پشتی بوویەرێن ل سوورییێ قەومین و هەرفینا رژێما ئەسەد و پارتییا بەعس، ئێدی رەوشا رۆژاڤایێ کوردستانێ و پرسا مافێن گەلێ کورد ل وێ پارچەیا کوردستانێ بە ئاوایەکی گەرم بوو مژارا گۆتوبێژان. د ڤێ دەربارێ دا گەلەک شرۆڤە و نرخاندن ب ئاوایێن جودا کەتن رۆژەڤێ.
وەکە من تێبینی کری د ڤان شرۆڤە و نرخاندنان دا تێگەهیشتنەک شاش دهات بەرگوهێ مرۆڤی و من خوەست ب ڤێ کورتە نڤیسێ وێ شاشییێ بەرچاڤ بکم و سەراست ژی بکم.
پرانیا سیاسەتمەدار و شرۆڤەکار د وێ باوەرییێ دا نە کو پەیەدە و هەسەدە گرێدایی پەکەکێ و قەندیلن و د بریارا خوە خوەدا نە سەربخوە نە و ژبۆ پرسا کورد ل رۆژاڤایێ کوردستانێ بەرهاڤێتی نەبە و ئەڤ دەلیڤە و فرسەتا زێرین ژ دەست کوردان نەچە دڤێ پەیەدە و هەسەدە تێکەلیێن خوە ب قەندیل را قوت بکن و ب یەکجاری خوە ژ بندەستێ پەکەکێ رزگار بکن و د بریارێن خوە دا سەربخوە بن و وەک کوردێن رۆژاڤایێ کوردستانێ د بەرژەوەندیا وێ پارجەیا کوردستانێ دا تەڤبگەرن.
ژ بۆنا کو پەیەدە و هەسەدە هەبوون و دەستێوردانا پەکەکێ د بریار و کاروبارێن رۆژاڤایێ کوردستانێ دا مەشروع بکن، دبێژن: ئەنەکەسە ژی گرێدایی پەدەکێ یە و سەرۆک بارزانی پشتگریا وان دکە. هەلبەت ئەڤ دو هەڤبەرکرن گەلەک شاشن و ژ راستیێ و واقعی گەلەک دوورن. لێ بەری ئەز ڤێ شاشیێ سەراست بکم و ئەز دێ بەحسا دو بوویەران بکم:
بوویەرا یەکەم: دەما سەرۆکێ نەمر مستەفا بارزانی ب پێشمەرگەیێن خوە ڤە چوویە رۆژهەلاتێ کوردستان کو بەشداریێ د ئاڤاکرن و پاراستنا کۆمارا کوردستانێ ل مهابادێ دا بکە، بارزانی یێ نەمر خوە وەکە بەدیلێ نەمر پێشەوا قازی فەرز نەکر، تەدەخول د بریارێن کۆمارا کوردستانێ دا نەکر، دەستێوردان د کاروبارێن کۆمارێ دا نەکر، بارزانی خوە وەک پێشمەرگەیەک کۆمارێ حساب دکر و د گۆتەنەکا خوە دا دبێژە: ژ بۆ من شەرەفەکا مەزنە ئەز پێشمەرگەیێ کۆمارا کوردستانێ بم.
بوویەرا دویەم: تەڤی هه‌موو ئاسته‌نگی و ڕێگرییان، سه‌رۆک مەسعود بارزانی، د ده‌ما داگیرکرنا کۆبانێ دا ژ ئالیێ تەرۆریستێن داعیش ڤە و کۆبانێ ل بەر کەتنێ بوو، و ژ خەمخوریا وی یا ژ بۆ یه‌کیتیا کوردان ، ب دپلۆماسیا خوە یا ژیر کاری هێزێن هەڤپەیمانان و دەولەتا داگیرکەر یا ترکیێ رازی بکە و پێشمه‌رگه ب چەکێن گرانە ڤە شاندن کۆبانێ. پێشمەرگەیان مل ب ملێ شەرڤانان کۆبانێ ژ دەستێ تەرۆریستێن داعیش رزگار کر و ب سەربلندی ڤەگەریان باشوورێ کوردستانێ. پێشمەرگە ل ور نەمان و دەستێوردان د کاروبارێن وێ پارچەیا کوردستانێ دا نەکر.
نها بەرسڤ ژ بۆ وان کەس و ئالیێن دبێژن مانێ ئەنەکەسە ژی گرێدایی پەدەکێ بارزانی یە ژ بۆنا کو دەستێوردانان پەکەکێ ل رۆژاڤایێ کوردستانێ مەشروع بکن:
١- چو هێزێن پێشمەرگە یێن پەدەکێ ل رۆژاڤایێ کوردستانێ نینن. ب گۆتنەک دن یەک چەکدارێ پەدەکێ ل وێ پارجەیا کوردستانێ نینە
٢- شێوەرمەند و راوێژاکارێن پدەکێ و سەرۆک بارزانی ل رۆژاڤایێ کوردستانێ نینن.
