ب خوینا کوردان دلەیزن
رۆژا ۲۸ێ کانوونا ۲۰۱۱ێ ل ده‌ڤه‌را تخووبێ باشوور و باکورێ کوردستانێ باله‌فرێن شه‌ر یێن ده‌وله‌تا ترک خه‌لکێ سڤیل بۆمبه‌باران کر و د ئه‌نجام دا ۳٤ که‌سان ژیانا خوه ژ ده‌ست دا. ئه‌و که‌س ب تۆهمه‌تا چه‌کدارێن پەکەکێ هاتن بۆمبه‌باران کرن. لێ ده‌ما ئه‌و هاتین بۆمبه‌باران کرن گه‌له‌ک ئاشکه‌ره بوو کو ئه‌و نه چه‌کدارن و گوندینه هه‌ر جارێ ل وێ ده‌ڤه‌رێ دچن کرین فرۆتنا خوه دکن و ڤه‌دگه‌رن مالێن خوه. لێ ڤێ جارێ ده‌وله‌تێ گه‌له‌ک ب زانه‌بوون ئه‌و کاروان بۆمبه‌باران کر و ۳٤ کوردێن سڤیل و بێ تاوان کوشتن
پشتی ڤێ بوویه‌رێ ته‌ڤگه‌رێن سیاسی به‌رێ خوه دان رۆبۆسکی و هه‌ولدان ته‌نێ ڤێ ئێشا مه‌زن ڤێ کۆمکوژیێ ژ بۆ به‌رژه‌وه‌ندیێن خوه یێن سیاسی و حزباتیا ته‌نگ ب کاربینن. د سه‌ری دا هەدەپێ ئه‌ڤ یه‌ک کر، ئانکو ئەو بوویەر ژ بۆ مەرەمێن خوە یێن سیاسی و راکێشانا سۆزا خەلکی بکارانی و پاشی ژی ئاشکه‌ره بوو کو چو جارا هەدەپە ژ دل ل سه‌ر ڤێ دۆسیایێ نه‌سه‌کنینه و ئه‌ڤ یه‌ک ژ ئالیێ بارۆیا شرنه‌خێ ڤه ژی هاتیه زه‌لال کرن.
هه‌تا وێ راده‌یێ کو هنده‌ک مرۆڤێن قوربانیێن ڤێ کاراسه‌تا مه‌زن، ل سه‌ر خوینا وان بوون پارله‌مه‌نته‌ر و پشتا خوه دان راستیا رۆبۆسکی و ئه‌ڤ بوویه‌را دلته‌زین ژ بۆ به‌رژه‌وه‌ندیێن که‌ساتی و ژ بۆ ئه‌ندامه‌تیا پارله‌مه‌نتۆیێ ب کارانین.
کی چ بێژه بلا بێژه ئه‌ڤ راستیه‌کا ته‌حله.
ژ ئالیێ دن ڤه، پشتی ۱۱ سالان سه‌رۆکێ جەهەپێ سه‌ردانا رۆبۆسکی کر. ئاخاڤتنێن روتینی کرن و سۆز دا کو ڤێ پرسێ زه‌لال بکه. ئه‌ڤ یه‌ک ژی ڤه‌کری دخوه‌یێ کو جارسک دن وه‌ک هه‌ر سیاسه‌تمه‌داره‌کی سۆزه‌ک ڤالا دا و ده‌رباس دبه.
ده‌ما هلبژارتنان ئالیێن سیاسی هه‌موو ب جوره‌یه‌کی پرۆپاگانده‌یێ دکن. لێ هه‌ر کی به، چ ئالیه‌ک به، ده‌ما بوویه‌ره‌کا وه‌ک رۆبۆسکی یا دلته‌زین ژ بۆ به‌رژه‌وه‌ندیێن خوە یێن سیاسی بکاربینه و ڤێ بوویه‌رێ ژ خوە را بکه پرۆپاگەندەک سیاسی، هینگێ ئه‌و فاحشه‌تیا سیاسی دکن و سنۆرێ بێ ئه‌خلاقیێ ده‌رباس دکن.
بوویه‌را رۆبۆسکی گه‌له‌کی زه‌لاله، زێده‌تر که‌سه‌ک نکاره زه‌لالتر بکه. ده‌وله‌تێ ب باله‌فرێن جه‌نگی ب زانه‌بوون خه‌لکه‌ک سڤیل و گوندی یێن کورد بۆمبه‌باران کر و کوشتن. ئەگەر راست دکن بلا ڤی تاوانا ده‌وله‌تێ ب زانه‌بوون کری ڤه‌کری بێژن کو دەولەت سوجدارە. لێ نابێژن ژ به‌ر کو ده‌وله‌تا وان ژ بۆ وان مقەده‌سه.
٢٠٢٢.٨.١٠
