سه‌رۆک بارزانی، dگه‌ل رۆژنامه‌یا “ئالوافد” ئا مسری هه‌ڤپه‌یڤینه‌ک کر و د ده‌ستپێکا هه‌ڤپه‌یڤینێ دا رۆژنامەڤان دنڤیسە: “سه‌رۆک بارزانی رێبه‌ره‌کێ دیرۆکی یه، وی خه‌مێن وه‌لاتێ خوه هلگرتنە سه‌ر ملێ خوه، گیانا خوه ژ بۆ پاشه‌رۆژا مله‌تێ خوه ته‌رخان کر و ره‌وشێن زه‌حمه‌ت و دژوار نه‌کارینه وی بترسینن.”
رۆژنامه‌ڤانا مسری، دینا دیاب، کو ل هه‌ولێرێ ئه‌ڤ هه‌ڤپه‌یڤین ب سه‌رۆک بارزانی را کریه، دبێژه؛ سه‌رۆک مه‌سعود بارزانی “ب واته‌یا گۆتنێ، رێبه‌ره‌کێ دیرۆکی یه، وی خه‌مێن وه‌لاتێ خوه هلگرتن سه‌ر ملێ خوه، گیانێ خوه کر بارمته‌یا پاشه‌رۆژا مله‌تێ خوه، ژ چو زه‌حمه‌تی و ئاسته‌نگیان نه‌ترسیا. وی چه‌کێ تێکۆشینا ژ بۆ گه‌لێ خوه هلگرت و ژ رۆژهلات هه‌تا رۆژاڤا ل سه‌ر روویێ عه‌ردێ گه‌ریا و داخوازا مافێ وه‌لاتێ خوه کر. د ناڤبه‌را هه‌لوه‌ستێن خوه یێن سیاسی و تێکۆشینا خوه دا، د به‌لگه‌کرنا دیرۆکا گه‌لێ خوه دا، کێلیه‌کێ ژی دودلی نه‌بوو و ژیانا خوه ژ بۆ پێکانینا ئه‌رکه‌ک نشتمانپه‌روه‌ری ته‌رخان کر.”
رۆژنامەڤان دنڤیسە: “سه‌رۆک مه‌سعود بارزانی، سه‌رۆکێ نه‌ته‌وه‌یا کورد، سه‌رۆکێ پارتیا ده‌مۆکراتا کوردستانێ یه. سه‌رۆکێ گه‌لێری و سه‌رۆکێ خه‌ون و سه‌مبۆلا گه‌لێ کوردستانێ یه. ئه‌و نرخ و نه‌ریتێن جڤاکا کوردی به‌رجه‌سته دکه، ژ بلی وێ ژی مالباتا وی ل کوردستانێ خوه‌دی پێگه‌ها ئۆلی و خوه‌دی دیرۆکه‌ک درێژ یا خه‌باتا ژ بۆنا مافێن کوردانه.”
دینا دیاب ددە زانین: “ده‌ما کو بارزانی دیت کو رۆژهلاتناس دیرۆکا کوردان ب بوویه‌رێن ده‌ره‌وین به‌لگه دکن و راستی و خه‌یالان ته‌ڤلیهه‌ڤ دکن، بریار دا ب ئه‌رکێ خوه یێ کو، ژ هلگرتنا چه‌ک نه کێمتره، رابه و دیرۆکا گه‌لێ خوه د چه‌ند پرتووکان دا به‌لگه بکه. یا داوین ژی پرتووکه‌ک ب ناڤێ “بۆ دیرۆک” بوو، کو ب زمانێ عه‌ره‌بی ده‌رکه‌تبوو و تێ دا بوویه‌رێن راست وه‌ک شاهدێ سه‌رده‌مێ ب وێنه، به‌لگه و نه‌خشه‌یان دیرۆکا وه‌لاتێ خوه زەلال دکە.”
