بەرسڤا ئەنەكەسێ ژ بۆ بەشار ئەسەد
ئه‌نجوومه‌نا نشتمانیا کورد ل سوریێ (ئه‌نەکەسە) به‌رسڤا داخویانیا سه‌رۆکێ سوریێ به‌شار ئه‌سه‌د دده و رادگەهینه كوگه‌لێ کورد ل سوریێ، گه‌له‌کی ره‌سه‌نه و ل سه‌ر خاکا خوه دژی. دۆزا کوردی ژی، دۆزه‌کا نشتمانی یا سوریێ یه.
ئه‌مینداریا گشتی یا ئەنەکەسێ د به‌رپرسا داخویانیێن به‌شار ئه‌سه‌د دا داخویانیه‌ک به‌لاڤ کر و راگەهاند كو داخویانیێن به‌شار ئه‌سه‌د یێن ره‌دکرنا هه‌بوونا دۆزا کوردی ل سوریێ، جهێ نه‌رازیبوونه‌کا مه‌زن یا گه‌لێ کورده. ئه‌ڤ نه تشته‌کی نوو یه، کو ب به‌رده‌وامی وێ رژێمێ هه‌بوونا گه‌لێ کورد و مافێن وی ل سوریێ وه‌ک پێکهاته‌یه‌کا ره‌سه‌ن یا سوریێ قەبوولنەكریە.
هه‌روها ئه‌نەکەسە ته‌که‌ز دکه كو هه‌بوونا کورد ل سووریێ دیرۆکی یه و به‌ری دامه‌زراندنا ده‌وله‌تا سوریێ و به‌ری رێکه‌فتنا سایکه‌س – پیكۆت ھەبوویە.
ئه‌نەکەسە دبێژه: رژێما به‌عس ژی گه‌له‌ک پرۆژه‌یێن شۆڤه‌نیزم، نژادپه‌ره‌ست و ئاوارته ب ئارمانجا بشافتنا کورد و گوهارتنا ده‌مۆگرافیا هه‌رێمێن کوردی بجی کرنه، ژ به‌ر وێ ژی ته‌ڤگه‌را کورد دژبه‌ریا ڤێ رژێمێ و سیاسه‌تێن وێ یێن شۆڤه‌نیست هلبژارتیه.
ئه‌نەکەسە ته‌که‌ز دکه كو دۆزا کوردی ل سووریێ، دۆزه‌کا نشتمانی یا سوریێ یه و چاره‌سه‌ریا وێ گرێدایی چاره‌سه‌ریا گشتی یا کریزا سوریێ یه، ب رێیا بریارێن ناڤده‌وله‌تی یێن پێوه‌ندیدار و د بن سه‌رپه‌رشتیا ناڤده‌وله‌تی دا و ب تایبه‌ت بریارا ۲۲٥٤ و نه دیتنا رژێمێ ب ئاوایه‌کی ته‌کانه ل شامێ یه.
ئه‌نەکەسە دیار دکه، هه‌موو به‌لگه‌یێن دیرۆکی ته‌که‌ز دکن کو گه‌لێ کورد، گه‌له‌کی ره‌سه‌نه، ل سه‌ر خاکا خوه دژی و تایبه‌تمه‌ندیێن وی یێن نه‌ته‌وەیی هه‌نه. هه‌موو سیاسه‌تێن ئینکارێ، سه‌رکۆتکرن و پرۆژه‌یێن شۆڤه‌نیزمی یێن ب سه‌رێ گه‌ل کورد و هه‌رێمێن وێ هاتبنه بجهکرن، نه‌کارینه هه‌بوونا وی و ناسنامه‌یا وی یا نه‌ته‌وەیی ئینکار بکن و بپشڤینن.
به‌ری چه‌ند رۆژان سه‌رۆکێ سوریێ به‌شار ئه‌سه‌د د هه‌ڤپه‌یڤینه‌کێ دا دگه‌ل که‌ناله‌کا رووسی دا گۆتبوو كو کورد ل سوریێ دژین، لێ ئه‌و د سه‌دسالا بووری دا ژ باکور ڤه هاتنه و چ تشته‌ک ل سووریێ ب ناڤێ دۆزا کورد نینه.
