بەرھەم سالح بو سەرۆك كومارێ عیراقێ لێ چەوا

به‌هره‌م سالح به‌ربژێرێ ینک ێ بوو سه‌رۆک کۆمارێ عیراقێ. بێ گومان رەوشا به‌هره‌م سالح و هلبژارتنا وی وه‌ک سه‌رۆک کۆمارێ عیراقێ گه‌ره‌ک پرالی بێ نرخاندن و سه‌ده‌مێ ڤێ باش بێنه‌ خوه‌ندن. ژ به‌ری هه‌ر تشته‌کی تێ زانین کو به‌هره‌م سالح نه‌ به‌ربژێرێ ینک ێ لێ به‌ربژێرێ قاسم سلێمان بوو. قاسم سلێمان به‌هره‌م سالح ل گه‌ل گرۆبا خیانه‌تا ١٦ێ ئۆکتۆبه‌رێ ب ینک ێ دا قه‌بوول کرن. هه‌روه‌ها به‌هره‌م سالح ب سه‌ر ده‌ستێ قاسم سلێمان ڤه‌گه‌ریا ناڤا ینک ێ ژ بۆ ببه‌ به‌ربژێرێ سه‌رۆک کۆمار. ژ ئالیه‌ک دن ڤه‌ نه‌ غه‌ریبه‌ کو شیعه‌یێن عیراقێ ده‌نگێ خوه‌ بدن به‌هره‌م سالح، ژ به‌ر کو ئه‌و ژ رەفه‌راندوما سه‌رخوه‌بوونێ ڤه‌ دژتیا پدک ێ دکن و ئه‌و به‌هره‌م سالح وه‌ک زه‌مانا رێگرتنا لسه‌رخوه‌بوونا کوردستانێ دبینن. ژ به‌ری دوو رۆژان به‌رپرسێ عەسایب ئەھ‌ل حەق د ناڤا حه‌شدا شه‌عبی ده‌ قەیس غەزعەلی دابوو خوویاکرن کو، ئه‌و دخوازن کورد ل سه‌ر به‌ربژێریا که‌سه‌کی ل هه‌ڤبکن. لێ ئه‌گه‌ر کورد ل هه‌ڤنه‌کن و دوو به‌ربژێرا وه‌رن پارله‌مه‌نتۆیێ، د چه‌رچۆڤا عیراقێ ده‌ شانسێ به‌هره‌م سالح گه‌له‌کتره‌. ژ به‌ر کو د رەفه‌راندوما سه‌رخوه‌بوونێ ده‌ ینک ێ به‌هتر ب ئاقلانه‌ هه‌لوه‌ست دا نیشاندان. یانی گه‌له‌ک ڤه‌کری سه‌رکرده‌یه‌ک یێ هه‌شدا شه‌عبی دده‌ خوویاکرن کو ینک به‌هتر نێزکی به‌غدایێ یه‌ و ته‌رجیحا وان ژ پدک ێ بێهتر دبه‌ ینک. به‌هره‌م سالح پرۆژه‌یا ئیرانێ یه‌ و د هلبژارتنێن پارله‌مه‌نتۆیا عیراقێ و هلبژارتنێن کوردستانێ ده‌ سه‌رکه‌فتنا پدکێ ژ بۆ ده‌ستهلاتا به‌غدایێ و ئیرانێ بوویه‌ جهێ مه‌ترسیه‌ک مه‌زن. یانی گه‌له‌ک ڤه‌کری کوردستانیبوونا پدک ێ و هه‌لوه‌ستا پدکێ ژ بۆ بده‌سخستنا مافێ رەوا یێ گه‌لێ کوردستانێ نه‌ ب دلێ به‌غدایێ یه‌ و ژ بۆ ڤێ یه‌کێ ژی ینک وێ سیاسه‌تا برێڤه‌ دبه‌ و دژتیا وان یا رەفه‌راندوما سه‌رخوه‌بوونێ ل گۆرا دلێ به‌غدایێیه‌. بێ گومان ئه‌ڤ هه‌لوه‌ستا ینکێ دێ باندۆرا خوه‌ ل سیاسه‌تا کوردستانێ ژی بکه‌. نها ئه‌نجامێن هلبژارتنێن پارله‌مه‌نتۆیا کوردستانێ کێم زێده‌ ئه‌شکه‌ره‌ بوونه‌. د ڤێ رەوشێ ده‌ پدک دکاره‌ ب سه‌رێ خوه‌ حوکومه‌تا کوردستانێ دامه‌زرینه‌. ئه‌و تفاقا ستراته‌ژیک د ناڤبه‌را پدک ێ و ینک ێ ده‌ هه‌یی ژ ئالیێ ینک ێ ڤه‌ هاته‌ بنپێکرن و ژ هۆلێ رابوویه‌. ئه‌گه‌ر جاردن پدک ل گه‌ل ینک ێ د پارله‌مه‌نتۆیا کوردستانێ ده‌ هه‌ڤکاریێ بکه‌، دڤێ ژ نووڤه‌ هه‌ر تشته‌کی به‌ربچاڤره‌ ده‌رباس بکه‌. وه‌ک دن شانسێ پدک ێ هه‌یه‌ کو ل گه‌ل ئالیێن دن ژی حوکومه‌تێ دامه‌زرینه‌. یانی ل کوردستانێ گۆتارا دو پارتیێن سه‌ره‌کی واته‌یا خوه‌ د ڤان هلبژارتنان ده‌ وندا کریه‌. هه‌تا کو پدک و بارزانی ده‌وله‌تبوونێ بپارێزن، به‌حسا مافێ رەوا یێن گه‌لێ کوردستانێ بکن، ل سه‌ر خه‌تا نه‌ته‌وی کوردستانی سیاسه‌تێ بکن، دێ به‌غدا ل دژی وان به‌. ئه‌ڤی ئه‌ک ژی ژ بۆ پدک ێ و رێبازا ل سه‌ر دچه‌ سه‌ربلندیه‌ و جهێ شانازیێیه‌. هلبژارتنا به‌هره‌م سالح ته‌سجلێ سیخووریا ئیرانێ و به‌غدایێی، نه‌ کێماسیا پدکێ یه‌. 03.10.2018 دارا بیله‌ک