بوێ بریارێ هه‌ستیه‌ک ئاڤێتە به‌ر ده‌وله‌تا ترک
پکک/پید پرۆڤۆکاسیۆن دکه، ئێرش و ئیشگالا ده‌وله‌تا ترک ته‌شویق دکه…
د ناڤ کوردان ده بریارا ئه‌مه‌ریکایێ د ده‌ربارێ سێ به‌رپرسیارێن پککێ (م. کارایلان، جه‌میل بایک، دووران کالکان) ده نقاشه و گه‌نگه‌شی دبه. له‌ورا ژ بۆنا کوردان ل ڕۆژاڤایێ کوردستانێ ترسا ئێرش و داگیركەریا ده‌وله‌تا ترک یا نوو هه‌یه.
ده‌وله‌تا ترک ڤێ یه‌کێ گه‌له‌ک ئاشکه‌ره ژی دیار دکه. کورد ژی دخوازن کو پێشیا ڤێ ئێرشێ وداگیركەریێ بێ گرتن.
لۆما ئه‌ز دبێژم کو “بریارا ئه‌مه‌ریکایێ د ده‌ربارێ ۳ به‌رپرسیارێن پککێ ده، بریاره‌که ستراته‌ژیک و گرینگه. ئەڤ بریار د ده‌مه‌ک تایبه‌ت ده هات گرتن. هیچ شک تێدا نینە کو ڕاسته ڕاست ب کوردان و ب ڕۆژاڤایێ کوردستانێ ڕه گرێدایی یه.
ئه‌مه‌ریکا د بریارا خوه ده خوه‌دیێ چه‌ند ئارمانجا یه. لێ ژ ڤان ئارمانجان یه‌ک ئارمانجه‌ک سه‌ره‌که یه. ئارمانجێن دن دویه‌مینن.
ئارمانجا یه‌که‌مین یا بریارا ئه‌مه‌ریکایێ، پێشی ل ده‌وله‌تا ترک گرتنه. وه‌ک تێ زانین ده‌وه‌لاتا ترک دبێژه کو “فه‌رقا پیدێ و پککێ نینه. پیدە ژی پککێ یه و ب ده‌ستێ پککێ هاتیه ئاڤا کرن. پککێ ته‌رۆریست و دژمنێ مه یه. ئه‌و دخوازه ل سینۆرا مه ده‌وله‌ته‌که ته‌رۆری ئاڤا بکه. ئه‌مه‌ریکا ژی، ژ پیدێ ڕه پشتگریێ دكە. ئه‌م ژی ژ بۆنا پێشیا ئاڤاکرنا ده‌وله‌تا ته‌رۆرێ بگرن (کو ده‌وله‌تا ترک نه به‌س ل دژی ده‌وله‌تا پکک/پیدێ یه، د هه‌مانده‌م ده ل دژی ده‌وله‌تا کوردانه ژی)، وه‌ک عەفرینێ ئه‌مێ بچن ده‌ڤه‌رێن دن یێن کوردستانێ ئیشگال بکن.”
ئه‌مه‌ریکا ژ بۆنا پێشیا ڤێ ئێرشێ و ئیشگالێ بگره د ده‌ربارێ ۳ به‌رپرسیارێن پککێ ده بریار گرت. ب گۆتنا گه‌لێ مه، هه‌ستیه‌ک ئاڤێتن به‌ر ده‌وله‌تا ترک.”
دڤێ هه‌موو کورد و ب تایبه‌تی ژی کوردێن ڕۆژاڤایێ کوردستانێ و پکک/پیدێ ب ڤێ حەساسیه‌تێ ته‌ڤبگه‌رن. گۆرا نه‌رینێن ئه‌مه‌ریکایێ ڕاست ده‌رکه‌ڤن خوه ڕێكبخن و سه‌ڕاستکرنێ بکن.
پکک/پید، ب له‌زووبه‌ز ل ڕۆژاڤایێ کوردستانێ هه‌موو سه‌مبۆل و وێنه‌یێن پککێ ژ هۆلێ ڕاکه. ب تایبه‌تی ژی وێنه‌یێ ئۆجالان ژ هۆلێ ڕاکه. له‌ورا تێ زانین کو ل ڕۆژاڤایێ کوردستانێ ئیستیخباراتا ده‌وله‌تا ترک ب خورتی خه‌بات دکه و ئاگاهداری دجڤینه.
لێ پکک/پیدێ عه‌کسا ڤێ دکه، ژ بۆنا کو ئه‌مه‌ریکایێ ده‌ره‌وین ده‌رخه، بریارا وان بێواته بکه، ل ڕۆژاڤایێ کوردستانێ ژ بۆنا ئازادیا ئۆجالان و ئاقووبه‌تا ئۆجالان ده‌ست ب چالاکیان کریه. سه‌مبۆلێن پککێ زێده‌تر دکه.
ئه‌ڤ هه‌لوه‌ستا پکک/پیدێ ل هه‌مبه‌ری ڕۆژاڤایێ کوردستانێ و هه‌موو کوردانە:
۱-هەم پرۆڤۆکاسیۆنه، کو دخوازه ژ ترکان ڕه جاره‌ک دن ئیسپات بکه کو فه‌رقا پکک و پیدێ نینە. پید پککێ یه و ب ده‌ستێ پککێ ئاڤا بوویه.
۲-هەم ئاشکه‌ره دکه کو ڕاسته ڕاست ب چالاکیا خوه خزمه‌تی ده‌وله‌تا ترک دکه.
۳-هەم ژی ب هه‌لوه‌ستا خوه گرێدانا خوه یا ده‌وله‌تا ترک جاره‌ک دن تینه ڕۆژه‌ڤێ و دیار دکه کو ده‌وله‌تا ترک خوه‌ست کو ئه‌مه‌ریکایێ ده‌ره‌وین ده‌رخه، مه ژی ده‌ست ب چالاکیا ئۆجالان کر.
نووچە/ئانالیز
ئامه‌د
ئیبراهیم گوچلو