دینا دیاب دده خویاکرن: “د ده‌ما من لێکۆلین ل سه‌ر کارووبارێن ناڤده‌وله‌تی، ب تایبه‌تی گه‌لێن کو رێخستنا توندره‌و داعش ژ هۆلێ راکربوون دکر، ئه‌ز راستی ڤێ پرتووکێ هاتم. من دیت کو ئه‌و به‌حسا راستیا ب ئێش و گرنگ یا د ڤی واری دا دکه. ب راستی ڤێ پرتووکێ باندۆر ل من کر و من چه‌ند گۆتار ژی ل سه‌ر وێ نڤیساندن.”
رۆژنامه‌ڤانا مسری دبێژه: “ رۆژنامه‌ڤانێ ئیراقی در. قه‌یس ئه‌لره‌دوانی تەلەفۆنا من کر و وی ژ من را گۆت، رێبه‌ر (سه‌رۆک بارزانی) ژ نێزیک ڤه تشتێ من ل سه‌ر وی نڤیساندنه دشۆپینه، ژ به‌ر کو ئه‌و ب به‌رده‌وامی مه‌دیایا ناڤده‌وله‌تی ب گشتی و مه‌دیایا عه‌ره‌بی و مسری ب تایبه‌تی دشۆپینه و ئه‌و رازی بوویه کو ئه‌ز هه‌ڤپه‌یڤینه‌کا رۆژنامه‌ڤانی یا بله‌ز پێ را بکم. ب راستی ژی ئەز ژ ڤێ پەیوەدنیا تەلەفۆنی سەرسام بووم”
دینا دیاب دده زانین: “هه‌ما ئه‌ز گەهشتم بالافرگه‌ها هه‌ولێرێ، وێنه‌یێن سه‌رکرده‌یێ کورد ل هه‌ر ده‌رێ هه‌بوون و وێنه‌یه‌کی وی یێ تایبه‌ت ل سه‌ر دیواران بوو بالا من کشاند، کو تێ دا خویا دکه ئه‌و ژ ئالیێ ئه‌ندامه‌کی ئاساییشێ ڤه تێ پشکنینکرن. ئه‌و رێبه‌رێ سه‌مبۆلیک ێێ گه‌لێ خوه یه و د هه‌موو ره‌وشان دا ژی نموونه‌یه‌که.”
دینا دیاب دبێژه: “پشتی چه‌ند ده‌مژمێران ژ هاتنا من، من زانی کو ژ به‌ر ناکۆکیێن ره‌وشا سیاسی یا ئیراقێ ده‌ما سه‌رۆک بارزانی ژ بۆ هه‌ڤپه‌یڤینێ تێرێ ناکه، ژ به‌ر کو رۆژا هه‌ڤپه‌یڤینێ ب ڤه‌کشینا موقته‌دا سه‌در ژ پەرلامه‌نتۆیێ را هه‌ڤده‌م بوو کو ره‌وشا ئیراقێ ته‌ڤلیهه‌ڤ بوو، لێ نه‌بوونا ده‌مێ نه‌بوو رێگر کو سه‌رۆک به‌شه‌ک ژ ده‌ما خوه یا گرانبوها ژ بۆ هه‌ڤدیتنا ب من را ڤه‌قه‌تینه.”
رۆژنامه‌ڤانا مسری بالێ دکشینه سه‌ر: “ترسێ هه‌ستێن من کۆنترۆل دکر و ته‌ڤلیهه‌ڤی ل سه‌ر روویێ من دیار دبوو، رێبه‌ر تێگەهشت چ ب من را دبه، ڤێچا ژ کێلیکا یه‌که‌م ڤه وی قه‌شا حه‌لاند و پێشوازیا وی یا گه‌رم هشت کو ترس ژ هۆلێ رابه و مه ده‌ست ب هه‌ڤپه‌یڤینێ کر. ئه‌ڤ هه‌ڤپه‌یڤینا هه‌ری گرنگ یا د دیرۆکا کارێ من یێ رۆژنامه‌ڤانیێ دا یه.”
دیاب دبێژه؛ “هه‌ڤپه‌یڤین، دییالۆگه‌ک بالکێش بوو. سه‌رۆک ب پرسا، مسر چاوا یه؟ ده‌ست پێ کر. به‌رده‌وام کر ژی: من چه‌ند جاران سه‌ردانا وی وه‌لاتی کریه، ئه‌و وه‌لاته‌کی خوه‌شه. من تێ دا سه‌ردانا پیرامیدان و هه‌ر وه‌ها موزه‌خانه‌یا مسرێ کر.”
