سیاسی

بێیی ئازادییا ژنێ چو جڤاکه‌ک ئازاد نابه‌ و پێش ناکه‌ڤه‌

 په‌یاما سه‌رۆک نێچیرڤان بارزانی بۆ رۆژا جیهانی یا ژنان

رۆژا جیهانی یا ژنان ب گه‌رمی ل هه‌موو ژنێن ل کوردستان، ئیراق و جیهانێ پیرۆز دکم و هێڤیا سه‌رکه‌فتنێن زێده‌تر، بەرخوەدان و به‌رده‌وامیێ ژ وان را دخوازم.

ب سالانه‌ ژنان خوه‌ برێخستن کرنه‌ و ژ بۆنا دابینکرنا مافێن خوه‌ یێن ڕه‌وا، بنبرکرنا چه‌وساندنێ، توندووتووژیێ و رووبرووبوونا نه‌وه‌کهه‌ڤیێ د هه‌موو واران دا خه‌بات کرنه‌.

چاوا کو مه‌ به‌رێ ژی د وارێ ره‌فۆرمێن یاسایی، سیاسه‌تا جڤاکی، سه‌رخوه‌بوونا ئابۆری و په‌روه‌رده‌یێ دا پشتگری دا ژنان، ئه‌م دێ به‌رده‌وام بن و هه‌رتم ئه‌م دێ پشته‌ڤانیێ ل خه‌باتا وان یا ژ بۆ مسۆگه‌رکرنا تماما مافێن وان بکن.

بێیی ئازادییا ژنێ چو جڤاکه‌ک ئازاد نابه‌ و پێشناکه‌ڤه‌. ئه‌م دێ کار بکن دا کو ل هه‌رێما کوردستانێ ده‌رفه‌تێن زێده‌تر ب به‌شداریا ژنان د ژیانا سیاسی، رێڤه‌به‌ری و هه‌موو وارێن دن دا بێ دان و توندووتژیا ل دژی ژنان و بنپێکرنا مافێن وان کو، جهێ نیگه‌رانیێ یه‌ ب داوی ببه‌.

د ڤی واری دا پێویستیا هه‌رێما کوردستانێ ب سیاسه‌ت و ستراته‌ژیێن نوو و ب به‌شداریا هه‌موویان هه‌یه‌. په‌روه‌رده‌، هینکرن، پێشڤه‌برنا لێکۆلینێن ئەکاده‌میک و خه‌باتێن زانستی، هشیاری و دیالۆگا پرئالی رێیێن هه‌ری باشن ژ بۆ گەهیشتنا ڤێ ئارمانجێ.

ژ بۆ وان ژنێن کو ژ خوه‌ باوه‌ر بوونه‌، د قادێن ژیانێ یێن جودا دا ب پێش که‌تنه‌ و خوه‌ ئیسپات کرنه‌، د پێکانینا ئه‌رکێن خوه‌ دا سه‌رکه‌تی بوونه‌ و بوونه‌ پێشه‌نگ، پیرۆزباهی و ده‌ستخوه‌شیێ ل وان دکم. ژنێن کوردستانێ دگه‌ل ژنێن جیهانێ دڤێ زێده‌تر به‌رهه‌ڤی و به‌شداری د پرسێن ژنان و پرسگرێکێن دن ئێن ژیانێ دا هه‌به‌.

ب ڤێ هەلکەفتێ، ئه‌م کار و خه‌باتا ژنێن کوردستانێ د رێکخستنێن حکوومی و نه‌حکوومی دا، د فه‌مانگه‌ه و سازیان دا بلند هه‌لدسه‌نگینن. ئه‌م ب رێز و حورمه‌ت ل ئه‌رک و که‌دا وان هه‌موو ژنان دنێرین یێن کو د هه‌ر واره‌کێ سه‌کتۆرا گشتی و یا تایبه‌ت دا دخه‌بتن و ب ئاوایه‌کی چالاک د رێڤه‌برن و ئاڤاکرنا جڤاک و وه‌لات دا به‌شداریێ دکن.

سلاڤ ل گیانێ هه‌موو وان خانمان یێن کو ژ بۆ وه‌کهه‌ڤی و بده‌ستخستنا مافێن خوه‌ یێن ژنانه‌ جانێ خوه‌ به‌خشینه‌ و هه‌موو یێن کو بوونه‌ قوربانیێن توندووتووژیێ. بلا روحا وان شاد به‌ یادا وان هه‌رتم ب خێر به‌.

٨ێ ئادارێ رۆژا جیهانی یا ژنان پیرۆز به‌

نێچیرڤان بارزانی

سه‌رۆکێ هه‌رێما کوردستانێ

٢٠٢٣/٣/٨

Back to top button