٣- ئه‌نکسه ژ چه‌ند پارتی و ڕێکخستنێن جودا پێکتێ و هنده‌ک ژ وان پارتیان سالێن ٥۰-٦۰ئان هاتنه ئاڤاکرن و ژ هینگێ وه‌ره ژ بۆنا مافێن گه‌لێ کورد ل ڕۆژاڤایێ کوردستانێ دخه‌بتن د ڤێ ڕێدا گه‌له‌ک قوربانی ژی دانه. نها به‌شه‌کن ژ مخالفه‌تا سووریێ و د ناڤ ئیتیلافا سووری دا جهدگرن و بەشەکن ژمخالفەتا سووریێ و د ناڤ ئیتیلاف سووری دا جهدگرن.
٤- سەرۆک بارزانی ئەکتۆرەکی سەرەکە یێ هەرێمی یە و رۆلا وی د چارەسەرکرنا پرسگرێکێن ناڤچەیێ دا ب ئاشتی و دیالۆگێ دا هەیە. ژ ئالیێ زلهێزێن جیهانێ و ەکێتیا ئەورۆپایێ ڤە فیگۆرەک وەبوولکریە و پر جاران دەولتێن زلهێز ژ بۆ دیتنا چاەرەسیا هندەک ئاریشەیان ب سەرۆک بارزانی را دشێورن.
ژ ئالیێ دن ڤە:
١- ژ دەستپێکا کریزا سووریێ، رژێما سوریێ ب لهەڤهاتن دەڤەرێن کوردستانا رۆژاڤا رادەستی هێزێن چەکدار یێن پەکەکێ کرن. د ڤێ ده‌ربارێ دا ب بێده‌نگی پەیەدە و ئه‌سه‌د ل هه‌ڤ کر کو ڤان ده‌ڤه‌ران تەسلیمی یه‌کینه‌یێن پاراستنا گه‌ل (یەپەگە) بکن ب شەرتێ کو کورد نەچن بەرەیێ ئۆپۆزسیۆنێ و کورد ل دژی ئه‌سه‌د نەراوەستن.
٢- ژ دەستپێکا کریزا سووریێ ڤە ب هەزاران چەکدارێن پەکەکێ ل رۆژاڤایێ کوردستانێ بجهبوون و ب هاریکاریا سووریێ خوە ل ور فەرز کر و دەست ب کوشتن، گرتن و ئەشکەنجەدانا کەس و ئالیێن ب نە ب وان رانە کر.
٣- ب سەدان کادرو، بەرپرسێن لەشکەری و شێوەرمەند و راوێژکارێن پەکەکێ سەرپەرشتیا رۆژاڤایێ کوردستانێ دکن.
٤- ئیدارەیا رۆژاڤایێ کوردستانێ د بن کونترۆلا هێز و چەکدارێن پەکەکێ دایە.
٥- هەموو بریارێن ل سەر چارەنڤیسێ وێ پارچەیا کوردستانێ ژ قەندیل دەردکەڤن. هەر تەڤگەرەک ل رۆژاڤایێ کوردستانێ بەبە دڤێ ب رازیبوونا قەندیل بە.
٦- ژ بۆ مە کوردان شرین بە یان تەحل بە، پەکەکە د لیستەرا تەرۆرێ دا یە، ژ بلی ترکیێ، یەکتیا ئەورۆپایێ و ئەمریکا و دەولەتێن دن پەکەکێ وەکە رێکخستنەکە تەرۆرست ب ناڤ دکن. ژ بەرهندێ ژی ل هەمبەر ئێریشێن دەولەتا داگیرکەر یا ترکیێ بۆ سەر پارچەیێن دن یێن کوردستانێ چاڤێ خوە دگرن و دەنگ ناکن.
ژ به‌ر ڤێ یه‌کێ یه کو، هه‌موو وه‌لاتپارێز و کوردپه‌روه‌رێن کورد داخوازێ ژ پەیەدێ دکن کو تێکه‌لیێن خوه ب پەکەکێ ڕا قوت بکه و هێزێن چه‌کدار، ڕاوێژکار، کادر و به‌رپرسێن پەکەکێ ژ وێ پارچه‌یا کوردستانێ ده‌ربکه‌ڤن، ئه‌گه‌ر ئه‌ڤ یه‌ک نه‌یێ کرن، کورد دێ هه‌ر تشتی ل وێ پارچه‌یا کوردستانێ وندا بکن.
نێرین\شرۆڤە
٢٠٢٥\١\٣
NH
