ئیسماعیل بەشیکچی ل سەر سنوورێ باکوور و باشوور دکەڤیتە بۆسەیا پێشمەرگەی
بەشیکچی د بیرەوەریێن خوە دا دنڤێسیت:” دەما ل سالا 1963 ل دەڤەرا گەردیان ل رووباروکێ ل بەرامبەر دەڤەرا مێرگەسۆرێ جێگرێ ئەفسەری بووم و من ل وێرێ خزمەتا خوە یا لەشکەریێ دکر. 8 هەشت کلم ژ سنووری دا بوونە من کو ئەز چاڤدێریی لێبکەم و نەهێلم کەس ب قەچاغی لێ دەرباز ببیت. جارەکێ ئەز و هەر 11 لەشکەرێن دەستەیا خوە دچووین، مە هند دیت کو ئەم راستی گرۆپەکا چەکداران هاتین و وان دەستپێکر ب زمانەکی هندەک تشت گۆتن ئەز تێنەگەهەشتم. لەشکەرەکێ خەلکێ قەرسێ دگەل مە بوو هات گۆتە من: ”فەرماندارێ من ئەز زمانێ ڤانا دزانم.” پاشی ئەو لەشکەرەکێ خەلکێ قەرسێ چەند خولەکان دگەل چەکداران ئاخفت و ل من زڤری و گۆتە من: ” فەرماندارێ من ئەڤە ژی وەکی مە لەشکەرن، ئەو پێشمەرگە یێن بارزانی نە. ئەو یێت بێژنە مە: وە سنوورێ دەربازکری، هوونێن هاتینە ناڤ ئاخا مە. دڤێت بزووترین دەم هوون بزڤرنەڤە.” دەرکەت کو مە رێیا خوە یا شاش کری و ئەمێت چووینە ناڤ ئاخا باشوور، لۆما ئەم جارەکا دی زڤرینەڤە. هینگێ دەولەتا ترکی دگۆت کورد نینن و چ زمانێ کوردی نینە. ئەوێن دبێژنێ کورد ئەو ژی ترکێن چیانە. لێ دەما من ئەڤە دیتی کو کەسەکی خەلکێ قەرسێ بێ ئارێشە دگەل ڤان پێشمەرگە یێن ئالیێ دیێ سنووری دئاخڤیت و تێکدگەهەن بێ ئارێشە. هینگێ درەوا تیورا دەولەتا ترکی بۆ من ئاشکرا بوو. “
ژ فێسبۆكێ: رزگار كێستەیی
