ئاشتى فەتحى بێسفكى
پێشمەرگە ئەو سومبولا نەتەوەیى یە یا زێدەتر ژ حەفتێ سالانە كار ژبو پاراستنا نەتەوەیا كورد دكەت، هەر ژ كومارا كوردستان ل مھاباد و هەتا نوكە ب بەردەوامى د هەمى شورەش و بزاڤێن گەلێ كورد دا چەكێ بەرخوەدانێ گرتیە دەست و پاراستنا ئاخا كوردستانێ كریە. سەرنجەكێ راكێشین ژ بو دوماهیك رویدانێن ب سەر هەرێما كوردستانێ دا هاتین شەرێ پێشمەرگە یێن قەهرەمان بوون دگەل رێكخراوا تیرورستى یا داعش ل سالا 2014 كو د ئەڤى شەرى دا هەرێما كوردستانێ گەهشتە قوناغێن گەلەك نەخوش و ب مەترسى كو هەتا گەفا ژ ناڤچوونا قەوارەیێ هەرێما كوردستانێ هەبوو.
بەلێ ب خوراگرى و بەرخودانا پێشمەرگەیێ قەهرەمان ئەڤ پیلانا ترسناك هاتە ژناڤبرن ب جانفیداییا پولەكا پێشمەرگە یێن قەهرەمان، ئێدى پێشمەرگە بونە نووچەیێن گشت جیهانێ و ب پەهلەوانێن سەركەفتنێ ل سەر تیرورستێن داعش هاتنە نیاسین. لێ هەتا نوكە وەزارەتا پێشمەرگە بێخودانترین وەزارەتە ل سەر ئاستێ گشت كابینەیێن حكومەتا هەرێما كوردستانێ.
یا سەیر بو من ئەو بوو كو ئەڤرو جێگرێ سەروكێ هەرێما كوردستانێ (شێخ جەعفەر) دانپێدان ب ئەوێ راستیێ كر و گوت: ئەم حكومەتەكین مە هزر ل وێ چەندێ نەكریە كو هندەك پێدڤىیێن سەربازى یێن گرنگ وەك دوویربینێن حەرارى بو پێشمەرگەیێ قەهرەمان پەیدابكەین” لەوران نەك بتنێ هوین نەشیاینە هندەك پێدڤ یێن سەربازى بو پێشمەرگەى دابین بكەن، بەلكو هوین نەشیاینە بچوكترین مافێن پێشمەرگەى پێ بدەن هەر ژ مووچەكێ ژ هەژى یان پلەبەرزكرنا پێشمەرگەى ل دەمێ خوە دا یان دابینكرنا پێدڤى یێن گرنگێن سەربازى ژبو پاراستنا گیانێ پێشمەرگەى و گەلەك تشتێن دیتر، زێدەبارى ئەڤێ چەندێ هەوە پێشمەرگە گەهاندیە ئاستەكى كو خەلكەك زكات و فترەیان ب خێزانێن پێشمەرگە یێن قەهرەمان بدەت كو ئەڤە گوپیتكا لاوازیا مروڤایەتیا هەوەیە ل بەرامبەر پێشمەرگە یێ قەهرەمان.
ئەفسەرەكێ پێشمەرگە پێش چەند سالان گوتنەكا جوان گوتبوو: “داعش هات پێشمەرگە عەزیز بوو، داعش چوو پێشمەرگە رەزیل بوو” بتنێ ل دەمێ هاتنا داعش هزرا هەوە ل پێشمەرگەی دهێت بێ كو روژەك ژ روژان وژدان و مروڤایەتیا هەوە كار بكەتن كو پرسیارا رەوشا پێشمەرگە یێ قەهرەمان بكەن.