دینا دیاب وها پێ ده دچه: “من به‌رسڤا وی دا، حه‌مد ژ خوه‌دێ را، ره‌وش ئارامه، گه‌لێ مسرێ هه‌ر تم ب گه‌لێ کورد را تێکلداره، د ناڤبه‌را هه‌ر دو وه‌لاتان دا پێوه‌ندیێن کوور هه‌نه کو دگەهیتە شارستانیا مسرێ یا که‌ڤنار. پێوه‌ندیان ژ میتانیان، باڤ و کالێن کوردان ڤه ب پادیشاهێن فرعه‌ونان را ژ سه‌دسالا چارده‌هان به‌ری زایینێ ڤه ده‌ست پێ کرنه. پشت را، پشتی فه‌تحا ئیسلامی، کورد ل مسرێ پر به‌لاڤ بوون، ب تایبه‌تی د سه‌رده‌ما سه‌لاحه‌دینێ کورد دا کو بوو سه‌ده‌م کورد، وه‌کی مرۆڤێن حکوومه‌ت، رێڤه‌به‌ری، سه‌رۆکێن له‌شکه‌ری و هه‌تا له‌شکه‌ر، بازرگان و خوه‌نده‌کار ل مزگه‌فتا ئه‌زهه‌رێ بێن مسرێ. هه‌ر وها گه‌له‌ک کوردێن دن یێن کو چاند و کولتورا مسرێ ده‌وله‌مه‌ند کرنه هه‌نه، وه‌ک هه‌لبه‌ستڤان ئه‌حمه‌د شه‌وقی، نڤیسکار عه‌بباس مه‌حموود ئه‌ل-ئه‌ککاد، کو دایکا وی کورده و هه‌روها ده‌رهێنه‌رێ مه‌زن عه‌لی به‌درخان و گه‌له‌ک که‌سێن دن.”
ڕۆژنامه‌ڤانا مسری ببیر دخه: “من ژێ پرسی، تو چاوا ڤێ پێوه‌ندیا دیرۆکی یا مسر و کوردان دبینی؟ وی به‌رسڤ دا و گۆت، پێوه‌ندیا کوردان ب هه‌موو گه‌ل و وه‌لاتێن هه‌رێمێ را دیرۆکی یه، چ ئه‌گه‌ر د سه‌رده‌مێن نه‌یینی و چ ئه‌رێنی را ده‌رباس بووبن، لێ ب مسرێ را هه‌ر تم پێوه‌ندیێن مه باشن.”
دیاب دبێژه؛ سه‌رۆک بارزانی گۆت: “سه‌رۆک عه‌بدولناسر، نه ته‌نێ ل مسرێ، لێ به‌لێ ل هه‌رێمێ ب گشتی و ب تایبه‌تی ژی ژ بۆ ته‌ڤگه‌رێن پێشڤه‌روو و ته‌ڤگه‌رێن رزگاریخوازێن گه‌لێن بنده‌ست، شۆره‌شه‌ک مه‌زن پێک ئانی. د ڤێ چارچۆڤه‌یێ دا ژی، عه‌بدولناسر ب گه‌رمی پێشوازی ل رێبه‌رێ ته‌ڤگه‌را رزگاریخوازا نه‌ته‌وی یا کوردستانێ رێبه‌ر مسته‌فا بارزانی کر و بەرهەڤیا مسر و شۆره‌شا وێ ژ بۆ راوه‌ستانا ل کێله‌کا گه‌لێ کورد نیشان دا.”
رۆژنامه‌ڤانا مسری داویێ دبێژه؛ سه‌رۆک بارزانی هه‌روها گۆت: “بێگومان داخوازا مه ژ پێوه‌ندیێن کو نها هه‌نه زێده‌تره و ئه‌م کار ژ بۆ پێشخستنا وان ئا زێده‌تر دکن.”
