و ل باشورێ کوردستانێ حکومەتا تورکیەیێ دێ نەچار بیت خوە ژ کوردستانێ بڤەکێشیت و ئاڤەدانی و تەناهی دێ ڤەگەریتە دەڤەرێن سەر سنوری.

ب دیتنا من ئەڤەنە ئەگەرێن بێدەنگیا  حکومەتا هەرێما کوردستانێ و ئەمریکا  ل سەر هێرشێن تركیەیێ بۆ سەر باشورێ کوردستانێ. نوکە تەپا روودانا یا ل بەر سینگێ سەرکردێن پەکەکێ، بەرھەڤیا وان ژ بۆ خوەگونجاندنێ دگەل خەباتا مەدەنی و دووری دەنگێ چەکان دێ بەرێ روودانا د بەرژەوەندا کوردان دا خار بیت و بەرۆڤاژی ژی دێ کارەستا هێنە شکەڤا کوردی و سیناریۆیا پشتی هەلبژارتنێن ترکیەیێ ل ساڵا 2015ێ دووبارە بیتەڤە!

2021.05.02

محمد چەلکی

کوردستان

Back to top button