به‌ره‌یێ کوردستانی یێ سووریەیێ په‌یامه‌کا حه‌فت خالی ئاراسته‌یی هێزێن سووریه‌یا ده‌مۆکراتیک (هەسەدە) دکه و ڕادگه‌هینه: “بجهانینا ڤان خالان و پێکانینا شاندا هه‌ڤپار ژ بۆ دانووستاندنان ب ده‌ستهلاتدارێن نوو یێن شامێ را پێنگاڤه‌ک گرنگه پێخه‌مه‌تی ڕێگرتنا ل سه‌رهلدانا شه‌ره‌کی نوو، گه‌ره‌نتیکرنا مافێن گه‌لێ کورد و ته‌ڤلیبوونا وی د پرۆسه‌یا سیاسی ل سووریه‌یا نوو دا.”
د وێ په‌یامێ دا هاتیه، د ڤێ قۆناخا هه‌ستیار و چاره‌نڤیسساز دا کو کوردستانا سووریه‌یێ تێ را ده‌رباز دبه، دڤێ ئه‌و مه‌ترسی بێ دیتن کو گه‌فان ل پاشه‌رۆژ و هه‌بوونا گه‌لێ مه دکه، خاسما ژی پشتی هه‌رفاندنا ڕژێما ئه‌سه‌د و ئاڤێتنا پێنگاڤان به‌ر ب ئاڤاکرنا سیسته‌مه‌ک سیاسی یا نوو، له‌وما ژی به‌ره‌یێ کوردستانی یێ سووریه‌یێ ئه‌ڤ په‌یام ئاراسته‌یی هەسەدێ کریه و داخوازێ ژێ دکه کو پێنگاڤێن کریاری و جدی ل به‌رانبه‌ری پرسێن هه‌ستیار و چاره‌نڤیسساز باڤێژه کو ئه‌ڤ خالێن ل ژێرن:
یه‌ک: دڤێ ب زووترین ده‌م ده‌ست ب یه‌کالیکرنا چاره‌نڤیسا زیندانیێن سیاسی یێن کورد و بداویانینا دۆزا گرتیان و دیارکرنا چاره‌نڤیسا که‌سێن وندا بکه، کو ئه‌ڤ چه‌ند سالن ل زیندانا ئاخنیۆنێ نه. ژ بۆ ڤێ یه‌کێ ژی، دڤێ ب ئاوایه‌کی فه‌رمی داخوازا لێبۆرینێ ژ وان بکه و وان ژ ئالیێ مادی و مەعنه‌وی ڤه قه‌ره‌بوو بکه ژ به‌ر کو ئه‌ڤ چه‌ند سالن وان ئه‌شکه‌نجه دده و ژ ژیانه‌کا ئاسایی بێپار کرنه.
دو: ڕه‌ڤاندنا که‌چ و کورێن سنێله بداوی بینه کو پێخه‌مه‌تی زێده‌کرنا هێزێن خوه یێن چه‌کدار ژ خواندنێ بێپار کرنه و دڤێ ته‌ڤایا وان ژ بۆ که‌سووکارێن وان بێن ڤه‌گه‌راندن.
سێ: دڤێ پێداچوون ژ بۆ به‌رنامه‌یێن خواندن و فێربوونا په‌روه‌رده‌یی بێ کرن، به‌رنامه‌یه‌ک بێ ئاماده‌کرن کو ب بنگه‌ه و مافێن مرۆڤان و ڕێزگرتنا ل مافێن زارۆکان و ده‌مۆکراسیێ را هه‌ڤ بگره.
چار: دڤێ ب زووترین ده‌م بریارا هلوه‌شاندنا ڕێکخستنا جوانێن شۆره‌شگه‌ر بێ ده‌رخستن، ژ به‌ر کو ڕۆله‌کی نه‌رێنی هه‌یه و به‌ره‌ڤاژی هه‌موو نرخێن جڤاکی یه، هه‌روه‌سا سنێله‌یان دره‌ڤینه و وه‌کی ئالاڤه‌ک ژ بۆ به‌رهنگاربوونا ئالیێن سیاسی یێن دن یێن، ل دژی ده‌ستهلاتا خوه‌سه‌پین ب کار تینه.
پێنج: دڤێ ب زووترین ده‌م شه‌رکه‌رێن\چەکدارێن پارتیا کارکه‌رێن کوردستانێ ژ
سووریه‌یێ بێن ده‌رخستن، ژ به‌ر کو هه‌تا نها ژی زیانا وان ژ بۆ پاشه‌رۆژا کوردستانا سووریه‌یێ هه‌یه، ژ بۆ کو ئێدی ژ بۆنا کو ئەو چەکدار ژ بۆ ده‌ستتێوه‌ردانه‌که دن ئا ده‌رڤه ل کوردستانا سووریه‌یێ نه‌بن به‌هانه‌یه‌ک.
شه‌ش: پابه‌ندبوونا ب فه‌ده‌رالیزمێ وه‌کی باشترین بژارده‌یا سیاسی ژ بۆ داخوازیێن گه‌لێ کورد د ئاڤاکرنا سووریه‌یا نوو دا و گه‌ره‌نتیکرنا مافێن گه‌لێ مه د چارچۆڤه‌یا قه‌واره‌یه‌ک هه‌ڤگرتی ژ بۆ کوردستانا سووریه‌یێ ده.
هه‌فت: گوهه‌رتنا هێزێن هەسەدێ ژ بۆ هێزه‌کا نشتیمانی یا کوردێن سووریه‌یێ و هه‌ڤگرتنا وان ب هێزا پێشمه‌رگه یێن ڕۆژ را د چارچۆڤه‌یا پلانه‌کا دارێتی دا ژ بۆ کو ببن هێزه‌ک هه‌ڤگرتی یا کوردێن سووریه‌یێ و نشتیمانی کو، ئه‌رکێ وێ پاراستنا کوردستانا سووریه‌یێ به.
د داویا وێ ڕاگه‌هاندنێ دا هاتیه، “به‌ره‌یێ کوردستانی یێ سووریه‌یێ بجهانینا ڤان بنگه‌هان وه‌کی گرنگترین پێنگاڤا بله‌ز ژ بۆ پاراستنا کوردستانا سووریه‌یێ د ڤێ قۆناخێ دا دبینه، کو ڕووبروویی مه‌ترسیا شه‌ر و ده‌ستتێوه‌ردانێن نوو یێن ده‌رڤه بوویه، هه‌روه‌سا پێخه‌مه‌تی پاراستنا جانێ وه‌لاتیێن سڤیل و دوورخستنا شه‌ره‌کی نوو.”
هه‌روه‌سا به‌ره‌یێ ناڤبری بجهانینا ڤان خالان وه‌کی پێنگاڤه‌ک گرنگ ژ بۆ پێکانینا شانده‌کا هه‌ڤپار یا سیاسی دبینه کو نوونه‌ریتیا گه‌لێ کورد بکه، ژ بۆ دانووستاندنان ب ده‌ستهلاتا نوو یا شامێ را ل سه‌ر پرسێن چاره‌نڤیسساز و سیسته‌ما نوو یا سیاسی ل سووریه‌یێ.
