ل سه‌ر پێڤاژۆیا ”ترکیه‌یا بێ ته‌رۆر” گه‌له‌ک گۆتوبێژ تێنه کرن. سیاسه‌تمه‌دار، ڕه‌وشه‌نبیر که‌سایه‌تێن کورد ل سه‌ر ڤێ یه‌کێ نرخاندن و شرۆڤان دکن. ئه‌ڤ پێڤاژۆ ژ ئالیێ گه‌له‌ک ڕۆژنه‌مه‌ڤان و ئانالیستێن جیهانی ڤه ژی تێ نرخاندن.
لێ ل ڤێ ده‌رێ ژ بۆ کوردا ، ژ بۆ ته‌ڤگه‌را ئازادخواز ئا کوردستانێ ئه‌ڤ پێڤاژۆ تێ چ واته‌یێ ب ئاوایه‌ک پێوست نایێ شرۆڤه کرن. مرۆڤ دبینه کو، ئالیه‌ک، تایبه‌تی ئه‌و که‌سێن د ناڤا پەکەکێ دا ده‌ما به‌حسا پێڤاژۆیێ دکن ،جوداهیێن ڕامانی ده‌ردکه‌ڤن هۆلێ. هنده‌ک ژ وان بێ قه‌ید و شه‌رت هه‌ر گۆتنا ئۆجەلان ڕاست دبینن و ب چاڤکۆری پشتگرییێ لێ دکن. ژ خوه د ناڤا ته‌ڤگەرا پەکەکێ دا ئه‌ڤ یه‌ک پرانی ب ڤی ئاوایی یە. هنده‌ک ئالی ڤێ یه‌کێ قه‌بوول ناکن و به‌رته‌کا نیشانددن. هه‌تا هنده‌ک گه‌له‌ک ڤه‌کری دبێژن کو، ”ما به‌ده‌لێ ئه‌ڤقاس شه‌ر، شه‌هید و مالوێرانی ئه‌ڤ بوو؟”
دڤێ بێ قه‌بوول کرن کو، ئه‌ڤ پێڤاژۆ ژ ئالیێ ده‌وله‌تێ ڤه هاتیه پلانکرن و تێ ڕێڤه‌برن. ڤێجا گۆتن و نرخاندنێن جور ب جور ڤێ ڕاستیێ ناگوهه‌رە.
یا هه‌ری ئاقلانه ئه‌وه کو، کورد ب ئاوایه‌ک ڕه‌ئالیست به‌رێ خوه بدن ڤێ پێڤاژۆیێ و د چارچۆڤه‌یا به‌رژه‌وه‌ندی و پاشه‌رۆژا کوردان دا نرخاندن و شرۆڤه‌یێن خوه بکن.
ده‌ما ب دیتنێن ئیدیۆلۆژیک ئه‌ڤ پێڤاژۆ بێ نرخاندن ، دێ جاردن ئه‌نجامێن نه ڕاست و زه‌ره‌رێ بدن ته‌ڤگه‌را ئازادیخواز ئا کوردستانی ده‌رکه‌ڤن هۆلێ. لێ ئه‌گه‌ر ئه‌ڤ پێڤاژۆ د چارچۆڤه‌یا به‌رژه‌وه‌ندییێن کوردستانی و ده‌وله‌تبوونا کوردان دا بێ نرخاندن و هه‌روه‌ها ل گۆرا ڤێ مرۆڤ ببه خوه‌دی هه‌لوه‌ست دێ ئه‌نجامێن ڕاست ده‌رکه‌ڤن هۆلێ.
تشتا کو ئۆجەلان ب ڕێیا به‌رژه‌وه‌ندییێن ده‌وله‌تێ دبێژه ڤه‌کریه: دێ کورد ب ترکیێ ڤه بێنه ئه‌نته‌گره‌کرن. گه‌لۆ ما شه‌رێ ٤۰ سالی ژی نه ژ بۆ ڤێ یه‌کێ بوو؟ نها ژ بۆ چ هنده‌ک سیاسه‌تمه‌دار وه‌ک ماتمایی مایین ڤێ پێڤاژۆیێ دنرخینن؟
ئه‌ڤ پێڤاژۆ ئه‌گه‌ر ب ڕاستی چه‌کدانینا چه‌کدارێن پەکەکێ ب ته‌مامی پێکبینه، گه‌له‌ک باش دبه. پەکەکێ خوه هلوەشاندیە. هێدی ب چ ناڤی و ب چ جوره‌یی ته‌ڤدگه‌ره دێ نه وه‌کی به‌رێ به. گه‌له‌ک ئالیێن کوردا پەکەکە وه‌ک ئاسته‌نگی د ڕێیا ته‌کۆشینا ده‌وله‌تبوونا کوردان دا ددیت. ئه‌ڤ ڕاستیه‌ک بوو. لێ ئیرۆ ب ڤێ بریارێ ئۆجەلان و پەکەکێ ب خوه ئه‌ڤ ئاسته‌نگ ڕاکر. یانی ئه‌ڤ هه‌لوه‌ست ژ بۆ ته‌ڤگه‌را ئازادیخواز ئا کوردستانێ نه زیان لێ ده‌ستکه‌فتیه‌که.
