نڤیسار

بەرچاڤكرنا 15 خالان ژ بۆ جھێن بریاربدەست

ئەو جڤاک و گەل یێ زیندی یە ئەوێ ھەلکەفتێن خوەش و نەخوەش ل بیرا خو بینە و ھەلسەنگاندنەکا زانستی بۆ بکە، داکو سەرئەنجام خالێن بھێز و لاواز دەستنیشان بکە.

 ئەز وەکو دلسۆزەکێ رێبازا بارزانی و پێشمەرگەکێ پارێزڤانێ کوردستانێ و خوە ب کادرەکێ پێشکەفتیێ پارتی دزانم لەورا دێ ڤان تێبینی و پێشنیاران ئێخمە بەر دەستێن جھێ بریارێ د ناڤ پارتی دا .

  1. پارتی دڤێت بریارێ بدە كو كاتب، تاجر و كادران ژ ھەڤ جودا بكە. قەد چێنابە ناڤێ ھەرسێكان كادر بە.
  2. پارتی دڤێت بریارێ بدە، یێن پارتی گەھاندینە ڤێ قوناغێ ب مەدالیا بارزانی بھێنە خەلاتکرن و ئەگەر پێدڤی پێ ھەبون وەکو کەسایەتیێن گەلەک رێزدار راوێژ پێ بھێتەکرن، ئەگەرنا دڤێت دەلیڤێ بدەنە ھێزا نوی ئەوێن ل سەر بیروباوەرێن رێبازا بارزانی ھاتینە ئاڤاکرن. وان ژی وەکو ھێما سەرەدەری د گەل دا بھێتەکرن و ئێدی بەسە .
  3.   پارتی دڤێت بریارێ بدە، گرنگیەکا ئێکجار مەزن ب گەنجێن خودان شیان و شارەزا و لێزان بدە و رێکێ بۆ خوش بکە و لێ وان نەترسیت.
  4.   پارتی دڤێت بریارێ بدە، رەگەزێ مێ زێدەتر گرنگیێ پێ بدە و د ناڤ ئورگانێن پارتی دا بھێنە زێدەکرن داکو بشێت د گەل رەگەزێ نێر ل جھێن بریارێ دابن.
  5.   پارتی دڤێت بریارێ بدە، شێوازێ رێکخستنا خوە بگوھرینە و زێدەتر گرنگیێ ب رێکخستنێن پیشەیی و جەماوەری بدە.
  6.   پارتی دڤێت بریارێ بدە، کو راگەھاندنا وێ ب دیتن و بیھستن و خواندن و ئەلکترونی بھێتە گوھرین کو د گەل قوناغا ھەنوکەیی و خواستێن خەلکی بگونجە.
  7.   پارتی دڤێت بریارێ بدە، بوردێن راوێژکاری یێن خوەبەخش ل ھەموو سەکتەرێن ژیانێ دروست بکە، داکو گەلەک ژ نێزیک گوھداریا خەلکی بکە، ژ بۆ ھندێ پارتی و خەلک ببنە دوو بازنێن پێکڤە گرێدایی بۆ ھەردەمی.
  8.   پارتی دڤێت بریارێ بدە، ھەر کاودانەکێ بھێتە پێش دڤێت چوار  سالان جارەکێ کونگرێ خوە بکە و ئەندمێن کونگرەی ل سەر ھندەک پیڤانێن لێزانی و شارەزایی بھێنە دەستنیشانکرن و باراپتری ب مەرکەزیەت بن.
  9.   پارتی دڤێت بریارێ بدە، ب ھەر رێکەکا ھەبە کادرێن دلمایی و جەماوەرێ عاجز ل خوە ئاشت بکەتەڤە و زێدەتر گرنگیێ ب بازنێن ھەلبژارتنان بدە.
  10.   پارتی دڤێت بریارێ بدە، دلسۆزێن رێبازا بارزانی گرنگیێ پێ بدە و د ناڤ سازیێن حزبی و حکومی دا جھێ وان پەیدا بکە و ئەو ل جھێ بریاردانێ دا بن .
  11.   پارتی دڤێت بریارێ بدە، میکانیزمەکێ بۆ ئەندامێن پەرلەمانێ عیراقێ و کوردستانێ و جڤاتێن پارێزگەھان دابنە ل دەمێ کاری دا و پشتی کارێ وان ، دڤێت ئەو کار ببیتە کارەکێ بەرپرسیارەتی نەک بتنێ ئیمتیاز وەرگرتن و ھەر ئێک ب کەیفا خو بە.
  12.   پارتی دڤێت بریارێ بدە، گەلەك ب جدی ل مەكانیزم و پیڤانێن دووڤچون، سزادان، ھەلسەنگاندن و خەلاتكرن  كار بكە ژ بەر كو ئەڤە ب پاشەرۆژا پارتیێ ڤە گرێدایی یە.
  13.  پارتی دڤێت بریارێ بدە، گەلەک ب جدی ل سەر ژێدەرێن مرۆڤی کار بکە و ل کەسێن خودان شیان بگەرە و ھزرو پرۆژێن وان بێخە د خزمەتا خەلکی دا.
  14.   پارتی دڤێت بریارێ بدە، کو ھەر ئاریشەو کێماسیەکا ھەبە، د رێکا تێگەھاندن و پێگەھاندنێ  چارەسەر دبە. لەورا دڤێت ب بەردەوامی ل سەر       ھەرسێک ئاستێن؛  لق،  ناوچە و  سەرکردایەتی ب بەردەوامی خولێن جوراو جور ڤەکە و قوتابخانا حزبی یا بەردەوام بە.
  15. پارتی دڤێت بریار بدە، جارەكا دی ھەموو سازی و ئۆرگانێن خوەدا بزڤریتەڤە و بنەمایێن رێبازا بارزنی ئەو ژی: مرۆڤایەتی، كوردایەتیا راستەقینە، نشتمانپەروەری، دادپەروەریا جڤاكی، لێبورین و پێكڤەژیان، دلسوزی و لێزانی، ژینگەھپارێزی، رێزگرتن ل فرەیی و دەمۆكراسیێ، راستگۆیی و شەفافیەت و خوەنەچەماندن.

 ل گوور باوەریا من ئەڤ (15) خالە ئەگەر پارتی ب جدی ل سەر کار بکە، ژیێ وێ ل (74) سالان دێ ببە (740) حەفت سەدو چل سال و ھێشتا زێدەتر ژی.

 چونکە وەکو کورە شەھیدەک دوھی و ئەڤرۆ و سوبەھیا گەلێ کوردستانێ بتنێ ب پارتی و رێبازا بارزانی ڤە گرێدایی یە.  لەورا د چوارچوڤێ ھەستکرن ب بەرپرسیارەتیێ ژ بۆ جھێن بریارێ د ناڤ پارتی دا بەرچاڤ دکەم و ھیڤیدارم جھێ مفا وەرگرتنێ بن.

عبدالعزیز محسن بارزانی

 15-8-2020

ترکیا-ئەنقەرە

Back to top button