کوردێن نشتمانپه‌روه‌ر د ناڤا پەکەکێ دا ئیرۆ وه‌ک سه‌رێ وان ل کۆلانەکێ ل دیواره‌کی بکه‌ڤه ڤه‌دژن. ئه‌ڤ ڤه‌ژین دێ ببه سه‌ده‌مه‌ک کو، به‌رژه‌وه‌ندیێن نه‌ته‌وی ژ ئالیێ وان ڤه بێن دیتن و ئه‌و دێ بکاربن ببن ته‌ڤگه‌ره‌ک جدی د ناڤا ته‌ڤگه‌را ئازادیخواز یا کوردستانێ دا. بێ گومان ئه‌ڤ یه‌ک هیڤییەکە، لێ د هه‌مان ده‌مێ دا ڕاستیه‌ک ژی یه.
ل باکورێ کوردستانێ، شه‌رێ بێ واته کو، ژ ئالیێ پەکەکێ ڤه دهات کرن، زه‌ره ددا ته‌ڤگه‌را کورد و مله‌تێ کورد ژی. ژ خوه ئه‌ڤه نێزکی چه‌ند سالان بوو ل باکورێ کوردستانێ ئه‌ڤ شه‌ر ب فعلی نه‌مابوو. نها داخوازیا ده‌کله‌ره‌کرنا سه‌کناندنا شه‌ر و ده‌ستژێبه‌ردانا چه‌کان دێ ڕێیا سیاسه‌ته‌ک ب مه‌تۆدێن ده‌مۆکراتیک و ڕێیا دیالۆگێ ڤه‌که. کورد دکارن ب ڤێ ڕێیێ ژی دیتن و داخوازیێن خوه یێن هه‌ری ڕادیکال بێخن ڕۆژه‌ڤێ و دۆزا مافێ خوه یێن نه‌ته‌وی و ڕه‌وا بکن.
ئه‌م هه‌می دزانن کو، پرانیا چه‌کدارێن پەکەکێ ل باشوورێ کوردستانێ د خزمه‌تا کێ دا بوون و ژ بۆ به‌رژه‌وه‌ندییێن کیژان ئالیان چه‌کێن خوه ب کار دئینان. گه‌لۆ پەکەکە نه ته‌هدیده‌ک بوو ل سه‌ر ده‌ستکه‌فتیێن نه‌ته‌وی ل باشوورێ کوردستانێ؟ ئه‌گه‌ر ئیرۆ ئه‌ڤ ته‌هدید ژ هۆلێ بێ ڕاکرن، ئه‌و چه‌کێن د خزمه‌تا دژمنێن کوردستانێ دا ل باشوور بێنه دانین دێ نه باش به و نه د به‌رژه‌وه‌ندائویا ده‌وله‌تبوونا کوردان دا به.؟ ڕاستی ئه‌ڤ پرسێن گرینگن. لێ ڤێجا کی چه‌وا دنرخینه ئه‌و ژی به‌حسه‌ک دنه.
تشتا کو دخوه‌یێ پەکەکە هێژا د ناڤا خوه ده نه زه‌لاله. داخوویانیێن به‌رپرسێن پەکەکێ هه‌ر چقاس ته‌ئیدا ”سه‌رۆکاتیێ” دکن، لێ د گه‌له‌ک مناسه‌به‌تان دا دیتنێن ل دژی ئۆجەلان ژی د ڤێ پێڤاژۆیێ دا ددن.
د ئه‌نجام دا، ڤه‌کرنا ڕێیا سیاسه‌ته‌ک ب مه‌تۆدێن ده‌مۆکراتیک و تێگهشتنا ڤه‌کرنا ده‌ریێن دیالۆگێ به‌رێ سیاسه‌تا ته‌ڤگه‌را کورد گه‌له‌مپه‌ری به‌ر ب پێڤاژۆیه‌ک دن ڤه دبه.
د ڤێ پێڤاژۆیێ دا، ئینسیاتیف ئا ده‌وله‌تێ یه. ژ بۆ ڤێ ژی به‌رپرسێن ده‌وله‌تێ ڤه‌کری دبێژن کو، چو بازاری نه‌هاتنه کرن و به‌رپرسێن ده‌وله‌تێ دبێژن کو، ئه‌ڤ پێڤاژۆیا “ترکیه‌یا بێ ته‌رۆره” که‌سه‌ک ژی ل دژی ڤێ چو داخوویانی نه‌دانه و وه‌لێ ژی تێ قه‌بوولکرن.
ل ترکیێ و باکورێ کوردستانێ دا کێماسیا هه‌ری مه‌زن د ڤێ پێڤاژۆیێ دا جهنه‌گرتنا ئالیێ کوردانه.
